Mateus 14 - Etestamende Epe Moludhimba

Johannes Omutjatji ma dhipawa

¹ Iya potembu ndjoka Herodes, omutumini wotjityane tjotjilongo, wa tyaa etumbuko lyaJesus.

² Iya wa heela ovantu ve ha tyaa: “Omuntu hengu oJohannes Omutjatji, oye a imunwa kout̯e, iya odhonkono hendhi odho madhi undapa muye.”

³ Iya Herodes wa kambulithile Johannes, he mu kutu, he mu yedhilile mokaliwoso mena lyaHerodias, omukadhintu womunitje, Filippus,

⁴ mena lyokutya Johannes we mu heela ha tyaa: “Tji huna okukupa omukadhintu womunitjoye.”

⁵ Iya Herodes nandaku tiwa wa li ama hala okudhipaa Johannes, wa li ama tila owingi wovantu, mena lyokutya ovantu va itavela okutya Johannes omuprofeti.

⁶ Motjipito tjokuthipaluka okuyumukwa kwaHerodes, omuna omukadhona waHerodias we ve dhanena po, iya tje hulukitha Herodes,

⁷ Herodes hinde mu udhikile eano, e mu pe atjihe hima hala.

⁸ Iya omukadhona wa popya ngahi a nyongotolelwa kwiina ha tyaa: “Mpa ndje napano omutwe waJohannes Omutjatji melonga.”

⁹ Ohamba nandaku tiwa ya pongele, mena lyokwaana kwayo nolyovayenda vayo, ya tya omukadhona nge u pewe.

¹⁰ Iya ya tuma okuteta ko omutwe waJohannes mokaliwoso.

¹¹ Iya omutwe we wa etwa melonga, hau pewa omukadhona, omukadhona he u twala kwiina.

¹² Iya ovalongwa vaJohannes ve ya, hava itha po otjivimbi tje, have mu paka. Iya va ya, have tji hipululile Jesus.

Jesus ma kutitha ovalumentu omayovi atano

¹³ Jesus hiee tji tee wa dha po nowato, ha i aika kompuka hukwe likalela. Owingi wovantu wa dha kodhondolopa, hau mu landula pohi.

¹⁴ Iya Jesus hiee thiki kontyo, wa mona owingi wovantu. Ye wa li ae ve etethele mo onkenda, ha velula ovavedhi vawo.

¹⁵ Iya okawiiwii hika wile pohi, ovalongwa ve ve ya kuye hava tyaa: “Pompuka hempa opokuti kwanyahinya, netango lya hiti. Lekela owingi wovantu, u ende koulongo, opo ve ke lilandele ovikulya.”

¹⁶ Iya Jesus we ve yaka ha tyaa: “Kaava hepa okuya, ve pen̯i va lye.”

¹⁷ Ve mu heela hava tyaa: “Nt̯e hempa katu na hitu na tjo, tu na po vala omingome vitano nodhohi mbali.”

¹⁸ Jesus we ve heela ha tyaa: “Vi eten̯i huno kwaame.”

¹⁹ Iya wa heela owingi wovantu u kale pohi mehodhi. Iya wa itha po omingome mbyoka vitano nodhohi ndhoka mbali, ha tala peulu, ha pandula. Ye wa nyembula omingome, he vi pa ovalongwa, ovalongwa have vi pa owingi wovantu.

²⁰ Wo avehe va lya, have kuta. Ovalongwa va ongedha ovinyembu mbyaa hupu po, odhombwe omulongo nambali hadhi yula.

²¹ Iya mbava lya, va li ovalumentu omayovi atano, ovakadhintu nodhondele kava havelwe.

Jesus ma ende kombanda yomeva

²² Iya Jesus wa ulumithile dhivadhiva ovalongwa ve, va ka londe mowato, va tenge tjikoohehinya tjelunga, tainkolo ye ma lekele owingi wovantu.

²³ Iya hiaa lekele owingi wovantu, wa londa kondundu aika oku ka kumba. Okawiiwii hika wile pohi, Jesus wa li ko aika hoka.

²⁴ Iya owato wa vadhwa awa i kokule okudha kontyo. Iya owato wa tonwa komakuthikuthi, mena lyokutya ombepo ye u tona motjipala.

²⁵ Momahuka Jesus we ya kuwo, ama ende kombanda yomeva.

²⁶ Iya ovalongwa hive mu mono ama ende kombanda yomeva, va tila, hava tyaa: “Otjilulu!” Iya va kwaa mena lyowoma.

²⁷ Iya Jesus we ve popitha dhivadhiva ha tyaa: “Koleken̯i, hámu tila, aame!”

²⁸ Iya Petrus we mu yaka ha tyaa: “Muhona, ntjeela ndje, andaa oove tjatjili, ndji ende kombanda yomeva, ndji ye kwoove.”

²⁹ Jesus we mu heela ha tyaa: “Indjo!” Petrus wa dha mo mowato, ha ende kombanda yomeva, he ya kuJesus.

³⁰ Hiaa mono ombepo onene, wa li aa tila, ha utu okuhita, wa kwaa ha tyaa: “Muhona, ntjupitha ndje!”

³¹ Jesus wa vyuukitha okuwoko kwe dhivadhiva, he mu kambula, ha tyaa: “Muntu ove wokaitavelo okanunu, wa limbililwa tji?”

³² Iya wo hiva londa mowato, ombepo hai nyimi.

³³ Ovantu mbava vadhwa mowato, ve mu tumbaleka hava tyaa: “Otjatjili ove uMunwaKalunga.”

Jesus ma velula ovavedhi

³⁴ Jesus novalongwa ve hiva yauka, ve ya koGenesaret.

³⁵ Iya ovantu wopompuka mpoka hiva dhimbuka Jesus, va tuma elaka motjit̯indwalongo soka atjihe. Wo va eta ovavedhi vawo avehe kuJesus.

³⁶ Ve mu kumba, opo ovavedhi va t̯in̯e vala nandaku tiwa okovilyo vyomudhalo we. Iya avehe mboka mbave mu t̯in̯a, va veluka.