Ovaefeso 4 - Etestamende Epe Moludhimba

Oukumo womOmbepo Ondhilikwa

¹ Ame ndjinkwatwa mena lyokutya ndji undapela Muhona, me mu kumbu mu ende ngahi mwa thele okweenda paithano ndimwa ithanenwa,

² mu kale ovalinunupiki novanankenda, ovalikambulithili mohole.

³ Kalen̯i nehalo lyokukaleka po oukumo womOmbepo Ondhilikwa, ouwa u mu kute kumo.

⁴ Pe na olutu lumo nOmbepo imo ngahi pe na eliun̯iko limo ndimwa ithanenwa.

⁵ Muhona yuumo, eitavelo ilimo, etjatjo ilimo,

⁶ Kalunga yuumo, Ihe yovantu avehe, nguu li kombanda yovantu avehe, nguu undapetha ovantu avehe, nguu li movantu avehe.

⁷ Omuntu auhe wa pewa et̯ilonkenda otjali ndyee mu yeleka, Kristus ngahi e mu pa.

⁸ Iya omusonekwa ngahi mau tyaa: “Hiaa londa kombanda, wa twaelela odhonkwatwa odhingi, ye wa yandja otjali kovantu.”

⁹ Iya napano okulonda huka okwatji, andaa nan̯i hahiaa heluka wo, ha i mohi yohi?

¹⁰ Iya ngwaa heluka, oye a londa wo, ha i kokule kombanda yeulu alihe, opo a ule okuhwithila po ovipuka avihe.

¹¹ Kristus oye a twaa po okutya vamo va kale ovayapostoli, vamo ovaprofeti, vamo ovaevaengeliste, vamo ovat̯ita, vamo ovalongethi,

¹² opo ovantu ovadhilikwa va longekedhwe, va kale ava hwile po okuundapa otjilinga tjokupopila okutunga olutu lwaKristus

¹³ katee atuhe matu i moukumo womeitavelo nokwiiwa OmunwaKalunga, tu ile ovantu ovanene, tu kale naa atwa hwile po ngaKristus.

¹⁴ Iya kaatu ngala uke odhondele mbava tjindwa kodhombepo kwalukele dhomalongo nodhomatutu ovantu okulilungametha novineya vyokukemba.

¹⁵ Iya okupopya nawa otjatjili, ngatu kule muye movipuka avihe, Kristus nguu li omutwe.

¹⁶ Muye olutu aluhe lwa tuwa kumo, halu kambulilwa kumo komithipa avihe. Malu kulu, halu litungu mohole, otjin̯ipo atjihe hatji undapa ngahi tja thele okuundapa.

Omwenyo omupe muKristus

¹⁷ Iya hehi me mu heele tjo mena lyaMuhona. Hámu ende uke ngovapaani mbahave liun̯ikile muKalunga, mbava enda mouhima wodhondunge dhawo.

¹⁸ Odhondunge dhawo dha dhiwela, kave na tja omwenyo mboka Kalunga mbwaa yandja mena lyokuhaiwa nokulikukutika omitima vyawo.

¹⁹ Ve liyetha ovene, kave liyungu. Ve litwaa movilinga avihe vyokuhelitjaela movihulo vyolwiho.

²⁰ Iya soka hatjo mwe lilonga ouhunga naKristus.

²¹ Ngahi mwa tyaa ouhunga naKristus, mwa longwa otjatjili hitji li muJesus,

²² lidhulen̯i onkalo ndjimu kala nayo, mu lidhule omuntu omukulu nguu lilundha nolwiho lwokulungamena.

²³ Iya ilen̯i ovape mombepo ndjimai tumine omalipulo en̯i,

²⁴ mu dhale omuntu omupe ngwaa utwa e lithe kuKalunga mouvyuuki nomoudhilikwa watjatjili.

²⁵ Iya yethen̯i ovithithi, omuntu auhe nga heele omukwawo otjatjili, mena lyokutya nt̯e atuhe tuun̯ipo wolutu lwaKristus.

²⁶ Okuyumana mamu yumana, atjaa oluyuma lwen̯i hálu mu twala mokulundha. Hámu yetha etango li hite amu na omadhinge.

²⁷ Hámu pa omudiapoli oluvedhe.

²⁸ Nguu vaka, há vaka uke, nga undape ovipuka oviwa nomawoko e omwene, opo a kale ae na tja okuyandja kovathona.

²⁹ Movinyo vyen̯i hámu dhi odhondaka odhombi, iya ngamu dhe odhondaka odhombwa ndhimadhi tungu nawa, ndhaa nyetetha okuteelelwa.

³⁰ Iya Ombepo Ondhilikwa yaKalunga, hámu i ningitha omutima omuvi, muyo n̯e mwa tuwa otjilimbo tjOmbepo Ondhilikwa katee etango lyeyowoko mali ya.

³¹ Hámu kala nonya, ovinkumba noluyuma, olutangu, okutukana, okulikuminina, nouvi auhe ngau kale kokule nan̯e.

³² Kalen̯i nolweembya nokankenda, ithilen̯i po ovakwen̯i odhonkali dhawo, ngaKalunga wo hiee mu ithila po odhonkali mena lyaKristus.