Ovaheberi 5 - Etestamende Epe Moludhimba

¹ Iya omuyambethi omunene auhe u holowolwa movantu, e ve kalele po movipuka mbii na tja naKalunga, a yandje ovipuka otjali nokuyamba omayambo mena lyodhonkali.

² Oye e tji i okut̯ila onkenda mbahave na ounongo, mbava puka, mena lyokutya naye omwene otjingone.

³ Mena lyokutya naye omwene otjingone, kaa yamba omayambo mena lyodhonkali dhovantu adhiika, iya u tha wo okuyamba mena lyodhonkali dhe omwene.

⁴ Kape na tja noumo ngume liithile etumbalo hendi muye omwene, Kalunga oye a ithana omuntu a ile omuyambethi omunene ngaAron hiaa ithanwa.

⁵ Iya naKristus haye omwene e lipa etumbalo a ile omuyambethi omunene, iya Kalunga oye e mu heela ha tyaa: “Oove omunwandje, iya ndino ame mba ile Iho.”

⁶ Ngahi ma popi wo uke poluvedhe lumo ha tyaa: “Oove omuyambethi katee apehe, ngahi tja li molenda yaMelkisedek.”

⁷ Jesus monkalamwenyo ye kombanda yohi wa kumba, ha pula, ha kuu nomihodhi kuKalunga, ngoka nguma ulu oku mu hupitha met̯o. Kalunga we mu tyaa, mena lyokutya we linunupika, he liyandja kuye.

⁸ Iya ye nandaku tiwa wa li OmunwaKalunga, we lilonga okutyaa okupitila momatatetho.

⁹ Ye hiaa hwithilwa po okupwa, wa ila othimo yehupitho lyaapehe yovantu avehe mbamava tee muye.

¹⁰ Kalunga we mu twaa po, a ile omuyambethi omunene ngahi tja li molenda yaMelkisedek.

Okupukulula mbamava yetha eitavelo

¹¹ Tu na otjingi okupopya ouhunga notjipuka hehi, atjaa otjidheu oku mu thitululila, mena lyokutya kamu tee dhiva.

¹² Iya n̯e mwa li noluvedhe ndwaa hulu, mu ile ovalongethi, nan̯i mamu hepa uke okulongwa ovililongwa vyopomautilo vyOndaka yaKalunga. N̯e mamu hepa omahini, kaamu li ovikulya vyokutat̯inwa.

¹³ Iya omuntu auhe nguu yamethwa omahini, ondele omununu, ke na ounongo okupungulula hitja vyuuka ne hitja penge.

¹⁴ Ovikulya vyokutat̯inwa ovyovanene, mboka mbave lilonga nambave ilila okupungulula ouwa nouvi.