Mateus 28 - Etestamende Epe Moludhimba

Eimuko lyaJesus kout̯e neliholololo lye

¹ Iya kon̯ima yEsabati, ombimba hiya vete yetango lyolutenga lyotjivike, Maria Magdalena naMaria omukwawo va ya, va ka tale kombila.

² Iya taa tuutuu, pa ningwa eteketo enene lyohi, mena lyokutya omweengeli waMuhona wa dha meulu, he ya po, ha alangatetha po ewe, ye hako a kala.

³ Olupe lwe lwa li amalu ngala olukeno lwombula, nomidhalo vye vya li avya pembana twee, havi ngala odhompawe.

⁴ Iya ovayungi va li amave mu tila, va teketa, hava ngala mbava t̯i.

⁵ Omweengeli wa popitha ovakadhintu ha tyaa: “Hámu tila, mena lyokutya ndji tji i okutya mamu taendha Jesus, ngwaa papelwa komutjaakano.

⁶ Ke mo hemu, mena lyokutya wa imunwa kout̯e, ngahi a popile. Indjen̯i mu tale pompuka mpaa li aa lala po.

⁷ Iya enden̯i, kanyauken̯i ka heelen̯i ovalongwa ve okutya Jesus wa imunwa kout̯e. Iya taa tuutuu, ma ka tenga okuya koGalilea, oko mamu ke mu mona. Taa tuutuu, ame mbe mu heele tjo.”

⁸ Iya pombila va dha po amava kanyauka, va li nowoma nehuluko enene, hava ka heela ovalongwa ve.

⁹ Iya Jesus wa wanena nawo ha tyaa: “Okamenen̯i!” Va hweena kuye, have mu kambula kodhompadhi, have liyongamene kuye.

¹⁰ Jesus we ve heela ha tyaa: “Hámu tila, enden̯i mu ka heele ovakwetu, va ende koGalilea, hoka oko mava ka mbona.”

Ovayungi mava papwa

¹¹ Tainkolo ovakadhintu va li mondjila yawo oku ka heela ovalongwa, ovayungi vamo ve ya kotjitungwalongo, hava hipululile ovayambethi ovanene ovipuka avihe mbyoka mbyaa ningwa ko.

¹² Iya wo va ongana pamo novanene, va tompola, hava papa ovakwavita nodhombongo odhingi,

¹³ hava tyaa: “Tyen̯i, ovalongwa ve ve ya out̯iku, have mu vaka mo, tainkolo twa lala.

¹⁴ Iya andaa tja teeka komutumini, nt̯e matu ke mu hekela, nan̯e matu ke mu itha moudheu.”

¹⁵ Iya va tambula odhombongo, hava ningi ngahi va longwa. Otjipuka hehi tji hipululwa mokati kOvajuda, katee ndino hendi.

Otjitumino tjathiinina tjaJesus

¹⁶ Iya napano ovalongwa omulongo naumo va ya koGalilea kondundu ndjoka Jesus ndjee ve heelele.

¹⁷ Iya hive mu mono, ve liyongamena kuye, vamo va li ava limbililwa.

¹⁸ Jesus we ya kuwo, he ve heele ha tyaa: “Ame mba pewa etumino alihe meulu nokombanda yohi.

¹⁹ Iya enden̯i ka ningen̯i ovantu avehe ovalongwa vandje, mu ve tjatjele mena lyaIhe nolyOmuna nolyOmbepo Ondhilikwa,

²⁰ n̯e mu ve longe okutakametha ovipuka avihe mbimbe mu longa. Iya taa tuutuu, ame ndji li pamo nan̯e omatango aehe katee pehulilo lyouye.”