Ovaroma 8 - Etestamende Epe Moludhimba

Okukala modhonkono dhOmbepo yaKalunga

¹ Iya napano kape na tja ekoyo okupa onkali mbave li muKristus Jesus,

² mena lyokutya oveta yOmbepo yomwenyo muKristus Jesus ya nkutulula moveta youlundhi noyet̯o.

³ Kalunga wa undapa soka oveta hiya anyenwa oku tji undapa, mena lyokutya omuntu otjingone. Kalunga wa koya oulundhi momuntu, hiaa tuma Omuna ngoka ngwee ya molupe lwomuntu omulundhi, a ithe po odhonkali,

⁴ opo ouvyuuki hembu mbumau pulwa koveta, u hwithilwe po munt̯e hemba mbahatu ende mountu, iya mbatu enda paMbepo.

⁵ Iya mbava enda mountu, ve lipula ovipuka vyountu, iya mbava enda paMbepo, ve lipula ovipuka vyopaMbepo.

⁶ Iya omalipulo ountu et̯o, omalipulo opaMbepo omwenyo nouwa.

⁷ Iya omalipulo ountu a kondjetha Kalunga, mena lyokutya kaa tee koveta yaKalunga, oo kae tji ulu.

⁸ Mbava tuminwa kehalo lyountu, kaava ulu okuthevelwa Kalunga.

⁹ N̯e kamu tuminwa kehalo lyountu, iya mu tuminwa kOmbepo yaKalunga, andaa Ombepo yaKalunga i li mun̯e. Iya andaa Ombepo yaKristus kai li mun̯e, kamuvaKristus.

¹⁰ Iya andaa Kristus u li mun̯e, nandaku tiwa omalutu en̯i a t̯a mena lyoulundhi, ombepo yen̯i i na omwenyo mena lyouvyuuki mbutwa pewa kuKristus.

¹¹ Andaa Ombepo yaKalunga, ngwaa imuna Jesus kout̯e, i li mun̯e, Kalunga ngwaa imuna Kristus kout̯e ma imuna wo omalutu en̯i omat̯e okupitila mOmbepo ye ndjii li mun̯e.

¹² Vakwetu, iya tu na ongele, atjaa hayokukala monkalo yetu yountu.

¹³ Iya ngamu kala monkalo yountu wen̯i, matji mu etele et̯o. Iya andaa mamu yetha ovilinga vyoulundhi, Ombepo hai mu yethetha vyo, okutya mamu kala nomwenyo.

¹⁴ Iya ovantu avehe mboka mbava endethwa kOmbepo yaKalunga, ovanwaKalunga.

¹⁵ Iya Kalunga ke mu pele ombepo youpika, mu kale uke nowoma. Mwa pewa Ombepo youyumukwa, ndjitu ithana amatu tyaa: “Abba! Taa!”

¹⁶ Ombepo yaKalunga yo oyene oyo mai hipulula pamo nodhombepo dhetu okutya nt̯e tudhondele dhaKalunga.

¹⁷ Iya andaa tudhondele dhaKalunga, tudhompinga wo, odhompinga dhaKalunga nodhompinga pamo naKristus, andaa matu tatethwa pamo naye, opo tu laimithwa wo pamo naye.

Ekevelelo lyelaimo

¹⁸ Ame me mono okutya omatatetho henga anapano kaa ulu okuyelekwa nelaimo ndimatu ka holololelwa.

¹⁹ Ovyuutwa avihe mavi kevelele nehalo unene Kalunga hima ka hololola ovana.

²⁰ Iya ovyuutwa vya yumanekwa, hakehalo lyavyo, iya Kalunga oye a tokola tji kale nyahoka, atjaa pe na ekevelelo

²¹ okutya ovyuutwa vyo ovyene mavi ka kutuluka moupika woluwolela, havi i mekutuluko lyelaimo lyodhondele dhaKalunga.

²² Iya tu tji i okutya katee napano ovyuutwa avihe vi kema koviihamo ngovyedhimo amali kweya, alya imuka.

²³ Havyuutwa vala aviika vi kema, iya nant̯e wo mbatwa pewa otjali tjolutenga tjOmbepo yaKalunga, tu kema amatu kevelele Kalunga e tu ninge ovana, ye e tu hupithe.

²⁴ Iya mekevelelo hendi twa hupithwa. Ekevelelo ndyuu lwete, hakevelelo. Mo kevelele vi hiuu lwete?

²⁵ Iya andaa matu kevelele hihatu lwete, matu tji kevelele amatu likambulithile.

²⁶ Iya Ombepo nayo wo mai tu popile moungone wetu, mena lyokutya katu tji i hitwa thele okukumba, iya Ombepo oyene oyo mai tu kumbile nomukemo mbuhau tjiiwa okutumbulwa.

²⁷ Iya Kalunga nguu thongonona omitima, omalipulo Ombepo u e i, mena lyokutya Ombepo i kumbila ovantu ovadhilikwa monkalo moka Kalunga ndjima hala.

²⁸ Tu tji i okutya movipuka avihe Kalunga u undapela ouwa ovantu mboka mbave mu hole, mboka mbaa ithana kehalo lye.

²⁹ Kalunga mbaa holowola ae lukulu, we likalekela wo, ve lithe kOmuna, Omuna opo a ile otjiveli tjovakwawo ovengi.

³⁰ Iya ovantu mboka mbae likalekela, we ve ithana wo, mbaa ithana, we ve ninga wo ovavyuuki, mbaa ninga ovavyuuki, we ve laimitha wo.

Ohole yaKalunga muKristus Jesus

³¹ Atjaa napano movipuka hembi ngatu tye vi? Andaa Kalunga wa ama kunt̯e, aan̯i ngume tu kondjetha?

³² Kalunga ka hupithile Omuna okutya ahama ihamethwa, iya we mu yandja mena lyetu atuhe, ye kee tu pa mpaeli ovipuka avihe otjali?

³³ Aan̯i nguma kondjetha ovaholowolwa vaKalunga? Kalunga ye omwene oye me ve ningi ovavyuuki.

³⁴ Aan̯i ngume ve koyo? Kristus Jesus hengu ngwaa t̯a, ha imunwa kout̯e, napano u li kokulyo kwaKalunga, me tu kumbile.

³⁵ Aan̯i ngume tu yapula kohole yaKristus? Oudheu ngaile ne okun̯in̯ikidhwa ne okutatethwa ne ondjala ne oluhepo ne otjivangi ne et̯o?

³⁶ Ngahi kwa sonekwa okutyaa: “Etango alihe ovantu va hala oku tu dhipaa mena lyoye, tu talwa ngodhondhu amadhi ka dhipawa.”

³⁷ Iya movipuka hembi avihe matu ton̯a, hatu ton̯a naa mena lyangoka nguu tu hole.

³⁸ Ame ndji tji i tjatjili, hát̯o ne omwenyo ne ovaengeli ne ovatumini ne ovipuka vyanapano ne ovipuka mbimavi ya ne ovanadhonkono

³⁹ ne oule wopeulu ne oule wopohi ne otjuutwa tjimo himatji ulu oku tu yapula kohole yaKalunga muKristus Jesus, Muhona wetu.