Mateus 20 - Etestamende Epe Moludhimba

Ovaundapi motjuundo tjomivinyu

¹ “Otjilongo tjeulu tji ngala omulumentu ngwaa pita omuhuka, a ka taendhe ovaundapi womotjuundo tje.

² Ve liitavela novaundapi, e ve thute ondenari metango limo. We ve tuma kotjuundo tje tjomivinyu.

³ Pomoovi womuhuka wa ya komalandethelo, hamono ovantu mbava kulama vala, háve na himava ningi.

⁴ We ve heela ha tyaa: ‘Nan̯e wo enden̯i kotjuundo tjandje tjomivinyu, me mu thutu hitje mu yeleke.’

⁵ Iya wo va ya. Wa ya uke powola omulongo nambali nopontyatatu, ha ningi ngahi a ombo aa ningi.

⁶ Iya powola ontyatano wa pita mo, ha mono ovantu mbava kulama. We ve heela ha tyaa: ‘Iya omena lyatji mwa kulama vala hempa etango alihe, hámu na himamu undapa?’

⁷ Ve mu yaka hava tyaa: ‘Kape na ngwee tu kongo.’ Ye we ve heela ha tyaa: ‘Nan̯e wo enden̯i kotjuundo tjandje tjomivinyu.’

⁸ “Iya okawiiwii hika wile pohi, omwene wotjuundo wa heela omuntu we, omuviyuli, ha tyaa: ‘Ithana ovaundapi, u ve pe othuto, uta nambave ya kon̯ima katee kumbave ya olutenga.’

⁹ Iya mbave ya pontano, hive ya, va pewa auhe ondenari imo.

¹⁰ Iya mboka owolutenga hive ya, va li amava tya pamo mava pewa otjingi okupon̯a ovakwawo, iya auhe wa pewa wo ondenari imo.

¹¹ Iya hive dhi pewa, va ngongotela omulumentu ngoka,

¹² hava tyaa: ‘Ovantu mbava undapa owola imo, mbave ya kon̯ima, owo mo yeleke nant̯e mbatwa yuhala amatu undapa etango alihe momutenya mbwaa pupyala.’

¹³ “Iya wa yaka umo owomuwo ha tyaa: ‘Mukwetu, ame hí ku ningile ovineya. Nan̯i katu popile ondenari imo.

¹⁴ Itha po ondenari yoye, enda. Nguka ngwee ya kon̯ima, omwene aame me mu pa ngahi mbe ku pa wo.

¹⁵ Ne nan̯i mba tjaelwa okuundapa ovipuka vyandje ngahi me hala? Ne u na onki, mena lyokutya ame ndjimuntu omuwa?’

¹⁶ “Iya owokon̯ima mava ka kala komeho, nowokomeho mava ka kala owokon̯ima, mena lyokutya ovaithanwa ovengi, ovaholowolwa ovanunu.”

Jesus ma popi otjikando otjityatatu ouhunga net̯o lye

¹⁷ Jesus hiaa li ama i kombanda koJerusalem, wa itha po ovalongwa omulongo navavali, ve ke likalele. Mondjila we ve heela ha tyaa:

¹⁸ “Taa tuutuu, matu i kombanda koJerusalem, Omuna wOmuntu ma ka yandjwa momawoko ovayambethi ovanene novalongiveta, mave ke mu koyela et̯o.

¹⁹ Mave ke mu yandja momawoko ovapaani, a penywe, a tonwe, a papelwe komutjaakano. Iya etango etyatatu ma ka imunwa kout̯e.”

Okukumba kwaina yoomunkwaSebedeus

²⁰ Iya ina yoomunkwaSebedeus we ya novana ovalumentu kuJesus. Wa twika odhongolo, he mu kumbu, e mu ningile tja.

²¹ Jesus we mu pula ha tyaa: “Mo hala tji?” We mu yaka ha tyaa: “Itavela ovanwandje hemba vavali, va ka kale pohi, umo okokulyo kwoye, umo okokumbinda kwoye, motjilongo tjoye.”

²² Jesus we ve yaka ha tyaa: “N̯e himamu kumbu, kamu tji i. Otjinwino hime ka nwa, mamu ulu oku ke tji nwa?” Ve mu yaka hava tyaa: “Matu tji ulu.”

²³ We ve yaka ha tyaa: “Andaa otjinwino tjandje mamu tji ulu, iya okukala pohi kokulyo ne kokumbinda kwandje, haame me ku yandja, maku ka yandjwa kumbave ku longekedhelwa kuTate.”

²⁴ Iya omulongo hive tji tee, va yumaneka ovalilanduli mboka vavali.

²⁵ Jesus wa ithanena ovalongwa ve pamo, he ve heele ha tyaa: “Mu tji i okutya ovatumini woviwan̯a ve vi tumina, novanene vavyo ve vi tumina nodhonkono dhawo.

²⁶ Iya mokati ken̯i hámu kala nyahoka. Iya mokati ken̯i nguma hala a kale omunene, nge mu undapele.

²⁷ Iya mokati ken̯i nguma hala a kale omunakomeho, nga kale omupika wen̯i,

²⁸ nOmuna wOmuntu ke dhile okuundapelwa, iya okuundapa nokuyandja omwenyo we, u ninge ondjowo yovantu ovengi.”

Ovapot̯i vavali

²⁹ Iya Jesus novalongwa ve hiva dhi moJeriko, owingi wovantu we mu landula.

³⁰ Ovapot̯i vavali va li ava kala pohi pontyo yondjila, hiva tee Jesus hima ende po, va wololoka hava tyaa: “Muhona, MunwaDavid, tu t̯ila onkenda!”

³¹ Iya owingi wovantu we ve anda, va nyime, iya mbenya va kambulitha vala okuwololoka, hava tyaa: “Muhona, MunwaDavid, tu t̯ila onkenda!”

³² Iya Jesus wa kulama, he ve ithana ha tyaa: “Mamu hala ndji mu ningile tji?”

³³ Ve mu yaka hava tyaa: “Muhona, matu hala tu twikululwe.”

³⁴ Iya Jesus we ve etethela mo onkenda, ha t̯in̯i omeho awo, dhivadhiva va twikuluka, hava landula Jesus.