Mateus 25 - Etestamende Epe Moludhimba

Ovathukona omulongo wongendjo

¹ “Iya otjilongo tjeulu tji ngala ovathukona omulongo wongendjo mbava itha odholamba dhawo, hava i va ka wanene nomukupi.

² Vatano owomuwo va li ovahima, vatano va li ovanongo.

³ Iya ovahima va tjinda odholamba dhawo, wo ahamava tjindi ovipuka vyomahooli.

⁴ Iya ovanongo va tjinda ovipuka vyomahooli nodholamba dhawo.

⁵ Napano omukupi wa kala ko, ovathukona wongendjo avehe va uta okunyekuka, hava lala.

⁶ “Mokati kovit̯iku kwa wololokwa haku tiwaa: ‘Omukupi we ya, enden̯i mu ka wanene naye.’

⁷ Ovathukona wongendjo avehe va imuka po, hava ningi nawa odholamba dhawo.

⁸ Iya ovahima va heela ovanongo hava tyaa: ‘Tu pen̯i mo wo momahooli en̯i, mena lyokutya odholamba dhetu madhi dhimi.’

⁹ Ovanongo ve ve yaka hava tyaa: ‘Mpaeli kaae tu hulu, nt̯e nan̯e, enden̯i mu ke lilandele kovalandethi.’

¹⁰ Iya hiva i, va ka lande, omukupi we ya. Mboka mbava vadhwa ave lilongekedha, va hita mo pamo naye motjipito tjolukupo, omuvelo hau yedhilwa.

¹¹ “Iya kon̯ima ovathukona ovakwawo wo wongendjo ve ya, hava tyaa: ‘Muhona, Muhona, tu yelula!’

¹² “Iya we ve yaka ha tyaa: ‘Otjatjili me mu heele okutya ame hí mu i.’

¹³ “Iya pathumuken̯i, mena lyokutya etango nowola kamu i i.

Eeli lyodhombongo

¹⁴ “Iya matji ka ngala omulumentu ngwaa ya kovilongo, wa ithana ovapika ve, he ve thiile emona lye.

¹⁵ Umo we mu pa odhombongo dhotjingoldo omayovi atano, nomukwawo yaavali, nomutyatatu ilimo, omuntu auhe wa pewa hitja yeleke podhonkono dhe, dhivadhiva ye ha ka valula.

¹⁶ Iya ngwaa pelwe atano, wa ya dhiva, he dhi ndingosa, ha mono mo omakwawo atano.

¹⁷ Nomukwawo ngwaa pelwe avali, wa ndingosa mo omakwawo avali.

¹⁸ Iya ngwaa pelwe limo, wa ya, ha tha otjitoto pohi, ha thithilile po odhombongo dhomuhona we.

¹⁹ “Iya hipa piti olule, omuhona wovapika wa tjuna, ha hava pamo nawo otjihavelo tjovitalenti.

²⁰ Iya ngwaa pelwe ovitalenti vitano we ya, ha eta ovikwawo vitano, ha tyaa: ‘Muhona, ove wa mpele ovitalenti vitano. Ame mba ndingosa ovitalenti ovikwawo vitano.’

²¹ Iya omuhona we we mu yaka ha tyaa: ‘Iiya, oove omupika omuwa omuliun̯ikwa. Wa li omuliun̯ikwa movipuka ovinunu, me ku pa u tumine ovipuka ovingi. Enda mehuluko lyomuhona woye.’

²² “Nahengu wo ngwaa pelwe ovitalenti vivali, we ya, ha tyaa: ‘Muhona, ove wa mpele ovitalenti vivali, taa tuutuu, ame mba nganyana mo ovikwawo vivali.’

²³ “Omuhona we we mu yaka ha tyaa: ‘Iiya, oove omupika omuwa omuliun̯ikwa. Ove wa li omuliun̯ikwa movipuka ovinunu, me ku pa okutumina ovipuka ovingi. Enda mehuluko lyomuhona woye.’

²⁴ “Iya ngwaa pelwe otjitalenti tjimo, we ya wo, ha tyaa: ‘Muhona, ame ndji ku i okutya oove omulumentu omukukutu, u teya mpaho kunine, u ongedha mpaho twiile ombuto.

²⁵ Iya ame mba tila, mba ya, he thithilile pohi otjitalenti tjoye. Taa tuutuu, tji tambula otjoye!’

²⁶ “Iya omuhona we we mu yaka ha tyaa: ‘Mupika ove omuvi wondende! Iya u ndji i okutya ndji teya mpahe kunine, ndji ongedha mpahe twiile ombuto?

²⁷ Wa thele okuyandja odhombongo dhandje kovandingosi, hime tjuna ndji vadhe adha nganyana.

²⁸ Iya mu nyeken̯i otjitalenti, n̯e mu tji pe nguu na omulongo.

²⁹ Iya nguu na tja, ma pewa, ha kala ae na otjingi unene. Iya nguhe na tja, nahiee na tjo, me tji nyekwa.

³⁰ Iya omupika hengu omuvi, mu yumben̯i met̯iku pondje, moka mumamu ka kala otjililo nelikweyo lyomayoo.’

Ekoyo lyathiinina

³¹ “Iya Omuna wOmuntu hime ya metumbalo lye novaengeli ve avehe, ma ka kala pohi kotjipunditumino tjetumbalo lye.

³² Oviwan̯a avihe mavi ongedhwa kotjipala tje, ha pungu ovantu movakwawo, ngomut̯ita hiaa punga odhondhu modhonkombo.

³³ Odhondhu u dhi ameka kokulyo kwe, nodhonkombo okokumbinda kwe.

³⁴ Iya ohamba mai heele owokokulyo kwe hai tyaa: ‘N̯e ovapewa velao vaTate, indjen̯i mu ka pingane otjilongo tjaKalunga himwa longekedhelwa okudha keuto lyouye.

³⁵ Iya ame mba t̯ile ondjala, n̯e mwa mpele ovikulya. Mba t̯ile onyota, mwa mpele okunwa. Mba li ongendi, mwa mpele omulalo.

³⁶ Mba li nyahinya, mwa mpele omudhalo. Mba velele, mwe dhile okuntala po. Mba li mokaliwoso, mwe dhile okuntala.’

³⁷ “Iya ovavyuuki mave mu yaka hava tyaa: ‘Muhona, onalun̯i twe ku mwene awa t̯a ondjala, nt̯e hatu ku pa ovikulya ne mpa wa t̯ile onyota, hatu ku pa okunwa?

³⁸ Onalun̯i twe ku mwene ongendi, hatu ku pa omulalo, ne au li nyahinya, hatu ku pa omudhalo?

³⁹ Onalun̯i twe ku mwene amo vele ne au li mokaliwoso, hatu ya kwoove?’

⁴⁰ “Iya ohamba mai ve yaka hai tyaa: ‘Otjatjili me mu heele okutya avihe hembi mbimwa ningila umo owomovakwetu ovanunu, aame mwe vi ningila.’

⁴¹ “Iya mai heele wo mboka owokokumbinda kwayo hai tyaa: ‘Dhen̯i po pwaame, n̯e ovathingwa, enden̯i momulilo waapehe mbwaa undapelwa omudiapoli novaengeli ve.

⁴² Iya ame mba t̯ile ondjala, n̯e kamu mpele ovikulya. Mba t̯ile onyota, n̯e kamu mpele okunwa.

⁴³ Mba li ongendi, n̯e kamu mpele omulalo, mba li nyahinya kamu mpele omudhalo. Mba velele, mba li mokaliwoso, atjaa n̯e kamu dhile okuntala.’

⁴⁴ “Iya mboka mave mu yaka wo hava tyaa: ‘Muhona, onalun̯i twe ku mwene awa t̯a ondjala ne onyota ne au li ongendi ne au li nyahinya ne amo vele ne au li mokaliwoso, atjaa ahamatu ku popile?’

⁴⁵ Iya me ve yaka ha tyaa: ‘Otjatjili me mu heele okutya atjihe soka hihamu ningilile umo owomovanunu, naame kamu tji ndingilile.’

⁴⁶ Iya mboka mava i moluyuma lwaapehe, ovavyuuki mava i momwenyo waapehe.”