Ovaroma 10 - Etestamende Epe Moludhimba

¹ Vakwetu, me hala nomutima wandje auhe Ovaisraeli va hupithwe. Iya me kumbu kuKalunga va hupithwe.

² Iya ndji na oumbangi okuhipulula okutya Ovaisraeli va tiha okuundapela Kalunga, atjaa kave na ounongo woku tji ninga.

³ Iya ouvyuuki waKalunga kave u i, atjaa va hala okuliutila ouvyuuki wawo ovene, kava tee kouvyuuki waKalunga.

⁴ Iya Kristus oye a eta oveta komaandelo, ye oye e li ouvyuuki womuntu auhe ngwaa itavela.

Ehupitho lyovantu avehe

⁵ Iya Moses wa soneka ouhunga nouvyuuki woveta ha tyaa: “Omuntu nguma hwithile po oveta, ma kala nomwenyo mena lyoveta.”

⁶ Iya ouvyuuki womeitavelo mau popi hinyahi: “Hó lipula momutima, u tyee: ‘Aan̯i nguma londo okuya meulu?’ Matji tya, a ka ete Kristus,

⁷ ne ‘Aan̯i nguma i menkomototo?’ Matji tya, a ka ete Kristus kout̯e.”

⁸ Iya hehi himatji tyaa: “Odhondaka dhaKalunga dhi li popedhi naove, motjinyo tjoye nomomutima woye.” Ndhoka odho dhi li odhondaka dheitavelo ndhitu teetha.

⁹ Iya andaa mo hipulula notjinyo tjoye okutya Jesus oye e li Muhona, atjaa ho itavele momutima woye okutya Kalunga we mu imuna kout̯e, mo ka hupithwa.

¹⁰ Iya okwiitavela nomutima maku ku ningi okutya u ile omuvyuuki, nokuhipulula notjinyo maku hupitha.

¹¹ Omusonekwa mau tyaa: “Auhe nguma itavele muye, kaa ka t̯ithwa ohon̯i.”

¹² Iya kape na tja okapungulula pokati kOmujuda nOmugreka. Kalunga oye e li Muhona wovantu avehe, ye oye a yandja ouhona we kovantu avehe mbava kumba kuye.

¹³ Omusonekwa mau tyaa: “Auhe nguma kumbu mena lyaMuhona, ma ka hupithwa.”

¹⁴ Mava ulu vi okukumba kunguhava itavelele? Mava ulu vi okwiitavela kunguhava teele? Mava ulu vi okutyaa, andaa kape na tja omuteethi?

¹⁵ Mava ulu vi okuteetha, andaa kava tuminwe? Ngahi kwa sonekwa haku tiwaa: “Odhompadhi dhovateethi wondaka ombwa dhe thewa vi!”

¹⁶ Iya Ovaisraeli haavehe va itavela ondaka ombwa, Jesaja ngahi ma popi hima tyaa: “Muhona, aan̯i ngwaa itavela eteetho lyetu?”

¹⁷ Iya eitavelo li dha mokutyaa, nokutyaa ku dha modhondaka dhaKristus.

¹⁸ Iya me pula okutya, kava teele? Va tyaa, omusonekwa ngahi mau popi himau tyaa: “Ondaka yawo ya ya nohi aihe, nodhondaka dhawo dha ya nouye auhe.”

¹⁹ Me pula uke okutya Ovaisraeli nan̯i kave tji i? Olutenga Moses ma tyaa: “Ame me mu t̯itha onki kovantu mbahave thi otjiwan̯a, me mu yumaneketha kotjiwan̯a hihatji na odhondunge.”

²⁰ Jesaja ma popi nouvandhi hima tyaa: “Mba moneka kovantu mbahava ntaendhele, mbe liholololela ovantu mbahava mpulile.”

²¹ Iya Jesaja we tu heela okutya Kalunga ma popi ouhunga naIsrael ama tyaa: “Etango alihe ndji tambula ovantu mbahava ntee, mbava nkondjetha.”