Ovaefeso 5 - Etestamende Epe Moludhimba

Enden̯i mondjila yaKristus

¹ Iya holelen̯i Kalunga ngodhondele ovahivilikwa.

² Kalen̯i mohole ngaKristus hiee tu hole wo, hiee liyandja poluvedhe lwetu oviyandjwa vyotjali neyambo, ndyaa pepa nawa kuKalunga.

³ Iya ovihulo nokuhakohoka akuhe ne olwiho hávi tumbulwa mo mokati ken̯i, tjo otjo matji thevelwa ovadhilikwa vaKalunga.

⁴ Hatjiwa mu popye ovipuka mbimavi t̯itha ohon̯i nomawoova ne omaudhano omawoova, iya popyen̯i ovipuka vyokutanga Kalunga.

⁵ Iya hehi mu tji i, mwe tji koneka okutya auhe nguu hole ovihulo ne nguha kohokele ne nguu na olwiho, oye a undapela ovikalunga, ke na tja oumpinga motjilongo tjaKristus notjaKalunga.

⁶ Hámu yetha omuntu e mu pukithe nodhondaka dhovithithi. Iya mena lyovipuka hembi ovivi oluyuma lwaKalunga malu ya kovantu mbahava tee.

⁷ Iya hámu lihava oupanga nawo.

⁸ Iya mwa li met̯iku, napano mu li motjiten̯i muMuhona, enden̯i ngodhondele dhotjiten̯i,

⁹ mena lyokutya ouwa auhe nouvyuuki notjatjili otjo tji li ovinyango vyotjiten̯i.

¹⁰ Kondjen̯i okwiiwa soka himatji thevelwa Muhona Kalunga.

¹¹ Hámu kala noupanga novilinga vyet̯iku mbihavi na ovinyango, iya vi eten̯i poluhandja.

¹² Iya okupopya ovipuka mbimava undapa meholamo ohon̯i.

¹³ Ovipuka avihe mbimavi etwa poluhandja kotjiten̯i, mavi moneka.

¹⁴ Iya otjipuka atjihe himatji etwa poluhandja, matji ile otjiten̯i. Ngahi maku tiwaa: “Nguwa lala, imuka po, kulama, dha mo movat̯e, Kristus me ku tungatele.”

¹⁵ Taa tuutuu, himamu kala, hámu kala ngovahima, iya kalen̯i ngovanadhondunge.

¹⁶ Kambulen̯i nawa oluvedhe, mena lyokutya omatango a ile omavi.

¹⁷ Hámu kala ovahima, iya iwen̯i ehalo lyaMuhona.

¹⁸ Hámu pyaluka kovinyu, moka mumu dha eliyetho, iya yulithwen̯i nOmbepo.

¹⁹ Liheelen̯i omapisalomi, omaimbilo noviimbo vyopambepo, imben̯i mu tange Muhona momitima vyen̯i.

²⁰ Iya movipuka avihe pandulen̯i Kalunga Tate, mena lyaMuhona Jesus Kristus

Ovalumentu novakadhintu

²¹ Kalen̯i amamu litee, mu tile Kristus.

²² Vakadhintu, tyeen̯i kovalumentu ven̯i, ngahi mu tyaa muMuhona.

²³ Iya omulumentu oye e li omutwe womukadhintu we ngaKristus hiee li omutwe weongalo nOmuhupithi weongalo, eongalo ndii li olutu lwe.

²⁴ Iya eongalo ngahi mali tee muKristus, iya ovakadhintu nawo wo ngava tyee kovalumentu vawo movipuka avihe.

²⁵ Valumentu kalen̯i amu hole ovakadhintu ven̯i ngaKristus hiee hole eongalo, he liyandja omwene poluvedhe lwalyo,

²⁶ opo e li ninge edhilikwa, e li kohe nomeva ngaa tuwa mumo nodhondaka dhaKalunga,

²⁷ opo a ule oku li kulameka po movipathi vye omwene, li kale eongalo ndyaa koholwa ndihali na tja osilo ne eonya ne otjipuka notjimo, iya li kale edhilikwa ndihali na tja ombedhi.

²⁸ Iya novalumentu ngatjo va kala wo ave hole ovakadhintu wawo nyahoka ngahi ve hole omalutu awo ovene. Nguu hole omukadhintu we, naye u lihole omwene.

²⁹ Kape na omuntu nguu yele olutu lwe omwene, iya u lu palula, he lu tekula, ngaKristus hiaa tekula eongalo lye,

³⁰ mena lyokutya nt̯e tuun̯ipo wolutu lweongalo lye.

³¹ Iya omisonekwa ngahi mavi tyaa: “Omulumentu ma ka thiaa po ina naihe, he ke likuta komukadhintu we, iya hemba vavali mava ile omuntu umo.”

³² Otjiholekwa hehi otjinene, ame ndji tji yuvite okutya matji popi ouhunga naKristus neongalo lye.

³³ Iya omulumentu auhe nga kale ae hole wo omukadhintu we ngahi e lihole omwene, nomukadhintu nga tumbaleke omulumentu we.