Ovaefeso 3 - Etestamende Epe Moludhimba

Paulus omuteethi wondaka ombwa mokati kovapaani

¹ Ame Paulus ndjinkwatwa mena lyokutya n̯e ovapaani ndji mu teethela Kristus Jesus,

² ngahi mu tji i okutya mba pewa otjilinga hehi ket̯ilonkenda lyaKalunga ndji tji undape mena lyen̯i.

³ Otjiholekwa hehi mbe tji holololelwa, ngahi mbe tji soneka lukulu pauthupi.

⁴ Iya amwa tanga omukanda hembu, mamu koneke okutya ame ndji yuvite vi otjiholekwa tjaKristus,

⁵ katji heelelwe ovantu womakula amo, iya napano Kalunga we tji holololela ovayapostoli ve ovadhilikwa novaprofeti mOmbepo Ondhilikwa.

⁶ Otjiholekwa hootjohi okutya, ovapaani ve na oumpinga umo nOvajuda. Wo ovin̯ipo vyolutu lumo, ve na oumpinga weudhiko muKristus Jesus okupitila mondaka ombwa.

⁷ Mba ninga omuteethi wondaka ombwa motjali tjet̯ilonkenda lyaKalunga, ndyaa mpa movilinga vyodhonkono dhe.

⁸ Ame ngundji li omununu kovantu ovadhilikwa avehe, mba pewa et̯ilonkenda hendi, ndji teethele ovapaani ouhona waKristus, mbuhau tjiiwa okuthongononwa,

⁹ nokuholololela ovantu avehe otjiholekwa hitja li atja holekwa okudha lukulu, tja li atja holekwa muKalunga, Omuuti wovipuka avihe,

¹⁰ opo ovatumini novanene wovyomeulu va heelwe keongalo ounongo owingi waKalunga,

¹¹ montanto yaapehe ndjaa tanta muKristus Jesus, Muhona wetu.

¹² Muye tu na ouvandhi noluvedhe okuya kuKalunga neliun̯iko meitavelo, okwiitavela muKristus Jesus.

¹³ Iya me mu heele okutya hámu poyola hime ningilwa omaudheu mena lyen̯i, ngoka ngae li etumbalo lyen̯i.

Ohole yaKristus

¹⁴ Iya mena lyotjipuka hehi me twike odhongolo kotjipala tjaIhe yaMuhona wetu Jesus Kristus.

¹⁵ Eanda alihe meulu, nokombanda yohi lya lukilwa muye.

¹⁶ Me kumbu Kalunga, opo e mu pe hitji lithike pouhona wetumbalo lye, a koleke omuntu womomutima nodhonkono dhOmbepo ye,

¹⁷ Kristus opo a kale momitima vyen̯i mena lyeitavelo, mwa twikwa, n̯e mwa twama mohole,

¹⁸ opo mu kale nodhonkono pamo novantu ovadhilikwa avehe okutyaa omutamo noule wopeulu noule wopohi,

¹⁹ mu iwe ohole onene yaKristus, opo mu hwithilwe po mehwilopo alihe lyaKalunga.

²⁰ Kalunga hima undapa ovipuka avihe nodhonkono ndhii li munt̯e kodhonkono ndhoka, ma ulu okuundapa otjingi okupon̯a pusoka himatu kumbu nahimatu lipula.

²¹ Kalunga nga tumbalekwe meongalo nomuKristus Jesus komaluyumuko aehe katee apehe! Amen.