Ovafilippi 1 - Etestamende Epe Moludhimba

¹ Omukanda hembu mau dhi kwaame Paulus naTimoteus, ovapika vaKristus Jesus. Me sonekele ovadhilikwa vaKalunga avehe womoFilippi, mboka mbava itavela muKristus Jesus, pamo novambisofi novantu vamo mbava popila eongalo.

² Et̯ilonkenda nouwa waKalunga Tate nowaMuhona Jesus Kristus ngau kale nan̯e.

Paulus ma kumbile Ovafilippi

³ Me pandula Kalunga kandje, apehe ambe mu thipaluka,

⁴ oluvedhe aluhe ndji mu kumbila amuhe, ndji kumba nehuluko

⁵ mena lyoukumo wen̯i meteetho lyondaka ombwa okudha ketango lyolutenga katee kundino hendi.

⁶ Ame me liun̯ike okutya ngwaa uta otjilinga otjiwa mun̯e, me tji hwithile po katee ketango lyaKristus Jesus.

⁷ Otjipuka hehi tja mbyuukile oku mu soka amuhe, mena lyokutya nan̯e hemba mbamwa mpopila ndji na n̯e komutima, nomodhonkuto mundji li nahihamba li modhonkuto, hindji popila nokukoleka ondaka ombwa motjilinga himba pewa kuKalunga.

⁸ Iya Kalunga u tji i okutya me popi otjatjili, hime tya mbe mu dhimbaluka nohole yaKristus Jesus.

⁹ Ame unene me kumbu okutya ohole yen̯i i kule unene, amamu koyo ovikoya, koyen̯i nodhondunge ndhaa hwile po,

¹⁰ opo mu tjiiwa okuholowola ovipuka oviwa unene, mu kale katee ketango lyaKristus amwa kohoka, n̯e ahamamu limbilike omuntu nokanunu.

¹¹ Iya mamu yulithwa ovinyango vyouvyuuki muJesus Kristus okutumbaleketha nokuhivilikitha Kalunga.

Okukala nomwenyo okuundapela Kristus

¹² Vakwetu, ame napano me hala mu iwe okutya ovipuka mbimba ningilwa vya popila okutandaveleka ondaka ombwa.

¹³ Iya otjilombo atjihe tjovakwavita womombala novakwawo avehe va iwa okutya mba kambulwa mena lyaKristus.

¹⁴ Odhonkuto dhandje dha etele ovakwetu ovengi muMuhona ouvandhi wokuteetha odhondaka dhaKalunga, háve na owoma.

¹⁵ Iya nandaku tiwa vamo va teetha Kristus nonki nodhombata, vamo va teetha nehalo ewa.

¹⁶ Mbava teetha Kristus kohole, ve tji ninga, mena lyokutya ve tji i okutya ame mba tuwa po okupopila ondaka ombwa.

¹⁷ Iya vamo kava teetha Kristus nawa poluhandja, va hala okundjetela oudheu, tainkolo ndji li modhonkuto.

¹⁸ Iya soka tji na tji? Katji na tjilinga kutya Kristus ma teethwa otjipenye ne ma teethwa otjatjili, ame mbe hulukwa, ye me ke hulukwa uke.

¹⁹ Iya ame ndji tji i okutya mena lyomaalikano en̯i nolyepopilo lyOmbepo yaJesus Kristus, me ka kutuluka.

²⁰ Ekevelelo neliun̯iko lyandje hoolyondi okutya ame híme ka t̯ithwa ohon̯i nokanunu, iya Kristus ma ka tumbalekwa nouvandhi auhe napano naapehe kwaame, kutya omomwenyo ne omet̯o.

²¹ Iya omwenyo wandje oKristus, okut̯a okunganyana.

²² Iya andaa ndji na omwenyo molutu, hehi matji etele ovilinga vyandje ovinyango. Iya himba thele okuholowola hí tji i.

²³ Me n̯in̯ikidhwa kuvali, me hala okudha po ndji kale puKristus, mena lyokutya otjo matji nt̯evelwa unene.

²⁴ Iya okukala nomwenyo kombanda yohi matji hepwa unene mena lyen̯i.

²⁵ Hehi ndji tji i, ndji na eliun̯iko, okutya me kala nomwenyo, me twikile okukala pun̯e amuhe mu kulithwe, n̯e mu hulukilwe meitavelo,

²⁶ opo okulintangela kwen̯i muKristus Jesus ku kale okunene, mena lyokutya me ya uke.

²⁷ Okukala kwen̯i ngaku kale vala akwe thevelwa ondaka ombwa yaKristus, opo andaa mbe ya ko ndji mu mone ne ahe dhile ko, ndji mu tyee amu li mombepo imo, amamu kondjele eitavelo lyondaka ombwa pamo naame.

²⁸ Iya n̯e hámu tilithwa nokanunu kovakondjethi, hehi otjo tji li etangan̯eko kuwo okutya wo mava ka han̯aunwa po, iya n̯e mamu ka hupithwa. Hehi matji ka ningwa kuKalunga.

²⁹ Iya mena lyokutya mwa pewa otjilinga tjokuundapela Kristus, hakumu itavela vala, iya nokutatethwa wo mena lye.

³⁰ Ekondjo ndimu na lyo, lye litha nandimu lwete nandimu yuvite mwaame.