Ovaroma 2 - Etestamende Epe Moludhimba

Ekoyo lyaKalunga evyuuki

¹ Mukwetu, ove andaa u koya ovakwen̯i, koo ulu okulipopila nandaku tiwa oove an̯i. Iya andaa u koya ovakwen̯i, ove nan̯i mbyuu ve pela ombedhi, ove ovyo u ninga, okutya we likoyo omwene.

² Tu tji i okutya Kalunga u li mondjila hiaa koya ovantu mbava undapa ovipuka mbii li hinyahi.

³ Ove, ovakwen̯i ovipuka mbyuu ve pela ombedhi, amo ve koyo, ove ovyo u ninga, mo lipula okutya mo inkolo ekoyo lyaKalunga?

⁴ Ne wa tomba ouwa waKalunga ounene, nelikambulithilo, nolweembya lwe? Ku konekele ouwa waKalunga mbumau ku nana, u liteyulule?

⁵ Iya okulikukutika kwoye, nomutima woye mbuhau liteyulula, mo lietele oluyuma lwaKalunga metango lyoluyuma, nekoyo evyuuki lyaKalunga himali ka holololwa.

⁶ Iya Kalunga ma ka pa omuntu auhe hitji lithike povilinga vye.

⁷ Ovantu mboka mbave likambulithila okuundapa ouwa, okukondjela elaimo lyaKalunga, etumbalo nomwenyo mbuhau anda, Kalunga me ke ve pa omwenyo waapehe.

⁸ Iya ovantu mboka mbave lihole ovene, mbava anya hitji li mondjila, mbava landula hitja puka, Kalunga ma ka t̯a omadhinge, he ve yumaneke noluyuma.

⁹ Oudheu noviihamo mavi ke ya komuntu auhe nguu undapa ouvi, olutenga Ovajuda, okudha mpoka Ovagreka.

¹⁰ Iya elaimo netumbalo nouwa mau ka pewa ovantu avehe mbava undapa ouwa, olutenga Ovajuda, okudha mpoka Ovagreka.

¹¹ Kalunga ke na tja okapungulula.

¹² Iya avehe mbava lundha ahave na oveta, mava ka keka ahave na oveta, iya namboka mbava lundha ave na oveta, mava ka koywa koveta.

¹³ Omuntu kaa ile omuvyuuki kotjipala tjaKalunga hima teelele oveta, iya ma ile omuvyuuki ama hwithile po oveta.

¹⁴ Ovapaani, mbahave na oveta, iya andaa mava hwithile po soka himatji pulwa koveta monkalo yawo, okutya wo oveta muwo ovene, nandaku tiwa kave na tja oveta.

¹⁵ Iya onkalo yawo mai yulike okutya himatji pulwa koveta, tja sonekwa momitima vyawo, omalityoo awo maa yandja oumbangi, okulipula kwawo maku ve pa ombedhi ne maku ve popile.

¹⁶ Hehi matji ka ningwa metango ndyoka Kalunga hima ka koya okupitila muKristus Jesus oviholekwa vyovantu, ngahi mbe mu heela mondaka ombwa ndjindji teetha.

Ovajuda noveta

¹⁷ Iya ove u litya uMujuda, we liun̯ika moveta, u litangela Kalunga,

¹⁸ ehalo lyaKalunga u li i, wa longwa moveta okuholowola hitji li mondjila,

¹⁹ we liun̯ika okukoka ovapot̯i, utjiten̯i tjambave li met̯iku,

²⁰ omupukululi wovahima, omulongethi wodhondele. Ove u na oveta ndjii li ehuku lyatjatjili nolyounongo.

²¹ Iya ove, nguu longa ovakwen̯i, ku lilongo omwene? Ove u teethela ovantu okutya háva vaka, ove au vaka?

²² Ove u tjaela ovantu okutya háva i movihulo, ove au ya movihulo? Ove u yele ovikalunga, ove au vaka modhotempeli?

²³ U litanga, hiuu na oveta yaKalunga, atjaa ku penyetha Kalunga hiuu lundha oveta ye?

²⁴ Ngahi kwa sonekwa haku tiwaa: “Ena lyaKalunga mamu li penyetha mokati kovapaani.”

²⁵ Etanda li na otjilinga, andaa mo kambulitha oveta, iya andaa mo lundha oveta, mo ngala vala nguho pitile etanda.

²⁶ Nguha pitile etanda andaa ma kambulitha himatji pulwa koveta, kaa talwa ngangwaa pita etanda?

²⁷ Iya nguha pitile etanda, atjaa u tyaa oveta, me ke ku pa ouhima ove nguwa pita etanda, nguwa sonekelwa oveta, atjaa ho i lundha.

²⁸ Okwiila Omujuda, hakombanda, tjo okupita etanda, hakolutu.

²⁹ Iya Omujuda watjatjili, onguu li Omujuda momwenyo we, nokupita etanda lyatjatjili olyomomwenyo. Hehi hatjilinga tjoveta, iya otjilinga tjOmbepo yaKalunga. Nguu li nyahoka, ma pewa etumbalo kuKalunga, hakovantu.