Ovaefeso 6 - Etestamende Epe Moludhimba

Ovanene nodhondele

¹ Dhondele, tyeen̯i kovanene ven̯i ngaMuhona hima hala, mena lyokutya hehi otjo tja vyuuka.

² “Tumbaleka iho nanyoko,” otjitumino hehi tjolutenga tji na eudhiko ndimali tyaa:

³ “opo u kale nelao nomwenyo omule kombanda yohi.”

⁴ Valumentu, hámu yumanetha odhondele dhen̯i, ve tekulen̯i, mu ve longe n̯e mu ve kulithe muMuhona.

Ovapika novahona

⁵ Vapika, tyeen̯i kovahona ven̯i wokombanda yohi nontilo noku ve tumbaleka, tji ningen̯i nomwenyo auhe ngahi mamu ningile Kristus.

⁶ Hámu tji ningi vala mena lyovahona ven̯i ave mu lwete oku ve hulukitha, iya undapen̯i nomwenyo auhe soka himatji hopwa kuKalunga ngovapika vaKristus.

⁷ Undapen̯i ovilinga vyen̯i nehuluko ngambamamu undapele Muhona omwene, havantu.

⁸ Thipaluken̯i okutya Muhona ma ka thuta omuntu auhe ngoka nguma undapa ouwa kutya nee omupika ne onguhe thi omupika.

⁹ Ovahona nan̯e wo ngatjo mu ve ningila, yethen̯i oku ve tilitha. Iya thipaluken̯i okutya n̯e amuhe mu na Muhona wen̯i meulu nguu koyela ovantu avehe hitji lithike.

Omauta omukriste

¹⁰ Iya me mu heele uke, mu likolethele muMuhona nomodhonkono dhe odhonene.

¹¹ Kalen̯i nomauta aehe ngoka Kalunga ngame mu pa, opo mu tjiiwe okuliamena kovineya vyomudiapoli.

¹² Iya nt̯e kaatu kondjetha ovantu, iya matu kondjetha ovatumini novanene, ovanankono vet̯iku hendi lyouye nodhonkono dhombepo ombi movyomeulu.

¹³ Iya kalen̯i nomauta aehe ngoka Kalunga ngame mu pa, etango evi himali ya, mu tjiiwe okuvadhwa amwe lilongekedhele ovipuka avihe.

¹⁴ Kalen̯i amwe lilongekedha, dhalen̯i otjatjili, tji kale omuvya modhondhalelo dhen̯i. Dhalen̯i ouvyuuki, u kale omudhalo wokodhontulo dhen̯i wotjivela woku mu amena.

¹⁵ Okudhala odhongaku otjo tji li okulilongekedha okuteetha ondaka ombwa youwa.

¹⁶ Movipuka avihe kalen̯i notjiyakulilo tjeitavelo, opo mu tjiiwe okudhimitha natjo omidhi mbyaa tema omulilo vyomunauvi.

¹⁷ Tambulen̯i ehupitho li ngale osapeu yotjivela nodhondaka dhaKalunga dhi ngale eonga ndimamu pewa kOmbepo Ondhilikwa.

¹⁸ Hehi tji ningen̯i nomaalikano nokukumba akuhe nokukumba apehe mOmbepo Ondhilikwa, iya kalen̯i amwa pathumuka noutakamethi auhe nokukumbila ovantu ovadhilikwa avehe.

¹⁹ Nkumbila ndjen̯i ndji pewe kuKalunga odhondaka ndhoka ndhimba thele okupopya poluvedhe ndoka, opo ndji popye nouvandhi otjiholekwa hehi tjondaka ombwa.

²⁰ Iya ame ndjimukalelepo wondaka ombwa nandaku tiwa napano ndji li momalyenge. Iya nkumbila ndjen̯i, opo hime teetha ndji popye nouvandhi ngahi mba thele okupopya.

Omaandelo

²¹ Tikikus, omukwetu omuhivilikwa, omuliun̯ikwa motjilinga tjaMuhona, me mu hipululile ovipuka avihe ouhunga naame, opo mu iwe hindji li po, nahime undapa.

²² Iya ame me mu tumu kun̯e mena lyotjipuka hehi, opo mu iwe hitu li po, ye a tendeleke omitima vyen̯i.

²³ Vakwetu, Kalunga Tate naMuhona Jesus Kristus nge mu pe ouwa, ohole neitavelo.

²⁴ Et̯ilonkenda lyaKalunga ngali kale nawo avehe mboka mbave hole Muhona wetu Jesus Kristus, mbave mu hole nohole ndjihai anda.