Ovaefeso 1 - Etestamende Epe Moludhimba

¹ Omukanda hembu mau dhi kwaame Paulus, omuyapostoli waKristus Jesus kehalo lyaKalunga. Me sonekele ovadhilikwa vaKalunga mbava kala moEfeso, mbava itavela muKristus Jesus.

² Et̯ilonkenda nouwa waKalunga Tate nowaMuhona Jesus Kristus ngau kale nan̯e.

Elao lyopambepo muKristus

³ Kalunga, Ihe yaMuhona wetu Jesus Kristus nga tumbalekwe, ngwee tu pa elao alihe lyopambepo muKristus movyomeulu.

⁴ We tu holowola ae lukulu muKristus, tainkolo héya uta ouye, tu kale ovadhilikwa, ahamatu kala nombedhi kotjipala tje, mena lyokutya Kalunga u tu hole,

⁵ wa tokola ae lukulu oku tu ninga ovana muJesus Kristus. Hehi otjo tja li ontanto ombwa yehalo lye,

⁶ tu hivilike etumbalo lyet̯ilonkenda lye ndyoka ndyee tu pa otjali mOmuhivilikwa we.

⁷ MuKristus tu na eyowoko okupitila mombindhi ye, matji tya eithepo lyodhonkali mouhona wet̯ilonkenda lyaKalunga.

⁸ We tu pa et̯ilonkenda en̯ingi mounongo auhe nomodhondunge adhihe.

⁹ Kalunga we tu ivitha otjiholekwa tjehalo lye montanto ye ombwa, ndjaa panga ompango muKristus.

¹⁰ Ontanto yaKalunga ndjima ka hwithila po potembu ombwa, oku ka eta euto alihe pamo, novyomeulu novyokombanda yohi, Kristus oye ma ka kala omutwe.

¹¹ Iya muKristus Kalunga we tu holowola nant̯e wo tu kale odhompinga dhe, ngahi twa tokolelwa ae lukulu montanto ye. Ovipuka avihe me vi undapa mounongo wehalo lye, opo

¹² nt̯e mbatu li ovatenga okuliun̯ika muKristus tu hivilike etumbalo lyaKalunga.

¹³ Iya mwa tyaa ondaka yatjatjili, ondaka ombwa yehupitho lyen̯i, mwa itavela muKristus, iya Kalunga we mu twaa wo otjilimbo tjOmbepo Ondhilikwa ndjee mu udhikila.

¹⁴ Ombepo Ondhilikwa oyo i li opinyolo youmpinga wetu. Hehi matji tu itaveletha okutya Kalunga ma ka pa ovantu ve eyowoko. Ngatu tumbaleke etumbalo lye.

Ealikano lyaPaulus

¹⁵ Iya ame himba tyaa eitavelo lyen̯i muMuhona Jesus nohole yen̯i yokuhole ovantu ovadhilikwa avehe vaKalunga,

¹⁶ hí nyimine okuyandja ompandu kuKalunga mena lyen̯i noku mu thipaluka momaalikano andje,

¹⁷ nokukumba Kalunga kaMuhona wetu Jesus Kristus, Ihe yetumbalo, opo e mu pe Ombepo younongo noyeholololo okwiiwa Kalunga.

¹⁸ Me kumbu Kalunga a tungatele omeho en̯i omomutima, opo mu iwe eun̯iko ndyoka ndimwa ithanenwa, nouhona wetumbalo lyoumpinga we mpau lithike movantu ve ovadhilikwa,

¹⁹ nounene wodhonkono dhe mpau lithike munt̯e mbatwa itavela. Odhonkono dhatjo ndhoka odho dhi li dho,

²⁰ Kalunga ndhaa undapetha hiaa imuna Kristus kout̯e nahiee mu kaleka kokulyo kwe meulu.

²¹ He mu kaleke kombanda yovatumini avehe, ovanene novanadhonkono novahona, kutya nee aan̯i, hamouye vala hembu, iya nomouye wo mbumau ya.

²² Kalunga ovipuka avihe we vi twaa kohi yodhompadhi dhaKristus, he mu pa a kale omutwe wovipuka avihe vyeongalo.

²³ Eongalo olyo li li olutu lwaKristus ngoka ngwee lihwila po mulyo, ngwaa hwithila po ovipuka avihe apehe.