Mateus 22 - Etestamende Epe Moludhimba

Eeli lyotjipito otjolukupo

¹ Iya Jesus we ve heela uke omaeli ha tyaa:

² “Otjilongo tjeulu tji ngala ohamba ndjaa ningila omuna omudhantu otjipito tjolukupo.

³ Ohamba ya tuma ovapika vayo oku ka ithana ovakongwa, ve ye kotjipito tjolukupo. Iya mbenya kava li amava hala okuya.

⁴ Ohamba ya tuma ko uke ovapika vamo, hai tyaa: ‘Ka heelen̯i ovakongwa okutya ame mba longekedha otjipito, odhondumentu nodhontandona dhandje ndhaa n̯ina dha dhipawa. Iya ovipuka avihe vya longekedhwa, indjen̯i kolukupo.’

⁵ Iya kava li ave na ko natja, va dha po, umo wa ya kotjana tje, omukwawo wa ka tjingitha ovipuka vye.

⁶ Mbave thiwa po va kambula ovapika wohamba, ve ve tatetha, have ve dhipaa.

⁷ Iya ohamba ya li aya yumana, hai tumu ko ovakwavita vayo. Ya han̯auna po ovadhipai mboka, notjitungwalongo tjawo ye tji hika po.

⁸ Iya ya heela ovapika vayo hai tyaa: ‘Otjipito tjolukupo tja pu okulongekedhwa, atjaa ovakongwa katji ve thevelelwe.

⁹ Enden̯i komawaneneno omivanda, auhe ngumamu mono, mu kongen̯i kotjipito tjolukupo.’

¹⁰ Ovapika mboka va ya kodhondjila, hava ongo omuntu auhe nguva mono, omuwa nomuvi. Iya otjipito tjolukupo tje yulile ovayenda.

¹¹ “Ohamba hiye ya okutala ovayenda himava li, ya mona mo umo nguhaa li nomudhalo wotjipito tjolukupo.

¹² Ohamba ye mu heela hai tyaa: ‘Ove, we ya mo vi hemu, ove aho na tja omudhalo wotjipito?’ Omuyenda wa li vala aa nyimi.

¹³ Iya ya heela ovantu vayo hai tyaa: ‘Mu kuten̯i komawoko nokomakulu, n̯e mu mu yumbe kotjila met̯iku, moka mumamu ka kala otjililo nelikweyo lyomayoo!’

¹⁴ “Iya ovengi va ithanwa, atjaa mbava holowolwa ovanunu.”

Okuyandja elilimo komukesari

¹⁵ Iya Ovafarisai va pita mo, va ka tompole okutya mave tjiiwa vi okutela Jesus modhondaka.

¹⁶ Iya ve mu tumina ovalongwa vawo pamo namboka mbava ama kuHerodes, hava tyaa: “Mulongethi, tu tji i okutya oove owatjatjili, ove u longa ondjila yaKalunga otjatjili, ku na tja nomuntu, mena lyokutya ove ku tala otjipala tjomuntu.

¹⁷ Iya tu heela okutya ove mo tya vi? Tja vyuuka tuu okuyandja elilimo komukesari ne katji vyuukile?”

¹⁸ Iya Jesus hiaa iwa ovineya vyawo, we ve heela ha tyaa: “Valinomi n̯e, omena lyatji mamu hala okundola?

¹⁹ Ndjulikila ndjen̯i ombongo yelilimo!”

²⁰ Iya Jesus we ve pula ha tyaa: “Ethano nesoneko hendi ndii li ko, olyaan̯i?”

²¹ Wo ve mu yaka hava tyaa: “Olyomukesari.” Iya Jesus we ve heela ha tyaa: “Ovipuka vyomukesari vi pen̯i omukesari, ovyaKalunga vi pen̯i Kalunga.”

²² Iya hive tji tee, va li ave kumwa, have mu thii po, hava i.

Olukupo peimuko kout̯e

²³ Etango ndyoka Ovasadukai, mboka mbava tya kaku na tja eimuko kout̯e, ve ya kuJesus, have mu pula,

²⁴ hava tyaa: “Mulongethi, Moses we tu heela okutyaa: ‘Andaa omulumentu wa t̯i, atjaa ahama thii po odhondele, omukulwe ne omunitje nga kupe omuhepe womukulwe ne womunitje, e mu yumukile oluyumuko.’

²⁵ Iya punt̯e pa li ovalumentu ovalilanduli epanduvali. Owolutenga wa kupile, ha t̯i, ahama thii po oluyumuko, iya omuhepe wa kupwa komunitje.

²⁶ Otjo tja ningwa wo komutyavali nomutyatatu katee naa avehe epanduvali va pu po.

²⁷ Iya omuhepe wa ka t̯a kon̯ima.

²⁸ Iya peimuko kout̯e, ma ka kala omukadhintu waan̯i, mena lyokutya avehe epanduvali ve mu kupile?”

²⁹ Jesus we ve heela ha tyaa: “Mwa puka, mena lyokutya omisonekwa kamu vi i, nodhonkono dhaKalunga kamu dhi i.

³⁰ Iya peimuko kout̯e, kaava ka kupa, wo kaava ka kupwa, iya mava ka ngala ovaengeli meulu.

³¹ Iya kombinga yeimuko kout̯e lyovat̯e, kamu tangele nan̯i odhondaka ndhimwa heelwa kuKalunga, hiaa popya ha tyaa:

³² ‘Aame Kalunga kaAbraham naKalunga kaIsak naKalunga kaJakob?’ Ye háKalunga kovat̯e, iya okovanamwenyo.”

³³ Ovantu hive tji tee, ve kuminwa elongo lye.

Otjitumino otjinene

³⁴ Iya Ovafarisai hiva tee okutya Jesus wa yaka Ovasadukai, Ovasadukai hava nyimi, Ovafarisai va ongana pamo.

³⁵ Omulongiveta umo owomuwo wa lola Jesus, he mu pula ha tyaa:

³⁶ “Mulongethi, otjitumino otjinene moveta otjin̯i?”

³⁷ Jesus we mu yaka ha tyaa: “ ‘Kala au hole Muhona Kalunga koye komutima woye auhe nokomwenyo woye auhe nokodhondunge dhoye adhihe.’

³⁸ Hehi otjo tji li otjitumino otjinene tjolutenga.

³⁹ Notjityavali hitji lithike pusoka, hootjohi himatji tyaa: ‘Kala au hole omukwen̯i ngahi u lihole omwene.’

⁴⁰ Oveta aihe novaprofeti ya kambulilwa movitumino hembi vivali.”

Kristus omunwaan̯i?

⁴¹ Iya Ovafarisai tainkolo va vadhwa ava ongana, Jesus we ve pula ha tyaa:

⁴² “Mamu tya vi ouhunga naMessias? Omunwaan̯i?” Ve mu yaka hava tyaa: “OmunwaDavid.”

⁴³ Jesus we ve heela ha tyaa: “Iya nan̯i ovi David hiaa viyulwa kOmbepo, he mu ithana ‘Muhona’? Wa popya ha tyaa:

⁴⁴ ‘Muhona wa heela Muhona wandje ha tyaa: Kala pohi kokulyo kwandje katee me twaa odhondjedhi dhoye kohi yodhompadhi dhoye.’

⁴⁵ Iya andaa David me mu ithana ‘Muhona,’ iya ma ile vi uke omuna?”

⁴⁶ Kape na tja ngwaa li ama ulu okuyaka Jesus. Iya okudha ketango ndyoka, kapa li noumo ngwaa li ama hala oku mu pula uke omapulo.