Ovaheberi 12 - Etestamende Epe Moludhimba

Likambulithilen̯i omapukululo

¹ Iya hitu na engundwa enene ndii lithike hempa lyodhombangi dheitavelo ndhee tu kondoloka, iya nant̯e wo ngatu yethe atjihe himatji tu tjaele. Ngatu yethe oulundhi mbuu likuta nant̯e. Okulipatela hehu hutu na ko komeho, ngatu likambulithile okudhamuka.

² Omeho etu ngaa tale kuJesus omuuti nomuhwithilepo weitavelo, ngwee likambulithila omatatetho okomutjaakano mena lyehuluko ndyaa tulikilwa. Ye wa li ahe na ko natja nomapenyo, ye wa kala pohi kokulyo kwotjipunditumino tjaKalunga.

³ Lipulen̯i naJesus hiee likambulithila ovantu ovalundhi mbave mu kondjetha, opo hámu ulwa, n̯e ahamamu poyola.

⁴ Iya mekondjo lyen̯i okukondjetha oulundhi, tee hempa kamuya tika ombindhi.

⁵ Iya mwa dhimba odhondaka dhokuvandhipaleka, ndhimwa heelwa ngovana, ndhimadhi tyaa: “Munwandje, hó tombo himo pukululwa kuMuhona, hó poyola amo yumanekwa kuye.

⁶ Iya Muhona u yumaneka ngwee hole, u tona omuntu auhe ngoka ngwaa tambula, a ile omuna.”

⁷ Likambulithilen̯i himamu yumanekwa, Kalunga ma kala nan̯e ngovana. Pe na ondele nguha yumanekwa kwiihe?

⁸ Iya andaa kaamu yumanekwa, okutya kamuvana womolukupo, iya muwodhombalethi.

⁹ Hitu kala nootate, ve tu yumaneka, iya twe ve tumbaleka. Iya matu kala vi ahamatu tumbaleke Tate owomeulu, opo tu ule okukala atu na omwenyo?

¹⁰ Iya ootate ve tu yumaneka mokaluvedhe okathupi, ngahi ve tji tala okutya otjiwa. Iya Kalunga u tji ninga mena lyouwa wetu ovene, opo tu kale atu na tja tjomoudhilikwa we.

¹¹ Iya omuntu poluvedhe ndoka ama yumanekwa, kombinga ye ka kala ae lwete okutya otjipuka otjiwa, iya u kala ae yuvite navi, iya mbava tekulwa nyahoka, kon̯ima okuyumanekwa hoka maku ka yandja otjinyango otjiwa tjouvyuuki.

Omapukululo nomalondolo

¹² Iya yelen̯i omawoko en̯i ngaa nampa, n̯e mu koleke odhongolo dhen̯i ndhaa nengena.

¹³ Enden̯i modhondjila ndhaa vyuukilila, opo ompadhi ndjaa lemana ahamai pikuka, iya i velulwe.

¹⁴ Kondjen̯i okukala nouwa novantu avehe, n̯e mu kondje okukala ovadhilikwa, mena lyokutya kape na nguma ka mona Muhona, andaa hamudhilikwa.

¹⁵ Talen̯i okutya ahamapa kala omuntu ngume liitha mo met̯ilonkenda lyaKalunga. Talen̯i okutya ahamapa kala omuntu nguma ngala otjitho hitji na oudhioo, hitja lula, hatji kulu, hatji etele ovantu oudheu owingi noudhioo watjo.

¹⁶ Iya talen̯i okutya ahamapa kala omuntu nguma i movihulo ne nguhe na ouvyuuki ngaEsau, ngwaa landetha po ounene we komunitje elonga lyovikulya.

¹⁷ Iya mu tji i okutya, komeho hiaa ka kala ama hala okupewa elao, wa yethwa, mena lyokutya kaa li uke ama ulu okulundulula hiaa undapa, nandaku tiwa elao we li lilila nomihodhi.

¹⁸ Iya n̯e kamu hweenene pondundu ndjii t̯in̯wa nomawoko, ndjii tema omulilo, ndjii na et̯iku, otjilwiilwii nombula yongandavila,

¹⁹ hukwa teekele onkwino nondaka ndjaa li amai popi unene, Ovaisraeli hiva teele ondaka ndjoka onene, va kumba okutya háva heelwa uke.

²⁰ Wo kava li amava ulu okulikambulithila okuteelela elaka ndiva li amava heelwa, ndyaa li amali tyaa: “Notjipako andaa tja t̯in̯i kondundu ndjoka ngatji tonwe nomawe, tji dhipawe.”

²¹ Iya mena lyemoneko ndyoka ndyaa li amali tilitha, Moses wa popya ha tyaa: “Mba tila, me teketa.”

²² Iya n̯e mwe ya kondundu yaSion nokoJerusalem tjomeulu, kotjitungwalongo tjaKalunga omunamwenyo, hitji na ovaengeli omayovi nomayovi omengi.

²³ N̯e mwe ya kotjipito tjehuluko nokeongalo lyoviveli vyaKalunga, mboka mbave na omana ngaa sonekwa membo lyomeulu. Mwe ya kuKalunga nguu koya ovantu avehe, nokodhombepo dhovavyuuki mboka mbava hwila po okupwa.

²⁴ N̯e mwe ya kuJesus omuwan̯en̯eki wewaneneno epe nokombindhi yokusapwa, ndjimai popi ovipuka oviwa mbyaa pon̯a mbyoka ovyombindhi yaAbel.

²⁵ Iya talen̯i okutya kaamu anya okuteelela nguma popi. Iya andaa ovantu mboka kava inkolele, ngwee ve londola ae li kombanda yohi, nt̯e matu ulu vi okwiinkola Kalunga ngume tu londola ae li meulu?

²⁶ Ondaka yaKalunga ya teketethele ohi, iya napano wa udhika ha tyaa: “Híme ka teketetha uke ohi otjikando tjimo vala, iya me ka teketetha wo neulu.”

²⁷ Ondaka hendji ndjimai tyaa: “Otjikando tjimo uke” mai yulike okutya ovyuutwa avihe mbyaa teketethwa, mavi ka ithwa po, opo mbihavi teketele, vi kale po.

²⁸ Ngatu pandule, himatu pewa otjilongo hihatji teketa. Ngatu pandule nt̯e tu undapele Kalunga nonkalo ndjimai mu thevelwa, atu na etumbaleko nontilo.

²⁹ Iya Kalunga ketu oye e li omulilo mbuu lungwinitha.