Ovaheberi 8 - Etestamende Epe Moludhimba

Jesus oye e li omuyambethi wetu omunene

¹ Iya napano otjipuka otjinene himatu popi hitja pon̯a ovikwawo hootjohi: Tu na omuyambethi omunene nguu li hinyahi, ngwaa kala pohi kokulyo kwotjipunditumino tjoMutumbalekwa meulu,

² a undape moudhilikwa, mesase lyatjatjili ndyaa tungwa kuMuhona, ndihali tungilwe komuntu.

³ Omuyambethi omunene auhe wa tuwa po a kale ama yandja kuKalunga ovipuka otjali nokuyamba omayambo. Iya nomuyambethi wetu omunene wa thele okukala ae na tja wo hima yamba.

⁴ Ngaile wa li kombanda yohi, ngai hamuyambethi, mena lyokutya ovayambethi mboka mbava yandja ovipuka otjali oveta yOvajuda ngahi mai popi, oko ve li.

⁵ Ovilinga vyouyambethi mbiva undapa, ethano notjidhidhimbe tjasoka hitji li meulu. NgaMoses nawanawa hiaa heelelwe kuKalunga, hiaa li ama tungu esase, Kalunga ha tyaa: “Tala nawa, opo u undape ovipuka avihe ngahi tja li methano ndiwa yulikilwa kondundu.”

⁶ Iya napano Jesus wa pewa otjilinga tjouyambethi otjinene okupon̯a otjovayambethi, ngahi e li omuwan̯en̯eki wewaneneno ewa ndyaa pon̯a ekwawo, ndyaa kulama komaudhiko omawa okupon̯a omakwawo.

⁷ Iya ngaile ewaneneno lyolutenga lya hula, ngai kaaku hepwa uke etyavali.

⁸ Iya Kalunga ma pa ovantu ve ombedhi, hima tyaa: “Taa tuutuu, Muhona ma tya, omatango mae ke ya, katango me ka twaa po ewaneneno epe pokati ketu nonganda yaIsrael nopokati ketu nonganda yaJuda.

⁹ Ewaneneno epe kaali yelekwa nandyoka ndimba ningile nowoihoombwale, himbe ve kambulile mokuwoko, he ve dhilula mo moEgipiti. Iya mena lyokutya kava kambulithile ewaneneno lyandje ndimbe ve pa, mbe ve yetha. Muhona otjo ma popi.

¹⁰ Iya hendi olyo li li ewaneneno ndime ka ninga nonganda yaIsrael kon̯ima yomatango ngoka, Muhona otjo ma popi. Oveta yandje me ke i twaa momalipulo awo, he ke i sonekela momitima vyawo. Me ka ila Kalunga kawo, nawo mava ka ila ovantu vandje.

¹¹ Kape na omuntu noumo nguma ka longa omuntu womotjilongo tje, po kape na nguma ka heela owoyawo ha tyaa: ‘Iwa Muhona,’ mena lyokutya avehe mave ke ndjiwa okudha komununu katee komunene.

¹² Iya me ke ve t̯ila onkenda, he itha po omapuko awo, híme ka thipaluka uke odhonkali dhawo.”

¹³ Iya Kalunga hima popi ewaneneno epe, olyolutenga we li mona okutya lya kulupa. Hitja kulupa, matji ka anda dhiva.