Ovaheberi 11 - Etestamende Epe Moludhimba

Eitavelo

¹ Okukala atu na eitavelo matji tya okukala atu na eliun̯iko ndyaa kola movipuka mbyoka mbimatu kevelele nambyoka mbihamatu ulu oku vi mona.

² Iya ovantu ovakulu va hopelwe kuKalunga mena lyokwiitavela kwawo.

³ Eitavelo olyo lye tu ninga tu tyee okutya ouye wa utwa nondaka yaKalunga, iya okutya novipuka mbii moneka vya ningwa movipuka mbihavi moneka.

⁴ Eitavelo olyo lya undapetha Abel, a yambe eyambo ewa okupon̯a olyaKain. Kalunga we mu mona okutya omuvyuuki, ha tambula otjali tje, mena lyeitavelo Abel ma popi uke, nandaku tiwa wa t̯a.

⁵ Eitavelo olyo lya popila Henok okutya ahama t̯i. Wa ithwa po kuKalunga, ahama moneka komuntu noumo, mena lyokutya Kalunga we mu twala meulu. Omusonekwa ngahi mau tya Henok tainkolo aheya twalwa meulu, wa heelwa okutya Kalunga we mu hulukilwa.

⁶ Kape na tja ngume hulukilwa kuKalunga, andaa ke na tja eitavelo, mena lyokutya nguma hweene puKalunga, wa thele okwiitavela okutya Kalunga oko e li, ye ma thutu mbamave mu taendha.

⁷ Eitavelo olyo lya undapetha Noa, a tyee omalondolo aKalunga ngamaa popi ovipuka mbyoka mbimavi ke ya, ye mbiha ulile okumona. Noa wa tyaa kuKalunga, ha tungu ondjuwowato, moka mwaa hupila pamo nonganda ye. Iya eitavelo lye olyo lye mu ninga okutya a koye ouye, ye ha pewa ouvyuuki kuKalunga, mboka mbwaa dha meitavelo.

⁸ Eitavelo olyo lya undapetha Abraham, a tyee kuKalunga hiee mu ithana, ha dhilukile kotjilongo soka hiaa ka pewa ngepingo. Abraham wa dhiluka motjilongo tjawo, ye kaa li ae i hoka huma i.

⁹ Eitavelo olyo lye mu ninga okutya a kale ngongendi motjilongo soka Kalunga hiee mu udhikila. Nahi u kala vala momasase, naIsak naJakob, mboka Kalunga mbaa udhikila epingo tuu ndyoka,

¹⁰ mena lyokutya Abraham wa li ama kevelele otjitungwalongo soka hitji na omakulameno ngaa kola, hitja t̯indwa, hatji tungwa kuKalunga omwene.

¹¹ Eitavelo olyo lya ninga okutya Sara a ile ina yaIsak, nandaku tiwa wa li aa kulupa, matji tya kaa li ama ulu okwiila omut̯imba. Sara we liun̯ika Kalunga ngoka ngwaa hwithila po soka hiaa udhika.

¹² Abraham nandaku tiwa wa li aa kulupa, muye mwa ka dha oluyumuko olun̯ingi nduu ngala odhonyothi keulu, nduhamalu ulu okuhawa, ngoluheke lwomawe kontyo yelunga.

¹³ Ovantu hemba avehe va t̯ila meitavelo. Wo kava mwene ovipuka mbyoka Kalunga mbyee ve udhikila, ve vi talela kokule, have vi hulukilwa. Va koneka okutya wo odhongendi novayenda kombanda yohi.

¹⁴ Ovantu mbava popya ovipuka mbyoka, va yulika okutya wo va taendha otjilongo tjawo.

¹⁵ Ngaile va sokele kotjilongo hoka huva dhile, ngai va mona oluvedhe okutjuna.

¹⁶ Iya va li ave na ehalo okumona otjilongo soka otjiwa tjomeulu okupon̯a soka huva dha. Iya Kalunga ke ve t̯ile ohon̯i, hive mu ithana Kalunga kawo, mena lyokutya we ve longekedhela otjitungwalongo.

¹⁷ Eitavelo olyo lya ningitha Abraham, a yambe omuna Isak, a ile eyambo, Kalunga hiee mu lolele. Abraham oye e li ye ngwaa pelwe omaudhiko kuKalunga, iya nandaku tiwa otjo nyahoka we lilongekedhele okuyamba omuna ongunga,

¹⁸ nandaku tiwa Kalunga wa heela Abraham ha tyaa: “Oluyumuko lwoye malu ka dha muIsak.”

¹⁹ Iya Abraham wa sokele okutya Kalunga me ke mu imunina Isak kout̯e. Iya wa pewa uke Isak ngangwaa dhi met̯o.

²⁰ Eitavelo olyo lya undapetha Isak, a pe Jakob naEsau elao ndyoka ndimali ke ya.

²¹ Eitavelo olyo lya undapetha Jakob, a pe odhondele dhaJosef aveevali elao, tainkolo aheya t̯a. Wa kambulila kotjisawa tje, ha kumbu kuKalunga.

²² Eitavelo olyo lya undapetha Josef, hiaa popya ouhunga noludhilu lwOvaisraeli, tainkolo aheya t̯a, ha tya himava dhi moEgipiti omat̯ipa e ngave e ninge vi.

²³ Eitavelo olyo lya undapetha ovanene vaMoses, ve mu holeke omiedhi vitatu, hiaa yumukwa. Va mono okutya ondele omuwa, wo kava tilile oveta yohamba.

²⁴ Eitavelo olyo lya undapetha Moses, hiaa kulu, wa anya okutiwa ondele yatjaFarao.

²⁵ Ye wa holowola okutya okutatethwa pamo novantu vaKalunga hahe okupon̯a okuhulukilwa oulundhi wopokaluvedhe vala.

²⁶ Ye wa mona okutya okupenywa mena lyaKristus hahe okupon̯a omauhona aehe omoEgipiti, mena lyokutya ye wa li ae lwete ondjambi ndjima ka pewa komeho.

²⁷ Eitavelo olyo lya undapetha Moses, hiaa dha moEgipiti, ahama tila oluyuma lwohamba. Moses wa vandhipala, mena lyokutya wa kala aa ngala u lwete Kalunga, ye nguha moneka.

²⁸ Eitavelo olyo lya undapetha Moses, opo a twee po Opaasa nokuvaveka ombindhi pomivelo vyodhondjuwo, omweengeli wet̯o opo há dhipaa oviveli vyOvaisraeli.

²⁹ Eitavelo olyo lya vandhipaleka Ovaisraeli, va ule okuyauka Elunga ethilantu ngambamava ende polukukutu, Ovaegipiti hiva lolo oku tji ninga, va ya nomeva.

³⁰ Eitavelo olyo lya teyetha omakuma otjitungwalongo tjaJeriko, Ovaisraeli hive tji kondoloka omatango epanduvali.

³¹ Eitavelo olyo lya amena ekunga Rahab, ahama dhipawa pamo novakondjethi vaKalunga, mena lyokutya wa hupitha odhontumwa dhOvaisraeli.

³² Nge twikile ko uke, ame tya vi? Hí na tja oluvedhe ndwaa hulu okuhipulula Gideon, Barak, Simson, Jefta, David, Samuel novaprofeti.

³³ Mena lyeitavelo va kondjetha ovilongo, have vi ton̯a. Va undapa ouvyuuki, hava mono omaudhiko ngaa hwithilwa po, hava pata ovinyo vyodhonkeyama.

³⁴ Va dhima omulilo mbuu na odhonkono, hava inkolo odhomemo dhomukonda, moungone va ningwa ovanankono, nodhombandhi movita, hava taata omangundwa ovakwavita odhongendi.

³⁵ Ovakadhintu vamo va imuninwa ovat̯e vawo kout̯e. Ovantu vamo va tatethwa tee va t̯i, wo kava halele okukutululwa, opo va mone eimuko kout̯e ewa.

³⁶ Vamo va tonwa, hava penywa, hava kutwa nomalyenge, hava yedhililwa mokaliwoso.

³⁷ Vamo va dhipawa nomawe, vamo va sahwa pokati, ovantu vamo va twelwa nomikonda, hava t̯i. Vamo va dhilauka, hava dhala ovipa vyodhondhu novyodhonkombo, va t̯a oluhepo, va lambwalambwa, hava mono ovihuna.

³⁸ Ouye kawa li ouwa kuwo nokanunu. Va alauluka nomakuti nomodhondundu, hava kala momaleva nomomankomototo eheke.

³⁹ Ovantu avehe mboka va pandulwa mena lyeitavelo lyawo, atjaa kava mwene hiva udhikilwa.

⁴⁰ Iya Kalunga u na hiee tu longekedhela otjiwa okupon̯a hehinya. Otjiwa hootjohi okutya wo mava ka mona vala ouwa pamo nant̯e.