Ovaheberi 6 - Etestamende Epe Moludhimba

¹ Hátu kala vala movipuka mbitwa longwa pomautilo ouhunga naKristus, ngatu vyuuken̯i komeho. Iya kaatu popi uke ovipuka vyopomautilo, ngahi tji li: Ovilinga mbihavi na otjilinga ne okutya Kalunga matu mu itavele vi ne

² elongo lyetjatjo ne etendeko lyomawoko ne eimuko lyovat̯e kout̯e nekoyo lyathiinina.

³ Iya otjo matu hala okuninga, Kalunga ae tji hala.

⁴ Iya mbava tungatelelwe, atjaa hava lolo otjali tjomeulu, hava pewa Ombepo Ondhilikwa,

⁵ hava lolo ouwa wodhondaka dhaKalunga nodhonkono dhouye mbumau ya,

⁶ hava yetha eitavelo lyawo, kaava ulu uke okuliteyulula, mena lyokutya mava papele uke OmunwaKalunga komutjaakano noku mu t̯itha ohon̯i movipathi vyovantu avehe.

⁷ Kalunga ma yandja elao kotjana hitji n̯in̯a nawa omeva ombula ndjii loka apehe, hatji etele ovantu mboka mbava lima mo ovilya oviwa.

⁸ Iya andaa otjana tji mena omano nodhohongo, katji na himatji popile, tji li popedhi nokuthingwa, nopomaandelo matji ka hikwa po.

⁹ Iya vakwetu ovahivilikwa, nandaku tiwa matu popi hinyahi, twe liun̯ika okutya ovipuka oviwa mbii li mun̯e mavi mu etele ehupitho.

¹⁰ Kalunga ka pengetha, ye ka dhimbi otjilinga tjen̯i nohole yen̯i himwa tumbaleketha ena lye, himwa popila ovadhilikwa ovakwen̯i nahimamu twikile oku ve popila.

¹¹ Matu hala unene omuntu auhe mun̯e a kale ae na ontanto katee pomaandelo, opo a vadhe soka hiaa kala ama kevelele.

¹² Kaatu hala mu kale nondende, iya holelen̯i hembenya mbava itavela, have likambulithile, katee va pingana soka Kalunga hiee ve udhikila.

Eudhiko lyaKalunga olyatjatjili

¹³ Kalunga hiaa udhikila Abraham eudhiko, wa ana okutya eano me li hwithile po. Hihapa li omuntu omunene oku mu pon̯a, we lianena puye omwene,

¹⁴ ha tyaa: “Otjatjili, me ke ku pa elao, he ke ku pa oluyumuko olun̯ingi.”

¹⁵ Abraham we likambulithila, ha kevelele, ha ka pewa soka Kalunga hiee mu udhikila.

¹⁶ Iya ovantu va ana ovantu ovanene puwo. Iya okwaana ku koleka otjipuka, kwo haku itha po odhombata adhihe.

¹⁷ Kalunga hiaa li ama hala okuyulikila ovantu mbava pewa eudhiko lye okutya kaa ka lundulula nokanunu ontanto ye, iya eudhiko lye we li koleka nokwaana.

¹⁸ Pe na ovipuka vivali hembi, eudhiko nokwaana, kavi lunduluka, iya muvyo Kalunga ka kembe. Iya nt̯e mbatwa mona eameno muye twa vandhipalekwa unene, opo tu kevelele eudhiko ndii li komeho.

¹⁹ Nt̯e tu na ekevelelo ndii ngala ekulameno lyomienyo vyetu ndyaa kola lyo olyatjatjili. Ekevelelo ndyoka nditu nalyo mali hiti moudhilikwa watjatjili kon̯ima yotjitopa hitji yuvikila motempeli yomeulu,

²⁰ moka Jesus mwaa tenga okuhita mena lyetu. Ye wa ila omuyambethi omunene katee apehe ngahi tja li molenda yaMelkisedek.