Ovagalati 2 - Etestamende Epe Moludhimba

Paulus ma tambulwa kovayapostoli ovakwawo

¹ Iya hipa piti odhombula omulongo nane, mba ya uke koJerusalem naBarnabas, naTitus wo mba ya naye.

² Mba ya ko mena lyahimbe liholololelwa kuKalunga, he ve hipululile ondaka ombwa ndjimba teethela ovapaani. Mbe i hipaululila vala ovaviyuli, opo ndji iwe okutya ovilinga vyandje mbimba undapa nambime undapa kavi yonakele.

³ Iya Titus ngwaa nt̯indikila nandaku tiwa Omugreka, ka n̯in̯ikidhilwe okupita etanda.

⁴ Iya ovantu vamo mbave lininga okutya ovaitaveli vakwetu ve livakela mokati ketu okulavetha ekutuluko lyetu muKristus Jesus, ve tu ninge ovapika.

⁵ Nt̯e katu liyandjele kuwo nokanunu, opo mu kale notjatjili tjondaka ombwa.

⁶ Iya ovaviyuli mboka okutya va li vi, hatjipuka tjandje. Kalunga ka tala otjipala tjomuntu. Mboka kave na hiva mbwedha otjipe.

⁷ Iya va mona okutya Kalunga wa mpa otjilinga tjokuteethela ovapaani ondaka ombwa ngaPetrus hiaa pelwe otjilinga tjokuteethela Ovajuda ondaka ombwa.

⁸ Iya ngwaa twaa po Petrus a kale omuyapostoli wOvajuda, oye a ntwaa po wo ndji kale omuyapostoli wovapaani.

⁹ Iya Jakob naPetrus naJohannes mboka mbava talwa okutya odhongundhi dheongalo, va koneka okutya Kalunga oye a mpa otjilinga hehi. Iya ve tu pa omawoko himatji yulike okutya twa ile omapanga, nt̯e naBarnabas tu ende kovapaani, wo va ende kOvajuda.

¹⁰ Tjimo atjiika twa thele okuthipaluka ovathona, motjipuka hehi mbe litwaa mo wo unene oku tji undapa.

Paulus ma anda Petrus moAntiokia

¹¹ Iya Petrus hiee ya moAntiokia, mbe mu anda mokati kovantu, mena lyokutya wa li nombedhi.

¹² Iya ovalumentu mbava dha kuJakob, tainkolo háveye ya, Petrus nahi u lya novapaani, iya mbenya hive ya, wa dha mo muwo, he likalele, mena lyokutya wa li ama tila mbava pita etanda.

¹³ Ovajuda ovakwawo ovaitaveli nawo wo ve mu holela, Barnabas katee ve mu pukitha.

¹⁴ Iya himba mono okutya kaava ende nawa motjatjili tjondaka ombwa, mba heela Petrus movipathi vyovantu avehe he tyaa: “Ove ku ngala Omujuda, u ngala omupaani, ove au li Omujuda. Mo ulu vi okun̯in̯ikidha ovapaani va kale ngOvajuda?”

Ovajuda novapaani mava hupithwa keitavelo

¹⁵ Nt̯e ovene komuhoko tuVajuda katuvapaani ovalundhi.

¹⁶ Iya tu tji i okutya ovilinga vyoveta kaavi ningi omuntu a ile omuvyuuki, iya ma ile omuvyuuki aa itavele muJesus Kristus. Nant̯e wo twa itavela muKristus Jesus, opo tu vyuukithwe keitavelo muKristus, hakovilinga vyoveta. Kape na tja omuntu noumo nguma vyuukithwa kovilinga vyoveta.

¹⁷ Iya andaa nt̯e hemba mbatu hala okuvyuukithwa muKristus, twa moneka wo okutya tuvalundhi, hika matji tya Kristus omupopili woulundhi? Aai, hatjo nokanunu!

¹⁸ Iya andaa me tungulula uke ovipuka mbyoka mbimba han̯auna po, okutya ame me liyulike okutya me yono oveta.

¹⁹ Ame mba kutuluka modhonkono dhoveta, opo ndji undapele Kalunga. Ame mba papelwa komutjaakano pamo naKristus,

²⁰ opo hé kala uke andji na omwenyo mwaame omwene, iya Kristus oye a kale ae na omwenyo mwaame. Iya omwenyo mbundji na wo, me kala nawo meitavelo, okwiitavela mOmunwaKalunga nguu ntjole, ngwee liyandja poluvedhe lwandje.

²¹ Ame híme tombo et̯ilonkenda lyaKalunga. Iya andaa ouvyuuki u li moveta, okutya et̯o lyaKristus kali na himali popile.