Ovaroma 12 - Etestamende Epe Moludhimba

Eyambo ndii na omwenyo

¹ Vakwetu ame me mu ilikin̯a mena lyet̯ilonkenda lyaKalunga, yandjen̯i omalutu en̯i eyambo ndii na omwenyo, edhilikwa, hehi otjo tji li otjilinga tjen̯i tjopambepo himatji thevelwa Kalunga.

² N̯e hámu litha kouye hembu, iya ilen̯i ovape momalipulo en̯i, opo mu tjiiwe okuthongonona ehalo lyaKalunga okutya olin̯i, otjiwa, hitje thevelwa Kalunga, tji kale ngahi tji tha okukala.

³ Iya mena lyotjali tjet̯ilonkenda lyaKalunga soka himba pewa, me hala oku mu heela okutya hámu lisokele mpahamamu vadha, iya soken̯i mpamamu vadha. Omuntu auhe mokati ken̯i nge liyeleke mpape lithike eitavelo ndyoka Kalunga ndyee mu pa.

⁴ Iya ngahi tu na ovin̯ipo ovingi molutu lumo, ovin̯ipo avihe molutu kavi na otjilinga tjimo.

⁵ Iya nant̯e nandaku tiwa tu li po ovengi, nt̯e tulutu lumo muKristus, otjin̯ipo atjihe matji hepa otjikwawo.

⁶ Tu na otjali tjet̯ilonkenda hitji lili nahitji lili hitwa pewa ket̯ilonkenda. Andaa pe na nguu na ounongo okupopya etumwalaka lyaKalunga, nge tji ninge monkalo yeitavelo lye,

⁷ ne andaa okupopila, nga popile. Andaa okulonga ovantu, nga longe.

⁸ Ne andaa okuvandhipaleka ovakwawo, nge ve vandhipaleke. Nguma yandja, nga yandje nomutima omuwa. Nguu na odhonkono okutumina ovantu, nge tji ninge nodhondunge. Nguma popile mbave li moluhepo, nge tji ninge nehuluko.

⁹ Ohole hái kala novineya. Tilen̯i ouvi, kakatelen̯i mouwa.

¹⁰ Kalen̯i amu lihole unene ngahi tja thele okukala ovakriste. Tumbaleken̯i ovakwen̯i unene okupon̯a okulitumbaleka ovene.

¹¹ Undapen̯i unene, hámu kala nondende. Undapelen̯i Muhona nomitima vyen̯i avihe.

¹² Hulukwen̯i mekevelelo, likambulithilen̯i momaudheu, kambulithen̯i ealikano.

¹³ Liyandjelen̯i mbimu na vyo novakwen̯i ovadhilikwa mbave li moluhepo. Yakulen̯i odhongendi modhonganda dhen̯i.

¹⁴ Mbamave mu tatetha, ve pen̯i elao. Hámu ve thingi, ve pen̯i elao.

¹⁵ Hulukwen̯i pamo nambave hulukwa, n̯e mu lile pamo nambamava lili.

¹⁶ Kalen̯i nomalipulo amo, hámu lipula ovipuka ovinene mbihamamu ulu, iya kalen̯i noupanga novathona. Hámu limono modhondunge.

¹⁷ Hámu tjun̯a ouvi mouvi. Undapen̯i soka ovantu avehe himava tya otjiwa.

¹⁸ Andaa matji tjiiwa, tji li kun̯e mu kale nouwa novantu avehe.

¹⁹ Vahivilikwa, hámu kambulile omuntu onkongo, iya yandjen̯i oluvedhe koluyuma lwaKalunga. Ngahi kwa sonekwa, Muhona ma tyaa: “Ame me kambulile ovantu onkongo, aame omwene me ke ve yumaneka.”

²⁰ Iya ninga ngahi matji popi omusonekwa himau tyaa: “Ondjedhi yoye andaa wa t̯i ondjala, mu twiila po ovikulya. Andaa wa t̯i onyota, mu pa a nwe, mena lyokutya andaa mo ningi nyahoka, mo mu t̯itha ohon̯i.”

²¹ Hó yetha ouvi u ku ton̯e, undapa ouwa, u ton̯e ouvi nouwa.