Ovagalati 4 - Etestamende Epe Moludhimba

¹ Iya me mu heele okutya ompinga tainkolo ae li ompepe, pokati kawo nomupika koo pungu po, nandaku tiwa oye e li omwene wovipuka avihe.

² Iya tainkolo ae li omununu, ma kala ama yungwa, ha t̯ilwa otjiho katee potembu ndjoka ndjaa tuwa po kuIhe.

³ Iya nant̯e wo hitwa li odhompepe, twa li kohi youpika wonkalo youye hembu, katee etango ndyoka twa ninga ovanene.

⁴ Iya otembu ombwa hiye thiki, Kalunga wa tuma Omuna, ha yumukwa komukadhintu, ha kala kohi yoveta yOvajuda,

⁵ opo e tu yowole kohi yoveta, nt̯e tu tjiiwe okwiila odhondele dhaKalunga.

⁶ Iya mena lyokutya mudhondele dhaKalunga, Kalunga wa tuma Ombepo yOmuna momitima vyetu. Ombepo ndjoka i tu heela hai tyaa: “Abba! Taa!”

⁷ Ove kumupika uke, iya undele yaKalunga. Iya andaa undele yaKalunga, Kalunga me ke ku pa epingo.

Paulus wa li notjiho nOvagalati

⁸ Iya himwa li ahamu i Kalunga, mwa li ovapika vamboka mbahave thi ookalunga katjatjili.

⁹ Iya napano himu i Kalunga, unene tuu himu iwe kuKalunga, mamu ulu vi okutjuna uke kodhonkalo dhalukulu ndhihadhi na otjilinga, dho ndhihadhi na odhonkono, mu ninge uke ovapika vadho?

¹⁰ Mu tangan̯eka omatango nomiedhi nomaluvedhe nodhombula.

¹¹ Ame ndji na otjiho nan̯e. Pamo ovilinga vyandje mbimbe mu undapela vya yonaka.

¹² Vakwetu, me mu kumbu mu ngale ame, ngaame wo hindji ngala n̯e. Kamu ndjihamethele nokanunu.

¹³ Mamu thipaluka okutya olutenga himbe mu teethela ondaka ombwa, omena lyokutya nahi ndji vela.

¹⁴ Nandaku tiwa mwa mona omaudheu mena lyonkalo yandje, n̯e kamu ntombele ne okundjekelahi, iya mwa ntambula ngomweengeli waKalunga, ngaKristus Jesus.

¹⁵ Mwe hulukilwe, iya napano mwa ningwa tji? Ame ndji na oumbangi okutya ngaile mwa li amamu tji ulu, ngai mwa dhoola mo omeho en̯i, hamu e mpa.

¹⁶ Iya mba ninga ondjedhi yen̯i, himbe mu heela otjatjili?

¹⁷ Ovantu vamo mboka va vandhipala unene mena lyen̯i, atjaa ontanto yawo hambwa. Va hala oku mu itha ko kunt̯e, opo mu ve ningile ngawo hive mu ningila.

¹⁸ Okukala odhombandhi apehe movipuka oviwa otjiwa, hakukala vala odhombandhi andji li pun̯e.

¹⁹ Vanwandje, ame ndji na oviihamo ngedhimo amali kweya, katee mamu ngala Kristus.

²⁰ Me hala unene ndji kale nan̯e napano, opo ndji popye nan̯e nondaka ndjii lili, mena lyokutya mbe mu limbililwa.

Hagar naSara

²¹ Ntjeela ndjen̯i iya, n̯e hemba mbamu hala okukala kohi yoveta, oveta kamu i yuvite himai popi?

²² Iya kwa sonekwa okutya Abraham wa li novana vavali ovadhantu, umo wa yumukwa komukadhintu omupika, umo wa yumukwa komukadhintu nguhe thi omupika.

²³ Iya ondele yomupika wa yumukwa ngahi tji yumukwa odhondele, ondele yanguhe thi omupika wa yumukwa ngahi tja udhikilwa Abraham kuKalunga.

²⁴ Otjipuka hehi tja popiwa meeli. Iya ovakadhintu hemba vavali omawaneneno avali. Ewaneneno limo lyokondundu yaSinai ndii yumuka ovapika, olyo li li Hagar.

²⁵ Iya Hagar ma yelekwa nondundu yaSinai ndjii li muArabia, ye oye ma yelekwa naJerusalem tjanapano, hitji li moupika pamo novantu vatjo avehe.

²⁶ Iya Jerusalem tjokombanda hitja kutuluka otjo tji li meme.

²⁷ Iya kwa sonekwa haku tiwaa: “O, hulukwa, mpange ove nguho yumuka, linyandaela, ove nguho mwene oviihamo vyedhimo amali kweya. Iya odhondele dhompange ovengi okupon̯a povangwaa huukilwa komulumentu.”

²⁸ Vakwetu, iya n̯e mudhondele dheudhiko ngaIsak.

²⁹ Iya ngahi tja li pomatango hengenya, ngwaa yumukwa ngahi tji yumukwa odhondele, wa lamba ngwaa yumukwa ngahi tja udhikwa kOmbepo, iya nanapano wo otjo tji li.

³⁰ Iya Omusonekwa mau tya vi? Mau tyaa: “Taata mo omukadhintu omupika nomuna, mena lyokutya omuna omudhantu womukadhintu omupika kaa ulu okupingana pamo nomuna omudhantu womukadhintu nguhe thi omupika.”

³¹ Vakwetu, iya nt̯e katudhondele dhomukadhintu omupika, iya tudhondele dhomukadhintu nguhe thi omupika.