Mateus 26 - Etestamende Epe Moludhimba

Etompo lyokukambulitha Jesus

¹ Jesus hiaa mana okupopya odhondaka ndhoka adhihe, wa heela ovalongwa ve ha tyaa:

² “Mu tji i okutya kon̯ima yomatango avali ku na Opaasa, Omuna wOmuntu ma ka yandjwa, a ka papelwe komutjaakano.”

³ Iya ovayambethi ovanene novanene wotjiwan̯a va ongana monganda yomuyambethi omunene nguu tiwa oKaifas.

⁴ Va tompola okutya va kambule Jesus movineya, wo ve mu dhipae.

⁵ Va popya hava tyaa: “Hátu tji ningile motjipito, opo hátji eta ovipolokota mokati kovantu.”

Jesus ma vavekwa

⁶ Jesus hiaa li moBetania monganda yaSimon owovilundu,

⁷ omukadhintu umo ngwaa li notjivavelo hitja li nomadhi okalu, we ya kuJesus, he e tile komutwe waJesus, tainkolo a li aa kala pohi pokulya.

⁸ Ovalongwa hive tji mono, va li ava yumana, hava tyaa: “Iya maa yonakele tji nyahika?

⁹ Ngaile a landethelwe po, ngai a eta odhombongo odhingi, dhi yandjwe kovathona.”

¹⁰ Iya Jesus hiee tji mono, we ve heela ha tyaa: “Omukadhintu hengu mamu mu ningithile tji omutima omuvi? Ngunya wa ndjundapele otjilinga otjiwa.

¹¹ Ovathona apehe mamu kala nawo, iya ame híme kala nan̯e apehe.

¹² Iya omukadhintu hengu hiaa tile omadhi henga kolutu lwandje, we tji ningile epako lyandje.

¹³ Me mu heele otjatjili okutya akuhe hoka mouye auhe ondaka ombwa humai ka teethelwa, nahehi wo ye hiaa ningi, matji ka hipululwa, ha thipalukilwa ko.”

Judas ma landetha Jesus

¹⁴ Iya umo owomomulongo navavali nguu tiwa oJudas Iskariot, wa ya kovayambethi ovanene,

¹⁵ ha tyaa: “Mamu mpa tji, andaa mbe mu pa Jesus?” Ve mu pa odhombongo omilongo vitatu dhotjisilveri.

¹⁶ Iya okudha mpoka Judas Iskariot wa li ama taendha okaluvedhe koku mu yandja.

Jesus ma li Opaasa pamo novalongwa ve

¹⁷ Etango lyolutenga lyotjipito tjomingome mbihavi tuwa ontathi, ovalongwa ve ya kuJesus, hava tyaa: “Opi mpamo hala oku ka lila Opaasa, opo tu ke ku longekedhela?”

¹⁸ Ye we ve heela ha tyaa: “Enden̯i kotjitungwalongo komulumentu umo, mu mu heele mu tyee: ‘Omulongethi ma tya otembu yandje ye thiki, me ya okulila Opaasa monganda yoye pamo novalongwa vandje.’ ”

¹⁹ Iya ovalongwa va ninga ngahi va heelwa kuJesus, va longekedha Opaasa.

²⁰ Iya okawiiwii hika wile pohi, Jesus wa kala pohi, hava li novalongwa ve omulongo navavali.

²¹ Iya tainkolo va li amava li, we ve heela ha tyaa: “Ame me mu heele otjatjili okutya umo mun̯e ma ka mbweleleka.”

²² Wo va etetha onkenda unene, hava utu oku mu pula koumo naumo hava tyaa: “Muhona, ame haame ngundhe?”

²³ Jesus we ve yaka ha tyaa: “Umo ngumatu himi naye mombiyona, oye ma ka mbweleleka.

²⁴ Iinga, Omuna wOmuntu ma i, ngahi tja sonekwa ouhunga naye, atjaa utatyei omuntu ngoka nguma ka weleleka Omuna wOmuntu! Omuntu ngoka ngaile ka yumukilwe, ngai hahe.”

²⁵ Judas ngwee ke mu weleleka, we mu pula ha tyaa: “Rabbi, ame haame ngundhe?” Jesus we mu yaka ha tyaa: “Oove, ngahi wa popi.”

Okulya Okudhilikwa maku utwa

²⁶ Hiva li amava li, Jesus wa itha po omungome, ha kumbu, he u nyembula, he u pa ovalongwa ve, ha tyaa: “Tambulen̯i, lyen̯i, hehi olutu lwandje.”

²⁷ Wa itha po otjinwino, ha kumbu, he ve pa tjo, ha tyaa: “Nwen̯i mo amuhe.

²⁸ Hehi ombindhi yandje, ombindhi yewaneneno, ndjimai tilwahi mena lyovengi okwiitha po odhonkali.

²⁹ Me mu heele okutya híme ka nwa uke ovinyu katee etango ndyoka hime ka nwa ovipe motjilongo tjaTate pamo nan̯e.”

³⁰ Iya hiva dhi pokwiimba eimbilo, va ya kOndundu yomiholivi.

Jesus ma londola ovalongwa ve

³¹ Iya Jesus we ve heela ha tyaa: “Otjit̯iku hehi tjandino n̯e amuhe mamu ka ndjetha, mena lyokutya omisonekwa mavi tyaa: ‘Me dhipaa omut̯ita wodhondhu, otjuunda tjodhondhu hatji handjana.’

³² Iya amba imunwa kout̯e, me ke mu tenga koGalilea.”

³³ Petrus wa yaka Jesus ha tyaa: “Nandaku tiwa avehe ve ke ku yetha, ame híme ke ku yetha nokanunu.”

³⁴ Jesus we mu heela ha tyaa: “Me ku heele otjatjili, otjit̯iku tjandino tainkolo onkondombolo háiya popya, ove mo lintendele tutatu.”

³⁵ Petrus we mu yaka ha tyaa: “Nandaku tiwa mba ka t̯a pamo naove, híme ke litendela ove.” Ovalongwa ovakwawo avehe nawo otjo va yaka.

Jesus ma kumbu moGetsemane

³⁶ Iya Jesus we ya novalongwa koluvedhe nduu tiwa oGetsemane. Wa heela ovalongwa ha tyaa: “Kalen̯i pohi hempa, tainkolo ame me i hehunya ndji ka kumbe.”

³⁷ Wa itha po Petrus noomunkwaSebedeus vavali. Wa uta okweetetha onkenda, he ihamenwa.

³⁸ Iya we ve heela ha tyaa: “Omwenyo wandje wa pongo katee ket̯o. Kalen̯i hempa, pathumuken̯i pamo naame.”

³⁹ Wa hweena uke komeho kanunu, ha wile pohi ompupama, ha kumbu, ha tyaa: “Taa, andaa matji tjiiwa otjinwino hehi ngatji mpon̯oke. Iya hangahi me hala, ongahi mo hala.”

⁴⁰ Iya Jesus hiaa tjuna kovalongwa ve, we ve vadha ava lala. Wa pula Petrus ha tyaa: “Iya mwa anyenwa okupathumuka owola imo vala pamo naame?

⁴¹ Pathumuken̯i, mu kumbe, hámu pwile momatyoletho. Ombepo yomuntu mai hala, iya olutu olunkundi.”

⁴² Iya Jesus wa tjuna ko uke otjikando otjityavali, wa kumba ha tyaa: “Taa, andaa kaatji tjiiwa otjinwino hehi tji mpon̯oke, ahame tji nu, ehalo lyoye ngali hwithilwe po.”

⁴³ Iya hiaa tjuna uke, we ve vadha uke ava lala, mena lyokutya va li nolupot̯i momeho.

⁴⁴ Iya we ve thiaa po uke otjikando otjityatatu, ha ka kumba. Iya otjipuka soka otjo a popya uke.

⁴⁵ Iya wa tjuna uke kovalongwa, ha tyaa: “Mu na tjo, mwa lala tuu, mamu thuva? Taa tuutuu, owola ye thiki, Omuna wOmuntu ma yandjwa momawoko ovalundhi.

⁴⁶ Kulamen̯i, tu enden̯i. Taa tuutuu, nguma mbweleleke u li popedhi.”

Jesus ma kambulwa

⁴⁷ Iya taa tuutuu, Jesus tainkolo a li ama popi, Judas, umo owomuhemba omulongo navavali, we ya nengundwa enene lyovantu ndii na omikonda nodhonkunye, va tumwa okudha kovayambethi ovanene nokovanene wotjiwan̯a.

⁴⁸ Omuweleleki wa vadhwa ae ve n̯anga onyala, ha tyaa: “Ngume hupita, oye e li ye, mu kambulen̯i.”

⁴⁹ Judas wa ya kuJesus dhivadhiva, ha tyaa: “Rabbi, iyaa!” We mu hupita.

⁵⁰ Iya Jesus we mu yaka ha tyaa: “Ove, ninga hiwa endele.” Tjau, mbenya have mu yumbu omawoko, have mu kambula.

⁵¹ Iya umo owomumboka mbava li naJesus, wa pweya mo omukonda we, ha tono nawo omupika womuyambethi omunene, he mu kopola okutwi.

⁵² Jesus we mu heela ha tyaa: “Tjun̯a mo omukonda woye motjilalo. Iya avehe mbamava dhipaa nomukonda, mava ka t̯a komukonda.

⁵³ Ne mo soko okutya ame híme ulu okwiithana Tate, a ntumine ovaengeli mbava pon̯a ovilombo omulongo navivali?

⁵⁴ Iya omisonekwa ngai mavi hwithilwa po vi, mbimavi tya hehi tja thele okuningwa?”

⁵⁵ Iya powola ndjoka Jesus wa heela engundwa lyovantu ha tyaa: “Mwe ya nomaonga nodhonkunye ngambamamu kambula otjimpulu? Omatango aehe ndji kala motempeli, ndji longa ovantu, n̯e kamu nkambula.

⁵⁶ Iya hehi atjihe matji ningwa okutya omisonekwa vyovaprofeti opo vi hwithilwe po.” Iya ovalongwa avehe ve mu thiaa po, hava ka inkola.

Jesus kovipala vyovanene

⁵⁷ Mboka mbava kambula Jesus, ve mu twala komuyambethi omunene Kaifas, hukwa li akwa onganene ovalongiveta novanene.

⁵⁸ Petrus we mu landula, ae li kon̯ima kokule, we ya katee monganda yomuyambethi omunene. Wa hita monganda, ha kala pohi povayungi wonganda, a mone atjaa himatji ningwa.

⁵⁹ Ovayambethi ovanene nOtjoongi atjihe tjovanene va li amava taendha oumbangi wovithithi, opo ve tjiiwe okudhipaa Jesus,

⁶⁰ atjaa kave u mwene, nandaku tiwa pa li odhombangi odhingi dhovithithi. Iya kon̯ima pe ke ya odhombangi mbali dhovithithi,

⁶¹ hadhi tyaa: “Omuntu hengu wa tile: ‘Ame me ulu okuhan̯auna po otempeli yaKalunga, he i tungulula moule womatango atatu.’ ”

⁶² Iya omuyambethi omunene wa kulama, ha pula Jesus ha tyaa: “Koo yaka ovantu mbaka mbamave ku popi?”

⁶³ Iya Jesus wa nyima vala. Omuyambethi omunene we mu heela ha tyaa: “Me ku anetha Kalunga omunamwenyo. Tu heela andaa oove Messias OmunwaKalunga.”

⁶⁴ Jesus we mu yaka ha tyaa: “Iinga, otjo ngahi wa popi. Iya ame me mu heele ame tyaa: ‘Okudha ndino mamu ka mona Omuna wOmuntu, aa kala pohi kokulyo kOmunadhonkono, ame ya kombanda yomakaka okeulu.’ ”

⁶⁵ Iya omuyambethi omunene wa taula omidhalo vye, ha tyaa: “Wa penye Kalunga. Twa hepa uke odhombangi dhatji? Taa tuutuu, napano epenyo lye mwe li tee.

⁶⁶ Mamu tya vi?” Iya ve mu yaka hava tyaa: “U na onkali yokut̯a.”

⁶⁷ Iya ve mu tjakela omate motjipala, have mu tono nodhongonyo. Vamo ve mu tona nomapi,

⁶⁸ hava tyaa: “Messias, thimbila u tu heele okutya aan̯i ngwee ku tono.”

Petrus me litendele Jesus

⁶⁹ Napano Petrus wa li aa kala pohi pontanga yonganda. Puye pe ya omukadhona umo, ha tyaa: “Naove wa li pamo naJesus Omugalilea.”

⁷⁰ Iya we litendela movipathi vyovantu avehe, ha tyaa: “Ame himo popi, hí tji i.”

⁷¹ Iya hiaa li ama piti mo, aa vyuuka kotjivelo, omukadhona umo we mu mona, ha heele ovantu mbava li mpoka ha tyaa: “Omuntu hengu wa li pamo naJesus Omunasareta.”

⁷² Petrus wa ana, he litendele uke, ha tyaa: “Omulumentu hengu hí mu i.”

⁷³ Kon̯ima yokaluvedhe mbava li ava kulama mpoka, ve ya kuPetrus hava tyaa: “Naove wo oove umo owomuwo, mena lyokutya nelaka lyoye lye ku hololola.”

⁷⁴ Iya wa uta okulithinga, ha ana ha tyaa: “Omulumentu hengu, hí mu i.” Iya dhivadhiva onkondombolo ya popya.

⁷⁵ Iya Petrus wa thipaluka odhondaka dhaJesus ndhaa popya ha tyaa: “Onkondombolo tainkolo háiya popya, ove mo lintendele tutatu.” Iya wa pita pondje ama lili unene.