Ovaroma 1 - Etestamende Epe Moludhimba

¹ Omukanda hembu mau dhi kwaame Paulus, omupika waKristus Jesus ngumba holowolwa, he ithanwa ndji kale omuyapostoli wokuteetha ondaka ombwa yaKalunga.

² Ondaka ombwa Kalunga we i udhika ae lukulu okupitila movaprofeti ve momisonekwa omidhilikwa.

³ Ondaka hendji mai popi ouhunga nOmunwaKalunga. Jesus monkalo yountu wa dha moluyumuko lwaDavid,

⁴ iya ye monkalo yOmbepo youdhilikwa, hiaa imunwa kout̯e, wa yulikwa kodhonkono odhonene okutya Jesus Kristus, Muhona wetu, oye e li OmunwaKalunga.

⁵ Kalunga we tu t̯ila onkenda, he tu pa otjilinga tjouyapostoli mena lyaKristus, ovantu moviwan̯a avihe opo va tyee, wo va itavele muye.

⁶ Nan̯e wo muvamo owomovantu hemba mbava ithanwa kuKalunga, mu ile ovaJesus Kristus.

⁷ Iya me mu sonekele n̯e amuhe mbamu li moRoma okutya Kalunga u mu hole, hiee mu ithana, mu ile ovantu ve ovadhilikwa. Et̯ilonkenda nouwa waKalunga Tate nowaMuhona Jesus Kristus ngau kale nan̯e.

Ealikano lyompandu

⁸ Olutenga me pandula Kalunga kandje okupitila muJesus Kristus mena lyen̯i amuhe, mena lyokutya eitavelo lyen̯i mali hipululwa mouye auhe.

⁹ Kalunga, ngundji undapela nomwenyo wandje auhe hindji teetha ondaka ombwa yOmuna, oye e li ombangi yandje okutya ame apehe ndji mu thipaluka

¹⁰ momaalikano andje. Apehe ndji kumba, ehalo lyaKalunga andaa mokaluvedhe heha kathiinina mali mpa omuhunga ndji ye kun̯e.

¹¹ Ame me hala oku mu mona, mbe mu dhimbaluka, ndji mu pe otjali tjopambepo himatji dhi kuKalunga, tji mu koleke.

¹² Iya nyahoka nt̯e nan̯e matu livandhipaleke pokati, ame me mu vandhipaleke neitavelo lyandje, n̯e mamu mbandhipaleke neitavelo lyen̯i.

¹³ Vakwetu, ame híme hala oku mu holeka okutya ovikando ovingi ndji hala oku mu valulila po, atjaa apehe ndji mona oluvinda. Ame me hala wo mokati ken̯i ndji mone mo ovaitaveli ngahi mba mona moviwan̯a vimo.

¹⁴ Ame ndji na ongele kOvagreka nokumbahave thi Ovagreka, kovanandunge nokovahima.

¹⁵ Ame me hala oku mu teethela ondaka ombwa nan̯e wo hemba mbamu li moRoma.

Odhonkono dhondaka ombwa

¹⁶ Ame híme t̯a ohon̯i ondaka ombwa, mena lyokutya oyo i li odhonkono dhaKalunga, ndhimadhi hupitha omuntu auhe ngwaa itavela, olutenga Omujuda okudha mpoka Omugreka.

¹⁷ Iya ouvyuuki waKalunga mau hololoka mondaka ombwa, Kalunga hima ningi ovantu, va ile ovavyuuki okupitila meitavelo okudha komautilo katee komaandelo, omusonekwa ngahi mau tyaa: “Omuvyuuki ma ka kala nomwenyo mena lyeitavelo.”

Ovantu avehe ovalundhi

¹⁸ Oluyuma lwaKalunga malu dhi meulu, halu ya okukondjetha omutomba okutomba Kalunga nouvi auhe wovantu mbava tjikila otjatjili nouvi wawo.

¹⁹ Kalunga me ve yumaneke, mena lyokutya hiva thele okwiiwa ouhunga naKalunga, tji li nawa poluhandja mokati kawo, Kalunga we ve holololela tjo.

²⁰ Iya okudha keuto lyouye okuhamoneka kwaKalunga nodhonkono dhe dhaapehe noukalunga we wa teeka nawa, hau moneka movipuka mbyoka Kalunga mbyaa undapa. Iya ovantu kaava ulu okulipopila.

²¹ Iya nandaku tiwa Kalunga ve mu i, kave mu tumbaleke ngaKalunga, wo kave mu pandulile. Omalipulo awo a li vala oouhima, odhondunge dhawo dha dhiwelekwa.

²² Ve limona okutya ve na odhondunge, nan̯i wo ovahima.

²³ Poluvedhe lwokukumba kuKalunga nguha anda, wo va kumba kotjithika tjomuntu nguu t̯a, nokotjithika tjovidhila, notjovinamwenyo, notjoviyaladhi.

²⁴ Iya Kalunga we ve yethela momahalo omitima vyawo, va ninge ovipuka ovit̯ithahon̯i nokusilika omalutu awo ovene.

²⁵ Va pingathanetha otjatjili tjaKalunga novithithi, hiva kumba nokuundapela ovyuutwa poluvedhe lwokukumba kOmuuti, ngoka ngwaa thele okutumbalekwa apehe katee apehe. Amen.

²⁶ Iya Kalunga we ve yethela monkalo ndjimai t̯itha omuntu ohon̯i. Ovakadhintu vawo va lundulula onkalo yountu, va lala novakadhintu vakwawo hihatji li monkalo yountu.

²⁷ Ovalumentu nawo va yetha onkalo yountu yokulala novakadhintu, va lala novalumentu vakwawo hitji tilitha. Va yumanekwa noluyuma ndwee ve hulu.

²⁸ Iya nawo ngahi háva itavele ondunge yaKalunga, Kalunga naye wo we ve yethela mowoova wawo, va undape hihatja thele okuundapwa.

²⁹ Wo kave na tja ouvyuuki nokanunu, ve na oungangala, olwiho, ouvi, onki, okulidhipaa, ovilwa, okulikengelela, okusokela ovakwawo ouvi, olwaambo,

³⁰ okulipopya navi, okuyele Kalunga, okulilalula, nokulinoma nokulitanga, ovantu wokulipula novipuka ovivi. Kava tee kovanene vawo,

³¹ kave na tja odhondunge, kave na tja eitavelo, kave na tja ohole, kave na tja onkenda novakwawo.

³² Wo oveta yaKalunga ve i i okutya mai tya nguma kala monkalo ndjii li nyahi, ma t̯i. Wo ovene kava undapa vala ovipuka hembi, iya ve hulukilwa ovantu mbave vi ninga.