Ovaroma 16 - Etestamende Epe Moludhimba

Omameneko omuyapostoli

¹ Napano me mu pa omukwetu Foibe nguu li omupopili weongalo lyomoKenkrea.

² Mu tambulen̯i mena lyaMuhona, n̯e mu mu popile movipuka avihe mbima hepa ngahi matji thevelwa ovadhilikwa vaKalunga, mena lyokutya wa popila ovantu ovengi, naame wo wa mpopila.

³ Menekelen̯i po ooPriskila naAkula, ovaundapi vakwetu muKristus Jesus.

⁴ Ovantu mboka va yandja omienyo vyawo mena lyandje. Me ve pandula unene, haame vala aika, iya nomaongalo ovantu avehe mbava dha moupaani.

⁵ Eongalo ndii onganena moyawo nalyo li menekelen̯i po. Menekelen̯i po Epainetus, omuhivilikwa wandje, nguu li omutenga waKristus moAsia.

⁶ Menekelen̯i po Maria, ngwee mu undapela unene.

⁷ Menekelen̯i po ooAndronikus naJunias ovetu, nodhonkwatwa dhonkwetu mbava tumbala mokati kovayapostoli, mboka mbava li ovatenga okwiila ovakriste pwaame.

⁸ Menekelen̯i po Ampliatus, omuhivilikwa wandje muMuhona.

⁹ Menekelen̯i po Urbanus, omuundapi omukwetu muKristus naStakus omuhivilikwa wandje muMuhona.

¹⁰ Menekelen̯i po Apelles, ngoka ngwee liyulika okutya ma hala okulandula Kristus. Menekelen̯i po ovaAristobulus.

¹¹ Menekelen̯i po Herodion owetu. Menekelen̯i po ovakriste ovakwetu muMuhona owomoyooNarkissus.

¹² Menekelen̯i po ooTrifaina naTrifosa, Ovakadhintu mboka mbave li motjilinga tjaMuhona. Menekelen̯i po Persis omukadhintu ngoka ngwaa undapa unene otjilinga tjaMuhona.

¹³ Menekelen̯i po Rufus, ngwaa holowolwa okukala motjilinga tjaMuhona, naina, ina nahi hitu kala naye, u ndinga ngomuna.

¹⁴ Menekelen̯i po ooAsinkritus nooFlegon nooHermes nooPatrobas nooHermas novakwetu mbamu kala nawo.

¹⁵ Menekelen̯i po ooFilologus nooJulia nooNereus nompandje, nooOlimpas novadhilikwa avehe mbamu kala nawo.

¹⁶ Limenekelen̯i po nehupito edhilikwa. Omaongalo aehe aKristus mae mu menekele po.

Lungamenen̯i ovapukithi

¹⁷ Vakwetu, me mu pukulula mu lungamene ovantu mboka mbava eta omaliyapauko nokupukitha ovaitaveli. Va kondjetha elongo ndyoka ndimwa longwa. Kalen̯i kokule nawo.

¹⁸ Ovantu mbava ninga ovipuka mbii li nyahoka, kava undapele Muhona wetu Kristus, iya va undapela omadhimo awo ovene. Va popya odhondaka odhombwa dhokupukitha omitima vyovantu mbahave na ombedhi.

¹⁹ Omuntu auhe wa tyaa ouhunga nan̯e okutya mu tyaa kodhondaka dhaKalunga. Ame mbe mu hulukilwa, iya me hala mu kale ovanadhondunge movipuka oviwa, kalen̯i kokule novipuka ovivi.

²⁰ Iya napano Kalunga kouwa ma ka nyanyauna dhiva Satana kohi yodhompadhi dhen̯i. Et̯ilonkenda lyaMuhona wetu Jesus ngali kale nan̯e.

Omameneko

²¹ Timoteus omuundapi omukwetu, novetu ooLukius nooJason nooSosipater mave mu menekele po.

²² Ame Tertius, ngumba sonekethwa omukanda hembu, me mu menekele po muMuhona.

²³ Gaius, mpandji kala, me mu menekele po. Monganda ye omo mu onganena ovakwaneongalo. Erastus nguu ungula odhombongo dhotjitungwalongo nomukwetu Kwartus mave mu menekele po.

²⁴ Et̯ilonkenda lyaMuhona wetu Jesus Kristus ngali kale nan̯e. Amen.

Ealikano lyokutumbaleka

²⁵ Kalunga nga tumbalekwe. Ye u na odhonkono oku mu koleka meitavelo pandaka ombwa yandje ndjimba teetha ouhunga naJesus Kristus nopaholololo lyotjiholekwa hitja holekelwe moluvedhe lwalukulu.

²⁶ Iya napano otjiholekwa tja holololwa momisonekwa vyovaprofeti nondaka yaKalunga yaapehe. Tja ivithilwa oviwan̯a, ovantu avehe opo ve mu itavele, wo ve mu tyee.

²⁷ Kalunga vala aika nguu li omunongo nga tumbalekwe apehe katee apehe. Amen.