Ovaroma 4 - Etestamende Epe Moludhimba

Abraham wa ila omuvyuuki mena lyeitavelo

¹ Iya tateombwale Abraham ngatu tye wa mona tji?

² Iya Abraham ngaile ovilinga vye mu ninga omuvyuuki, ngai me tjiiwa okulitanga, atjaa hakotjipala tjaKalunga.

³ Iya Omusonekwa mau tya vi? Mau tyaa: “Abraham wa itavela muKalunga. Iya mena lyokutya wa itavela, Kalunga we mu tala okutya omuvyuuki.”

⁴ Nguma undapa, ondjambi ye kai talwa ngotjipuka hima pewa otjali, iya i hawa ngothuto.

⁵ Nguhama undapa, atjaa ha itavele muKalunga, nguu vyuukitha ovalundhi, mena lyeitavelo lye ma talwa okutya omuvyuuki.

⁶ NaDavid wo otjo ma popi hima tya omunalao omuntu ngoka nguma talwa okutya omuvyuuki kuKalunga ahape na tja ovilinga.

⁷ “Ovanalao ovantu mboka Kalunga mbaa ithila po hiva lundha, nodhonkali dhawo hadhi t̯imikwa.

⁸ Omunalao omuntu ngoka Muhona nguhama havele odhonkali dhe.”

⁹ Iya elao hendi olyambava pita vala etanda ne nambahava pitile etanda? Tu popya okutyaa: “Abraham wa itavela muKalunga. Iya mena lyokutya wa itavela, Kalunga we mu tala okutya omuvyuuki.”

¹⁰ Tja ningwa nalun̯i? Aa pita etanda ne aheya pita etanda? Iya hahiaa pita etanda, ohiheya pita etanda.

¹¹ Wa pewa etangan̯eko lyokupita etanda, li ninge otjilimbo tjouvyuuki weitavelo ndyaa li nalyo tainkolo aheya pita etanda, opo a ninge ihe yovantu avehe mbava itavela háveya pita etanda, opo va talwe okutya ovavyuuki.

¹² Ye oye e li wo ihe yambava pita etanda, hakupita vala etanda, iya okweenda wo meitavelo ndyoka tate Abraham ndyaa li nalyo tainkolo aheya pita etanda.

Eudhiko lyaKalunga neitavelo

¹³ Iya Kalunga ka udhikilile Abraham ne oluyumuko lwe okutya ma pingana ouye mena lyahiaa tyaa oveta, iya omena lyahiaa itavela, Kalunga he mu tala okutya omuvyuuki.

¹⁴ Iya andaa omaudhiko aKalunga maa pewa mbava tyaa oveta, okutya eitavelo lyomuntu kali na himali popile, nomaudhiko aKalunga kae na otjilinga.

¹⁵ Iya oveta i eta oluyuma lwaKalunga. Andaa kape na tja oveta, kape na tja nguma lundha oveta.

¹⁶ Eudhiko lya yandjwa mena lyeitavelo, iya nyahoka lya yandjwa ket̯ilonkenda, tji kale otjatjili okutya eudhiko ndyoka lya yandjwa koluyumuko lwaAbraham aluhe, hakumboka vala mbava tyaa oveta, iya namboka wo mbava itavela ngaAbraham. Abraham, nt̯e atuhe oye e li tate,

¹⁷ ngahi kwa sonekwa okutyaa: “Ame me ku ningi ihe yoviwan̯a ovingi.” Abraham ngwaa itavela muKalunga, oye e li tate kotjipala tjaKalunga, Kalunga nguu imuna ovat̯e kout̯e, ha eta ovipuka mbihavi ko, havi ngala oko vya li.

¹⁸ Abraham wa itavela, he liun̯ike, tainkolo po hápa li himatji liun̯ikwa. Iya wa ila ihe yoviwan̯a ovingi, omusonekwa ngahi mau popi himau tyaa: “Oluyumuko lwoye malu ka ninga olun̯ingi.”

¹⁹ Odhombula dhaAbraham ambala dha li pethele, atjaa ka nengenene meitavelo lye, nandaku tiwa wa li ae lwete okutya olutu lwe kalu na uke odhonkono dhokuyumuka, naSara kaa yumuka uke.

²⁰ Abraham wa itavela, ka limbilililwe soka hiaa udhikilwa kuKalunga. Iya wa kola meitavelo lye, ha tumbaleke Kalunga.

²¹ Ye wa li ae tji i nawa okutya soka Kalunga hiaa udhika, ma ulu oku tji hwithila po.

²² Iya Kalunga wa tala okutya Abraham omuvyuuki.

²³ Odhondaka ndhimadhi tyaa: “Kalunga we mu tala okutya omuvyuuki,” kadhi sonekelelwe vala Abraham aika,

²⁴ iya dha sonekelwa wo nomena lyetu, mbamatu talwa okutya tuvavyuuki hitwa itavela muKalunga, ngwaa imuna Muhona wetu Jesus kout̯e.

²⁵ Kalunga wa yandja Jesus a t̯e mena lyodhonkali dhetu, ye he mu imuna kout̯e, e tu ninge ovavyuuki.