Mateus 24 - Etestamende Epe Moludhimba

Jesus ma popi ehan̯auno lyotempeli

¹ Jesus wa dha mo motempeli, ha i. Ovalongwa ve ve ya kuye oku mu yulikila omatungo otempeli.

² Iya we ve pula ha tyaa: “Ovipuka hembi avihe kamu vi lwete? Otjatjili me mu heele okutya hempa kaape ke thiwa ewe ndyaa tendekwa kekwawo, háli kumuninwe po.”

Omatangan̯eko ehulilo lyouye

³ Jesus hiaa li aa kala pohi kOndundu yomiholivi, ovalongwa ve ve ya kuye, have mu pula pokampengi hava tyaa: “Tu heela okutya ovipuka hembi mavi ka ningwa nalun̯i, netangan̯eko lyokuya kwoye nolyehulilo lyouye olin̯i?”

⁴ Jesus we ve yaka ha tyaa: “Lungamen̯i, hámu pukithwa komuntu noumo.

⁵ Iya ovantu ovengi mave ke ya nena lyandje, wo have lityaa: ‘Aame Messias,’ iya mava ka pukitha ovantu ovengi.

⁶ Iya mamu ka tyaa ovita nomipopyo ouhunga novita. Talen̯i, hámu tilithwa. Ovipuka hembi vi tha okuningwa, atjaa ehulilo kaliye ya.

⁷ Otjiwan̯a matji ka lwitha otjiwan̯a otjikwawo, notjilongo matji ka lwitha otjilongo otjikwawo. Maku ke ya ondjala, nohi mai ka teketa pomaluvedhe nomaluvedhe.

⁸ Ovipuka hembi avihe omautilo oudheu ngedhimo amali kweya.

⁹ “Iya ovantu mave ke mu yandja mu tatethwe, n̯e mu dhipawe. Mamu ka kala amu yelwe koviwan̯a avihe mena lyandje.

¹⁰ Iya ovengi mava ka yetha eitavelo, mave ke liweleleka, wo hava ka kala ave liyele.

¹¹ Iya maku ya ovaprofeti wovithithi ovengi, iya mava ka pukitha ovengi.

¹² Iya mena lyokutya ouvi mau ka kala owingi, ovengi kaava ka kala ave lihole.

¹³ Iya ngume likambulithile katee pehulilo, ma ka hupithwa.

¹⁴ Iya ondaka hendji ombwa yotjilongo tjaKalunga mai ka teethelwa ouye auhe, i ningile oviwan̯a avihe oumbangi, tjau atjaa haku ya ehulilo.

Ovipo vyehan̯auno

¹⁵ “Iya andaa mwa mono ovipo vyehan̯auno, mbyaa popiwa komuprofeti Daniel, avi li poluvedhe oludhilikwa, (omutangi nga tangan̯eke).

¹⁶ Iya mboka mbave li moJudea, ngava inkolele kodhondundu.

¹⁷ Nguma vadhwa kombanda yondjuwo, há heluka, a ka pitile ovipuka vye mondjuwo,

¹⁸ nangwaa vadhwa motjana, há tjuna monganda a ka pitile mo omudhalo we.

¹⁹ Utatyei ovat̯imba novamwali pomatango ngoka!

²⁰ Iya kumben̯i okutya okwiinkola kwen̯i ahamaku ningwa pompepela ne metango lyEsabati.

²¹ Iya pomatango ngoka maku ka kala ovihuna ovinene mbihavya li ko okudha komautilo ouye katee napano, vyo kaavi ka kala ko uke.

²² Ngaile omatango ngoka kaa ningilwe omathupi, ngai kape na tja omuntu nguma hupithwa. Iya mena lyovaholowolwa omatango ngoka maa ningwa omathupi.

²³ “Iya andaa pe na ngume mu heele ha tyaa: ‘Taa tuutuu, Messias hooyongu’ ne ‘Hooyongunya’, hámu itavele.

²⁴ Iya maku ke ya oomessias wovithithi novaprofeti wovithithi, mava ka ninga omatangan̯eko omanene novilingakumithi, va pukithe, andaa matji tjiiwa, novaholowolwa wo.

²⁵ Taa tuutuu, mba tenge oku mu heela tjo.

²⁶ “Iya andaa mave mu heele hava tyaa: ‘Taa tuutuu, u li moluhandja,’ hámu i mo. Andaa mava tyaa: ‘Taa tuutuu, u li mondjuwo,’ hámu itavele.

²⁷ Iya ngolukeno hilu kena koutjilo, halu moneka katee koutokelo, nokuya kwOmuna wOmuntu otjo maku ka kala.

²⁸ “Iya huku na omutuntu, oko ku onganena odhonkuvi.

Okuya kwOmuna wOmuntu

²⁹ “Iya dhivadhiva kon̯ima yovihuna vyomatango ngoka, etango mali ka dhiwela, nomwedhi kaau ke liten̯a po, odhonyothi madhi ka wa ko keulu, nodhonkono dhomeulu madhi ka teketethwa.

³⁰ Iya etangan̯eko lyOmuna wOmuntu mali ka moneka keulu, noviwan̯a avihe vyokombanda yohi mavi ka kwaa. Iya mavi ka mona Omuna wOmuntu ame ya kombanda yomakaka okeulu, ae na odhonkono netumbalo enene.

³¹ Iya ma ka tuma ovaengeli ve nonkwino ndjii popya unene, mava ka ongedha ovaholowolwa ve kodhontyo ne dhouye, okudha mpapa hulila eulu katee kontyo onkwawo.

Eeli lyomukuyu

³² “Iya lilongen̯i omaeli komukuyu. Ovitho avya tauka, havi eta oluhapo, kalen̯i amu tji i okutya ovintola vi li popedhi.

³³ Iya nan̯e wo amamu mono ovipuka hembi avihe, iwen̯i okutya otembu ye ya popedhi, pomuvelo.

³⁴ Me mu heele otjatjili, ekula hendi kaali hulu, tainkolo ovipuka hembi avihe háviya ningwa.

³⁵ Eulu nohi mavi hulu, iya odhondaka dhandje kaadhi hulu.

Etango nowola yokutjuna kwOmuna wOmuntu

³⁶ “Iya etango ne owola ndjoka kape na nguu i i, novaengeli meulu ne Omuna, kakele vala kaTate aika.

³⁷ Iya ngahi tja li pomatango aNoa, otjo matji ka kala pokuya kwOmuna wOmuntu.

³⁸ Iya ovantu ngahi va li pomatango ngoka ngaa tenga ethundja tainkolo háliye ya, va nwa, va kupa, wo va kupitha katee etango ndyoka Noa a hita mondjuwowato.

³⁹ Iya wo kava li ave tji i, katee ethundja lye ya, hali ve han̯auna po avehe, iya otjo matji ka kala pokuya kwOmuna wOmuntu.

⁴⁰ Ovalumentu vavali mava ka vadhwa motjana, umo ma ithwa po, omukwawo he thiwa po.

⁴¹ Ovakadhintu vavali mava ka vadhwa potjin̯i amava tu, umo ma ithwa po, omukwawo he thiwa po.

⁴² “Iya pathumuken̯i, mena lyokutya kamu tji i okutya Muhona wen̯i me ya etango patji.

⁴³ Iya kalen̯i amu tji i okutya ngaile omwene wonganda u tji i okutya otjimpulu matji ya powola patji, ngai ma kala aa pathumuka, onganda ye ahamai teywa.

⁴⁴ Iya nan̯e wo kalen̯i amwe lilongekedha, mena lyokutya Omuna wOmuntu me ya powola ndjihamamu mu kevelele.

Omupika omuliun̯ikwa

⁴⁵ “Iya aan̯i omupika omuliun̯ikwa nguu na odhondunge ngwaa pewa okuyunga ovapika wonganda yomuhona we, e ve pe odhondya powola yokulya?

⁴⁶ Omupika omunalao onguma vadhwa ama undapa hinyahi, omuhona we hime ya.

⁴⁷ Otjatjili me mu heele okutya ye me mu twaa po a yunge ovipuka vye avihe.

⁴⁸ Iya omupika andaa omuvi, me lipopile momutima we ha tyaa: ‘Omuhona wandje kee ya dhiva,’

⁴⁹ iya ha utu okutona ovapika ovakwawo, ye ha utu okulya nokunwa pamo nodhonkolwe,

⁵⁰ omuhona womupika ngoka me ya etango ndyoka ndihame mu kevelele, nowola ndjoka ndjihe i.

⁵¹ Omuhona we me mu kapaula, he mu yekelehi, ye he mu pa ondjambi imo novalinomi. Hoka oko maku ka kala otjililo nelikweyo lyomayoo.