Ovaroma 5 - Etestamende Epe Moludhimba

Ouwa nehuluko

¹ Iya hitwa ningwa ovavyuuki mena lyeitavelo, iya napano otjo pe na ouwa pokati ketu naKalunga mena lyaMuhona wetu Jesus Kristus.

² Iya mena lyeitavelo, Kristus we tu thikitha met̯ilonkenda lyaKalunga, moka mutu li. Matu hulukwa himatu kevelele etumbalo lyaKalunga.

³ Hatjo vala soka, iya matu hulukilwa wo omaudheu, hitu tji i okutya moudheu mamu dhi okulikambulithila.

⁴ Mokulikambulithila mamu dhi outakamethi, moutakamethi mamu dhi ekevelelo.

⁵ Ekevelelo kaali t̯itha ohon̯i, mena lyokutya ohole yaKalunga ya tilwa momitima vyetu kOmbepo Ondhilikwa ndjitwa pewa.

⁶ Tainkolo nt̯e twa li ovingone, Kristus wa t̯ila ovalundhi moluvedhe oluwa.

⁷ Otjidheu komuntu okut̯a poluvedhe lwomuvyuuki. Pamo matji tjiiwa, omuntu umo a kale nouvandhi, a t̯e mena lyomuntu omuwa.

⁸ Iya Kalunga we tu yulikila okutya u tu hole. Tainkolo twa li ovalundhi, Kristus wa t̯a mena lyetu.

⁹ Iya napano twa ningwa ovavyuuki mena lyombindhi ye, twa hupithwa, opo hátu vadhwa koluyuma lwaKalunga.

¹⁰ Iya andaa hitwa li odhondjedhi dhaKalunga, twa wan̯en̯ekwa naye mena lyet̯o lyOmuna, unene tuu napano hitwa wan̯en̯ekwa naKalunga, matu hupithwa, mena lyokutya Kristus u na omwenyo.

¹¹ Iya hatjo vala soka atjiika, nt̯e matu hulukilwa Kalunga mena lyaMuhona wetu Jesus Kristus, ngwee tu wan̯en̯eka naKalunga.

Adam naKristus

¹² Oulundhi wa etwa mouye komuntu umo. Oulundhi wa eta et̯o. Iya et̯o lye ya movantu avehe, mena lyokutya avehe va lundha.

¹³ Oulundhi omo wa li mouye, tainkolo oveta ahaiya yandjwa. Iya tainkolo hákwa li oveta, oulundhi nahi kau havelwe.

¹⁴ Iya okudha potembu yaAdam katee potembu yaMoses et̯o nahi li tumina ovantu avehe namboka mbahava lundhile ngaAdam hiaa lundha. Adam wa li ethano lyangoka ngume ya.

¹⁵ Iya otjali tjaKalunga koo tji yeleke nokulundha kwaAdam. Iya andaa ovantu ovengi va t̯a mena lyokulundha kwomuntu umo, iya et̯ilonkenda lyaKalunga enene unene notjali tje otjin̯ingi kovantu ovengi mena lyomuntu umo, Jesus Kristus.

¹⁶ Okulundha kwomuntu umo notjali tjaKalunga kavi lithele. Adam hiaa lundha, tje mu etela okukoyelwa et̯o. Et̯ilonkenda lyaKalunga, okukutulula omuntu kon̯ima yokulundha okwingi.

¹⁷ Iya andaa et̯o lya uta okutumina ovantu avehe mena lyomuntu ngoka umo ngwaa lundha, iya unene tuu mbava tambula et̯ilonkenda notjali tjouvyuuki, mava ka kala nomwenyo, hava tumine okupitila momuntu umo, Jesus Kristus.

¹⁸ Iya ngahi tji li okulundha kwomuntu umo hikwa etela ovantu avehe ekoyo okukoyelwa et̯o, iya notjilinga tjouvyuuki tjomuntu umo matji kutulula ovantu avehe, hava pewa omwenyo.

¹⁹ Ovantu avehe ngahi va ila ovalundhi mena lyomuntu umo, Adam nguha teele, iya otjo matji kala, ovantu ovengi mava ningwa ovavyuuki mena lyomuntu umo, Jesus Kristus, ngwaa tyaa muKalunga.

²⁰ Iya Kalunga wa yandja oveta, odhonkali opo dhi ila odhon̯ingi, mpape na odhonkali odhon̯ingi net̯ilonkenda lyaKalunga en̯ingi.

²¹ Oulundhi ngahi u tumina ovantu avehe hau ve etele et̯o, net̯ilonkenda wo mali tumine okupitila mouvyuuki, li tu twale momwenyo waapehe, okupitila muJesus Kristus, Muhona wetu.