Mateus 15 - Etestamende Epe Moludhimba

Jesus ma tangunitha ovalinomi

¹ Iya okudha mpoka Ovafarisai vamo novalongiveta va dha koJerusalem, have ya kuJesus hava tyaa:

² “Iya omena lyatji ovalongwa woye va lundha odhonteto dhowoihe nowoina? Kave likoho komawoko amava li.”

³ We ve yaka ha tyaa: “Iya n̯e omena lyatji hámu kambulitha otjitumino tjaKalunga, himu kambulitha odhonteto dhen̯i ovene?

⁴ Iya Kalunga wa popya ha tyaa: ‘Tumbaleka iho nanyoko. Nguma popi navi ihe ne ina, nga dhipawe.’

⁵ Iya n̯e mu tyaa: ‘Nguma heele ihe ne ina ha tyaa: Himbe tje ku popila natjo, mbe tji pa Kalunga.’

⁶ Iya omuntu ngoka kaa tumbaleke uke ihe ne ina. Iya mwa pedhula odhondaka dhaKalunga mena lyodhonteto dhen̯i.

⁷ Valinomi n̯e! Omuprofeti Jesaja we mu heela nawa hiaa popya ha tyaa:

⁸ ‘Ovantu hemba va ntumbaleka vala novinyo, atjaa omitima vyawo vi li kokule naame.

⁹ Va ndjundapela vala nyahinya, mena lyokutya va longetha omalongo odhonteto dhovantu.’ ”

Ovipuka mbii lundha omuntu

¹⁰ Jesus wa ithana owingi wovantu, he u heele ha tyaa: “Nteelela ndjen̯i, mu koneke.

¹¹ Otjipuka hitji ya motjinyo, hatjo tji lundha omuntu, iya otjipuka hitji dha motjinyo, otjo tji lundha omuntu.”

¹² Ovalongwa ve ya kuJesus, hava tyaa: “U tji i okutya Ovafarisai hiva tee odhondaka ndhoka, va ningi omitima omivi?”

¹³ Jesus we ve yaka ha tyaa: “Ontwika aihe, Tate owomeulu ndjiha twikile, mai ka tukulwa mo.

¹⁴ Mboka ve yethen̯i, ovaviyuli ovapot̯i wovapot̯i. Andaa omupot̯i ma koko omupot̯i omukwawo kempangoti, aveevali mava wile metoto.”

¹⁵ Iya Petrus we mu heela ha tyaa: “Tu thitululila eeli hendi.”

¹⁶ Iya Jesus we ve pula ha tyaa: “Nan̯i nan̯e wo tuu kamu yuvite?

¹⁷ Kamu tji i okutya otjipuka atjihe hitji ya motjinyo, tji ya medhimo, hatji piti mo?

¹⁸ Iya ovipuka mbyoka mbii dha motjinyo, vi dha komutima, iya mbyoka ovyo vi lundha omuntu.

¹⁹ Iya komutima oko ku dha omalipulo omavi okudhipaa, okulivaka, okuhula, oumpulu, okulikuminina nokulipenya.

²⁰ Ovipuka hembi ovyo vi lundha omuntu, iya okulya nomawoko ngahaa kohelwe, katji lundha omuntu.”

Eitavelo lyomukadhintu Omukanana

²¹ Iya Jesus wa dha ko hoka, ha i kovit̯indwalongo vyaTiro naSidon.

²² Iya kovit̯indwalongo vyatjo hoka kwa dha omukadhintu Omukanana, wa wololoka ha tyaa: “Muhona, MunwaDavid, nt̯ila ndje onkenda! Omunwandje omukadhona ma tatethwa navi kondemoni.”

²³ Iya Jesus ke mu yakele nokanunu. Iya ovalongwa ve ve ya kuye, have mu pula hava tyaa: “Mu lekela, a ende, me tu uyile.”

²⁴ Jesus we ve yaka ha tyaa: “Ame mba tumwa vala kodhondhu ndhaa keka dhonganda yaIsrael.”

²⁵ Iya omukadhintu we ya, ha twike odhongolo kotjipala tjaJesus, ha tyaa: “Muhona, mpopila ndje!”

²⁶ Ye we mu yaka ha tyaa: “Katji li nawa okwiitha po otjithima tjodhondele, ho tji yumbile odhombwa.”

²⁷ Iya we mu heela ha tyaa: “Muhona, iinga, iya nodhombwa dhi lya ounyai mbumau u kovitaafula vyovahona vadho.”

²⁸ Okudha mpoka Jesus we mu yaka ha tyaa: “O, eitavelo lyoye enene. Ningilwa ngahi mo hala.” Iya omukadhona we okudha powola yatjo ndjoka wa veluka.

Jesus ma velula ovavedhi ovengi

²⁹ Iya Jesus hiaa dhi hoka, wa ya kelunga lyaGalilea. Wa londa kondundu, hako a ka kala pohi.

³⁰ Engundwa enene lyovantu lye ya kuye, hali mu etele ovingolomena novilema novapot̯i nodhompolo novakwawo ovengi, have ve laleke po podhompadhi dhe, ye he ve velula.

³¹ Iya owingi wovantu we kumwa, hiwa mona odhompolo himadhi tee, novingolomena hivya veluka, novilema himavi ende, novapot̯i hiva twikuluka. Iya va hiva Kalunga kaIsrael.

Jesus ma kutitha ovalumentu omayovi ane

³² Jesus wa ithana ovalongwa ve, ha tyaa: “Ame ovantu hemba mbe ve etethele mo onkenda, mena lyokutya va ningi omatango atatu pwaame, wo háve na himava li. Iya ame híme hala ndji ve lekele nondjala, mava ka thothaunukila mondjila.”

³³ Ovalongwa ve mu heela hava tyaa: “Ovikulya mbimavi kutitha engundwa ndii lithike hempa, matu vi vadha pi mokuti hemu kwanyahinya?”

³⁴ Jesus we ve pula ha tyaa: “Mu na po omingome vingapi?” Ve mu yaka hava tyaa: “Epanduvali nouhi oununu.”

³⁵ Wa heela owingi wovantu u kale pohi.

³⁶ Iya wa itha po omingome mbyoka epanduvali nodhohi. Iya hiaa pandula, we vi nyembula, he vi pa ovalongwa, ovalongwa have vi pa owingi wovantu.

³⁷ Ovantu avehe va lya, have kuta. Ovalongwa kon̯ima va ongedha ovinyembu mbyoka mbyaa hupu po, have yulitha odhombwe epanduvali.

³⁸ Ovalumentu mboka mbava lya, va li omayovi ane, ovakadhintu nodhondele kava havelwe.

³⁹ Jesus hiaa lekele owingi wovantu, wa londa mowato, ha i kotjit̯indwalongo tjaMagadan.