Ovakolossa 4 - Etestamende Epe Moludhimba

¹ Vahona, ningilen̯i ovapika ven̯i hitja vyuuka nahitji li nawa, mena lyokutya mu tji i okutya nan̯e wo mu na Muhona meulu.

Omailikin̯o

² Kambulithen̯i ealikano, mu pathumuke, n̯e mu pandule Kalunga.

³ Tu kumbilen̯i wo, Kalunga opo e tu pe oluvedhe oluwa okuteetha odhondaka dhe, okuhololola otjiholekwa tjaKristus, soka hitja ntwiitha mokaliwoso moka mundji li napano,

⁴ ndji tji hololole ngahi mbe tji pewa ndji tji popye.

⁵ Kalen̯i nounongo himamu kala novantu mbahave thi ovaitaveli. Kambulen̯i nawa oluvedhe aluhe ndumu na lo.

⁶ Odhondaka dhen̯i amamu popi apehe ngadhi kale nonkenda. Himamu popi ngatji nyetethele ovantu, n̯e mu kale amu tji i okuyaka omuntu auhe.

Omameneko

⁷ Tikikus, omukwetu omuhivilikwa, omuliun̯ikwa nomuundapi omukwetu motjilinga tjaMuhona me ke mu hipululila ovipuka avihe ouhunga naame.

⁸ Iya me mu tumu kun̯e, opo mu iwe okutya tu li po vi, ye a tendeleke omitima vyen̯i.

⁹ Ye me ya naOnesimus, omukwetu omuhivilikwa, omuliun̯ikwa owomeongalo lyen̯i. Mave ya oku mu heela ovipuka avihe mbyaa ningwa huno.

¹⁰ Aristarkus, ngutu li naye mokaliwoso, me mu menekele po, naMarkus omulamwaBarnabas, ngumwa heelelwe okutya mu tambulen̯i, hime ya kun̯e, naye wo me mu menekele po.

¹¹ Josua nguu tiwa oJustus naye wo me mu menekele po. Ovantu hemba vala vatatu ovaitaveli mbava dha moujuda, owo tu undapa pamo nawo mena lyotjilongo tjaKalunga. Va mpopila unene.

¹² Epafras, owomun̯e, omupika waKristus Jesus, me mu menekele po wo, ye wa kambulitha unene oku mu kumbila, u kumba Kalunga, mu tjiiwe okukala amwa kola meitavelo, n̯e mu tyee ehalo lya Kalunga movipuka avihe.

¹³ Ame naame me ulu oku mu hipululila Epafras hiee mu kondjela, nahiaa kondjela ovantu womoLaodikea nowomoHierapolis.

¹⁴ Lukas, ondokotola omuhivilikwa naDemas mave mu menekele po.

¹⁵ Menekelen̯i po ovakwetu womoLaodikea. Mu menekele po wo Nimfas neongalo ndyoka wo ndii ongana monganda ye.

¹⁶ Omukanda hembu andaa wa tangwa meongalo lyen̯i, u tumen̯i, u ka tangwe wo meongalo lyokoLaodikea, n̯e mu tange wo mbumau dhi koLaodikea.

¹⁷ Heelen̯i Arkippus okutya nga hwithile po otjilinga hiaa pewa okuundapela Muhona.

¹⁸ Aame Paulus, me mu menekele po, mba soneke nokuwoko kwandje omwene. Thipaluken̯i okutya ndji li modhonkuto. Et̯ilonkenda lyaKalunga ngali kale pamo nan̯e.