Ovakolossa 3 - Etestamende Epe Moludhimba

¹ Iya andaa mwa imunwa pamo naKristus, taendhen̯i mbyoka ovyokombanda, hoka Kristus hwaa kala pohi kokulyo kwaKalunga.

² Soken̯i ovipuka vyahehunya kombanda, hámu soko ovipuka vyokombanda yohi.

³ Iya mwa t̯a, omienyo vyen̯i havi holekwa pamo naKristus muKalunga.

⁴ Kristus, nguu li omwenyo wen̯i, katango ma hololoka, nan̯e wo mamu ka hololoka pamo naye metumbalo.

Onkalo onkulu nompe

⁵ Yethen̯i omahalo opauye ngae li mun̯e ngahi tji li: Ovihulo, okuhakohoka, otjipando otjivi, ehalo evi, olwiho lwemona olwo lu li okuundapela ovikalunga.

⁶ Iya mena lyovipuka mbii li nyahoka, oluyuma lwaKalunga malu ya kombanda yovantu mbahave mu tee.

⁷ Nahi lukulu nan̯e wo otjo mwa li, himwa li monkalo yovipuka hembi.

⁸ Iya napano yethen̯i wo ovipuka hembi avihe ngahi tji li: Oluyuma, omadhinge, ouvi, omapenyo ne hámu popi ovipuka mbimavi t̯itha ohon̯i.

⁹ Hámu likembele po, mena lyokutya mwe lidhula omuntu omukulu pamo novilinga vye.

¹⁰ Dhalen̯i omuntu omupe. Kalunga ma tjitulula apehe omuntu hengu omupe mun̯e, e lithe kolupe lwOmuuti we, opo e mu thikithe mehwilopo lyoku mu iwa.

¹¹ Iya kape na tja uke okapungulula pokati kOmugreka nOmujuda, ngwaa pita etanda nanguha pitile etanda, ongendi nomutombwantu, omupika nanguhe thi omupika, iya ovipuka avihe mbyoka vi li muKristus, ye oye e na ovipuka avihe.

¹² Muvantu vaKalunga, Kalunga u mu hole, we mu holowola, mu kale ovantu ve omwene. Kalen̯i amu na olweembya, onkenda, elinunupiko, ouwa nelikambulithilo.

¹³ Likambulithilen̯i, andaa mwe liningi navi, liithilen̯i po. Muhona ngahi a itha po wo odhonkali dhen̯i, nan̯e wo ngatjo mu ithila po ovakwen̯i.

¹⁴ Kovipuka hembi avihe wedhen̯i ko ohole, mena lyokutya ohole oyo mai ulu okukutila ovipuka avihe kumo.

¹⁵ Ouwa waKristus ngau tumine omitima vyen̯i, ouwa hembu mbumwa ithanenwa wo molutu lumo, n̯e mu pandule.

¹⁶ Ondaka yaKristus nouhona wayo ngai yule mun̯e. Lilongen̯i, mu lipukulule nodhondunge adhihe, imben̯i omapisalomi, omaimbilo, oviimbo vyopambepo. Imbilen̯i Kalunga nompandu momitima vyen̯i.

¹⁷ Atjihe himamu popi ne himamu undapa, tji ningen̯i mena lyaMuhona Jesus, n̯e mu yandje ompandu mena lye kuKalunga Tate.

Onkalamwenyo ompe

¹⁸ Vakadhintu, tyeen̯i kovalumentu ven̯i ngahi matji thevelwa Muhona.

¹⁹ Valumentu, kalen̯i amu hole ovakadhintu ven̯i, hámu ve ningi navi.

²⁰ Dhondele, tyeen̯i kovanene movipuka avihe, hehi otjo matji thevelwa Muhona.

²¹ Valumentu, hámu tatetha ovanwen̯i, mpe mava poyola.

²² Vapika, tyeen̯i kovahona ven̯i womouye hembu movipuka avihe. Hámu tji ningi vala ave mu lwete, ve mu hope. Iya tji ningen̯i nomwenyo auhe, nontilo okutila Muhona.

²³ Atjihe himamu ningi, tji ningen̯i nomutima auhe, hámu ngala mamu undapele omuntu, iya oMuhona.

²⁴ Kalen̯i amu tji i okutya Muhona me ke mu pa ondjambi ndjaa ungulila ovantu ve, mena lyokutya mu undapela Muhona Kristus ye omwene.

²⁵ Ngwaa ninga ouvi, ma ka ningilwa ouvi mbwaa ninga. Kalunga ke na tja okapungulula.