Ovafilippi 3 - Etestamende Epe Moludhimba

Kristus aika oye e li ouvyuuki watjatjili

¹ Iya uke, vakwetu, hulukwen̯i muMuhona! Oku mu sonekululila ovipuka hembi kaatji ndjulithwa, iya matji mu pameke.

² Lungamenen̯i odhombwa ndhoka, lungamenen̯i ovaundapi mboka ovavi, lungamenen̯i mboka mbave litangela etanda.

³ Mbatwa pita etanda lyatjatjili ombatu undapela Kalunga mOmbepo yaKalunga, mbatu litangela muKristus Jesus, nt̯e katu liun̯ikile movipuka vyountu,

⁴ naame wo nandaku tiwa mbe tje liun̯ika movipuka vyountu. Andaa pe na nguma soko okuliun̯ika movipuka vyountu, ame mbe tje soka ovipuka vyountu okupon̯a puye.

⁵ Ame mba pitithwa etanda metango etyapandutatu, ame ndjiMwiisraeli owomeanda lyaBenjamin, Omuheberiheberi, Omufarisai ngundji kambulitha oveta yOvajuda,

⁶ mouvandhi mba tatetha eongalo, mouvyuuki woveta ame hí na tja ombedhi.

⁷ Iya ovipuka mbimba li andji na okunganyana, iya ovipuka mbyoka mena lyaKristus kavi na tjilinga.

⁸ Iinga ovipuka avihe himbe vi yeleke nokwiiwa Kristus Jesus, Muhona wandje, ovipuka avihe mbe vi yetha mena lye, mba tala okutya kavi na tjilinga, okutya ame me nganyana Kristus,

⁹ ame ndji moneke muye, hamouvyuuki wandje womoveta, iya owomeitavelo lyomuKristus, ouvyuuki waKalunga mbwaa kulama meitavelo.

¹⁰ Ame me hala okwiiwa Kristus, nodhonkono dhokwiimuka kwe kout̯e noukumo womatatetho e, nomet̯o lye ndji lithe kuye,

¹¹ ame ndji thike ko keimuko kout̯e.

Ontanto yomukriste

¹² Hakutya mbe tji pewa ae ne mba hwile po. Ame me tji dhamukile, ndji kale natjo, ngaKristus Jesus hiaa nganyana ame.

¹³ Vakwetu, ame omwene hime tya ndji na tjo, iya otjipuka tjimo hime ningi, okudhimba ovipuka vyokon̯ima, ame ndji dhamukile ovyokomeho.

¹⁴ Ame me dhamukile humaku vyuukwa, kondjambi yomeulu, Kalunga ndjee tu ithanena muKristus Jesus.

¹⁵ Iya mbatwa kula mombepo, atuhe ngatu soke hinyahi, andaa mu na otjipuka hitji lili himamu soko, natjo mamu ke tji holololelwa kuKalunga.

¹⁶ Iya ngaile apehe mpatwe ya, ngatu enden̯i mondjila imo.

¹⁷ Vakwetu, ntjolela ndjen̯i, mu tale nawa ovantu mboka mbava enda ngahi twe mu heela.

¹⁸ Iya mbe mu heela tjo ae otwingi, iya otjo me mu heele uke nomihodhi okutya ovantu mboka odhondjedhi dhomutjaakano waKristus.

¹⁹ Ovantu mboka ehulilo lyawo ekeko. Edhimo lyawo olyo li li kalunga kawo. Ohon̯i yawo kuwo etumbalo. Wo va soka vala ovipuka vyokombanda yohi.

²⁰ Iya oukwatjiwan̯a wetu u li meulu, omo matu kevelele Omuhupithi, Muhona Jesus Kristus,

²¹ nguma ka pilulula omalutu etu ngaa kundjuka, e e ninge ngolutu lwe lwetumbalo. Hehi me tji ningi kodhonkono dhe ndhimadhi ulu okutwaa ovipuka avihe kohi yetumino lye.