Ovaroma 11 - Etestamende Epe Moludhimba

Et̯ilonkenda lyaKalunga kOvaisraeli

¹ Iya me pula ame tyaa, Kalunga wa yetha ovantu ve? Hatjo nokanunu. Ame omwene ndjiMwiisraeli, ndjiwoluyumuko lwaAbraham, mba dha meanda lyaBenjamin.

² Kalunga ka yethele ovantu ve mbae i ae lukulu. Nan̯i kamu tji i omusonekwa himau popi, Elia hiaa popya Israel kuKalunga ha tyaa:

³ “Muhona, va dhipaa ovaprofeti woye, hava han̯auna po oviyambelo vyoye, aame vala aika mba hupa po. Va mbandela, va hala okundhipaa.”

⁴ Kalunga we mu yaka vi? We mu yaka ama tyaa: “Ame mbe lithiila po ovalumentu omayovi epanduvali mbahava kumbile kotjikalunga Baal.”

⁵ Iya nanapano otjo tji li, pe na otjihupe otjinunu vala tjovantu mbava holowolwa kuKalunga mena lyet̯ilonkenda lye.

⁶ Iya andaa oket̯ilokenda, nan̯i hakovilinga, mena lyokutya ngaile okovilinga ngai et̯ilonkenda hat̯ilonkenda.

⁷ Iya ovi? Israel hiaa tanta ke tji vadhele, ovaholowolwa ve tji vadha, ovakwawo va kukuta,

⁸ ngahi kwa sonekwa, haku tiwaa: “Kalunga we ve yumba ombepo yepot̯i, omeho awo opo háe ku mono, nomatwi awo opo háa tee katee kundino hendi.”

⁹ David ma tyaa: “Otjipito tjawo ngatji ile omoo neliva lyoku ve kambula noku ve yumaneka.

¹⁰ Omeho awo ngaa twike, ahamave ku mono. Oluvedhe aluhe ve yongamekela kohi yomaudheu awo.”

¹¹ Ame me pula okutya Ovajuda va putalelela? Hatjo nokanunu. Iya hiva lundha, ehupitho lye ya kovapaani, Ovajuda opo ve ve t̯ile onki.

¹² Iya andaa napano okulundha kwOvajuda kwa etela ouye ouwa oun̯ingi, noluhepo lwawo lwopambepo lwa etela ovapaani ouwa oun̯ingi, ouwa mau ka kala au lithike pi, Ovajuda avehe himava havelwa mo!

Ehupitho lyovapaani

¹³ Iya napano me popi ouhunga nan̯e ovapaani. Ame ngomuyapostoli mokati ken̯i me tumbaleke otjilinga tjandje,

¹⁴ pamo ovantu womomuhoko wandje mava ka t̯ila ovapaani onki, opo ndji tjiiwe okuhupitha vamo owomuwo.

¹⁵ Iya andaa okuyekelwahi kwawo kwa eta okuwanena kouye naKalunga, iya okutambulwa kwawo maku ngala tji? Maku ngala okwiimunwa kout̯e.

¹⁶ Andaa okanyembu komungome okatenga ka yandjwa kuKalunga, okadhilikwa, okutya omungome auhe omudhilikwa. Omidhi vyomuti andaa omidhilikwa, nodhontai dhatjo odhondhilikwa.

¹⁷ Andaa odhontai dhimo dhomuholivi dha tetwa ko, haku twikwa ontai yomuholivi womokuti, iya n̯e ovapaani mu ngala omuholivi womokuti, iya napano mamu li ovinyango oviwa momuholivi mbwaa tengelwa.

¹⁸ Hó linomo, hó tombo odhontai ndhaa tetwa. Andaa mo linomo, kala au tji i okutya haove wa tjinda ethina, ethina olyo lye ku tjinda.

¹⁹ Ove mpaeli mo tyaa: “Odhontai hendhi dha tetwa ko, ame opo ndji twikwa ko.”

²⁰ Eewa, ove otjo mo popi, wo va tetwa ko mena lyahihava itavelele, ove wa tuwa poluvedhe lwawo mena lyahiwa itavela. Iya hó linomo, tila.

²¹ Iya ngaile Kalunga ka hupithile Ovajuda mbave li odhontai pakuutwa, naove wo ngai ke ku hupithile.

²² Iya tala ouwa nomadhinge aKalunga, omadhinge e kovantu mbava putala. Iya Kalunga ma ile omuwa kwoove, andaa mo likambula nawa. Andaa hatjo, naove wo mo tetwa ko.

²³ Ovajuda wo andaa kava anyenene mokuhaitavela kwawo, mava ka twikwa ko, mena lyokutya Kalunga ma ulu oku ve twikulula ko uke.

²⁴ N̯e ovapaani mu ngala ontai yomuholivi womokuti, ndjaa tetwa ko, hai twikwa nounongo komuholivi mbwaa tengelwa. Ovajuda va ngala omuholivi mbwaa tengelwa, iya kombinga yaKalunga otjipu unene okutwika ko uke odhontai ndhoka ndhaa tetwa ko komuholivi mboka.

Onkenda yaKalunga kovantu avehe

²⁵ Vakwetu, opo hámu i nodhondunge dhen̯i, me hala oku mu holololela otjiholekwa hehi okutya Ovaisraeli mave likukutike katee otjihavelo tjovapaani matji hwile po himatji ya kuKalunga.

²⁶ Iya Ovaisraeli avehe mava ka hupithwa, omusonekwa ngahi mau popi himau tyaa: “Omuhupithi ma ka dha muSion, ye ma ka itha mo omutomba okutomba Kalunga modhontekulona dhaJakob.

²⁷ Iya ewaneneno lyandje nawo hoolyondi, hime itha po odhonkali dhawo.”

²⁸ Ovajuda va ila odhondjedhi dhaKalunga mena lyen̯i n̯e ovapaani, mena lyahiva anya ondaka ombwa. Iya mena lyeholowolo lyaKalunga, va ila ovahivilikwa mena lyowoiheombwale.

²⁹ Iya Kalunga ka lundulula otjali tje kovantu, ye ka lundulula eithano lye.

³⁰ N̯e ovapaani lukulu kamu teele kuKalunga, iya napano Kalunga we mu t̯ila onkenda, mena lyokuhatyaa kwOvajuda.

³¹ Iya nan̯e himwa t̯ilwa onkenda, Ovajuda napano nawo kava tee kuKalunga, opo nawo wo napano va t̯ilwe onkenda kuKalunga.

³² Iya Kalunga ovantu avehe we ve yethela monkalo yokuhatyaa, opo avehe e ve t̯ile onkenda.

Odhondunge dhaKalunga dha tumbala

³³ Oule wouhona nounongo nowodhondunge dhaKalunga wa hulila pi! Aan̯i nguma ulu okuthitulula omakoyo e? Aan̯i nguma ulu okutyaa odhondjila dhe?

³⁴ Omusonekwa mau tyaa: “Aan̯i nguu i omalipulo aMuhona? Ne aan̯i nguu mu longa?

³⁵ Ne aan̯i ngwee mu pele tja olutenga, Muhona e mu thute tjo?”

³⁶ Iya ovipuka avihe vya dha kuye, mavi pitile muye, mavi i kuye. Kalunga nga tumbalekwe apehe katee apehe. Amen.