Ovagalati 1 - Etestamende Epe Moludhimba

Omameneko

¹ Omukanda hembu mau dhi kwaame Paulus, omuyapostoli nguhe tuminwe komuntu ne ketumino lyomuntu, iya mba tumwa kuJesus Kristus nokuKalunga Ihe, ngwee mu imuna kout̯e.

² Ovakwetu avehe mbatu li nawo, mava menekele po omaongalo omoGalatia.

³ Et̯ilonkenda nouwa waKalunga Tate nowaMuhona Jesus Kristus ngau kale nan̯e.

⁴ Jesus Kristus we liyandja mena lyodhonkali dhetu, opo e tu hupithe mo mouye hembu wanapano ouvi, e tu hupithe, Kalunga Tate ngahi ma hala.

⁵ Kalunga nga tumbalekwe apehe katee apehe. Amen.

Ondaka ombwa iimo vala

⁶ Mwa nkumitha, himwa yetha dhivadhiva ngwee mu ithanena met̯ilonkenda lyaKristus, n̯e hamu i kondaka imo uke.

⁷ Ko okwene kaku na tja ondaka ombwa imo uke, iya ku na ovantu vamo mbave mu ngwangwaneka, mbava kondja okupidhidhika ondaka ombwa yaKristus.

⁸ Iya nandaku tiwa nt̯e ne omweengeli ha dhi meulu, he ya oku mu teethela ondaka imo uke, ndjihai thi ndjitwe mu teethela, nga thingwe.

⁹ Ngahi twe mu heela lukulu, iya otjo me mu heele uke okutya auhe ngume mu teethele ondaka imo uke, ndjihai thi ndjimwa tambula, nga thingwe.

¹⁰ Iya napano ame nge taendhe himatji hulukitha ovantu ne ohimatji hulukitha Kalunga? Andaa nan̯i me hulukitha vala ovantu, himupika waKristus.

Paulus hiaa ila omuyapostoli

¹¹ Iya vakwetu, ame me mu heele okutya ondaka ombwa ndjimbe mu teethela, kai dhile komuntu,

¹² yo hí i pelwe komuntu, yo hí i longelwe komuntu, iya mbe i holololelwa kuJesus Kristus.

¹³ Iya onkalo yandje yalukulu yomoujuda mwe i tyaa, eongalo lyaKalunga himbe li taatele, he li han̯auna po.

¹⁴ Ame mba li komeho movilinga vyokuundapela Kalunga moujuda okupon̯a ovakwetu ovengi unene omakula andje motjiwan̯a tjetu, ngahi mba li ombandhi okukambulitha odhonteto dhootateombwale.

¹⁵ Iya tje thevelwa Kalunga ngwaa ntjolowola okudha medhimo lyameme, ha ndjithana mena lyet̯ilonkenda lye,

¹⁶ ha hololola Omuna mwaame, opo ndji teethele ovapaani ondaka ombwa, iya ame hí na ngumba pula a ntjeele okutya hehi matji tya vi,

¹⁷ nokoJerusalem hí ile ko, nokumboka mbava tenga okwiila ovayapostoli kwaame, iya ame mba ya koArabia, he tjuna uke koDamasko.

¹⁸ Kon̯ima yodhombula ndatu mba ya koJerusalem, tu liiwe naPetrus. Mba kala puye omatango omulongo naatano.

¹⁹ Iya ovayapostoli vamo hí ve mwene, kakele kaJakob vala, omunitjaMuhona.

²⁰ Ame me mu sonekele otjatjili. Kalunga u tji i okutya ame híme kembe.

²¹ Kon̯ima mba ya movit̯indwalongo vyaSiria naKilikia.

²² Iya ame hímba li andji iwe komaongalo aKristus omoJudea,

²³ va ntyaa vala, hava tyaa: “Nahi nguu tu tatetha, napano u teetha eitavelo, nahi ndyaa kondjetha okuhan̯auna po.”

²⁴ Wo va tumbaleka Kalunga mena lyovipuka mbyaa ndjundapela.