Ovaefeso 2 - Etestamende Epe Moludhimba

Okudha met̯o okuya momwenyo

¹ Lukulu mwa li amwa t̯a mombepo mena lyodhonkali nokuhatyaa kwen̯i.

² Moluvedhe ndoka mwa landulile ondjila ombi youye hembu, noyomutumini wodhonkono dhodhombepo nguu undapa napano movantu mbahava tee Kalunga.

³ Nant̯e wo lukulu atuhe twa endaenda navi mena lyolwiho lwomountu wetu. Twa undapa ehalo lyomountu nolyomodhondunge dhetu. Mountu twa li vala odhondele dholuyuma lwaKalunga ngovantu wo avehe.

⁴ Iya Kalunga omuhona wonkenda mena lyohole ye onene ndjee tu hole nayo.

⁵ Tainkolo nt̯e twa li atwa t̯a pambepo mena lyokuhatyaa kwetu, Kalunga we tu pa omwenyo pamo naKristus. Mwa hupithwa ket̯ilonkenda.

⁶ Kalunga we tu imuna kout̯e pamo naKristus, he tu kaleke pamo naye movyomeulu muKristus Jesus,

⁷ opo moluvedhe ndumalu ya a yulike ouhona wet̯ilonkenda lye mbuhau tjiiwa okuyelekwa nouwa we kunt̯e muKristus Jesus.

⁸ Iya mwa hupithwa ket̯ilonkenda meitavelo. Ehupitho hendi mwe li pewa otjali kuKalunga, kaamu ulu okuliundapela lyo ovene.

⁹ Iya kaatu hupithwa mena lyovilinga vyetu, auhe opo hé litanga.

¹⁰ Kalunga Omuuti wetu, iya moukumo naKristus Jesus, Kalunga we tu uta tu kale atu na ovilinga oviwa monkalamwenyo yetu. Ovilinga mbyoka Kalunga we tu twiila po vyo ae lukulu, tu ende muvyo.

Tuvamo muKristus

¹¹ Iya thipaluken̯i okutya muvapaani pakuyumukwa, mbamu tiwa kamu pitile etanda kOvajuda mbava pita etanda ndyoka ndii undapwa kolutu nomawoko.

¹² Potembu ndjinya hihamwa li naKristus, mwa li ahamu na oukwatjiwan̯a waIsrael, ovantu vaKalunga. Mwa li odhongendi mbahamu li mewaneneno lyeudhiko. Kamwa li neliun̯iko n̯e kamwa li naKalunga mouye.

¹³ Iya napano mu li muKristus Jesus, n̯e mbamwa li owokokule napano mwa ila owopopedhi mena lyombindhi yaKristus.

¹⁴ Iya ye oye e li ouwa wetu, ye aveevali we ve ninga umo. Ekuma lyopokati Kristus we li teya po. Wa teya po ekuma lyokuliyele nolutu lwe omwene.

¹⁵ Wa han̯auna po oveta yOvajuda pamo novitumino nomaheelo ayo, opo Omujuda nomupaani va ile omuntu umo omupe, iya nyahoka wa eta ouwa.

¹⁶ Kristus wa wan̯en̯eka Omujuda nomupaani okupitila met̯o lyokomutjaakano, ye he ve wan̯en̯eke wo naKalunga. Ye wa dhipaa po okuliyele kwawo.

¹⁷ We ya okuteethela ovapaani mbamwa li kokule naKalunga ouwa, nouwa kun̯e Ovajuda mbamwa li popedhi naKalunga.

¹⁸ Iya mena lyaKristus nt̯e atuhe Ovajuda novapaani mOmbepo imo tu na oluvedhe oluwa okuya kuTate.

¹⁹ Iya n̯e kamudhongendi uke ne ovayenda, iya mwa ile ovakwawo wovantu ovadhilikwa nowonganda yaKalunga,

²⁰ mwa tungilwa momut̯inda wovayapostoli nowovaprofeti moka Kristus Jesus omwene mwee li ongundhi yopokati.

²¹ Oye ma kambulile kumo etungo alihe, hali kulu, hali ningi ondjuwo ondhilikwa yaMuhona.

²² Iya muKristus nan̯e wo amuhe mamu tungwa mu ile onganda mumamu kala Ombepo yaKalunga.