Mateus 10 - Etestamende Epe Moludhimba

Ovayapostoli omulongo navavali

¹ Jesus wa ithana ovalongwa ve omulongo navavali, he ve pa odhonkono okuta mo odhombepo odhombi, nokuvelula omutjithi auhe nouvela auhe.

² Iya omana ovayapostoli omulongo navavali hoonga: Omutenga oSimon nguu tiwa oPetrus, nomunitje Andreas, oJakob yaSebedeus nomunitje Johannes,

³ oFilippus naBartolomeus, oTomas naMateus omuthendelethi, oJakob yaAlfeus naTaddeus,

⁴ oSimon Omukanana naJudas Iskariot, ngoka wo ngwee mu weleleka.

Jesus ma tumu ovayapostoli

⁵ Jesus wa tuma hemba omulongo navavali, ha tyaa: “Hámu i kovapaani, n̯e hámu hiti mondolopa yOvasamaria.

⁶ Iya enden̯i kodhondhu ndhaa keka dhonganda yaIsrael.

⁷ Iya apehe mpamamu ende, ve heelen̯i mu tyee: ‘Otjilongo tjeulu tji li popedhi.’

⁸ Velulen̯i ovavedhi, imunen̯i ovat̯e kout̯e, pangen̯i owovilundu, ten̯i mo odhondemoni. Mwa pewa otjali, nan̯e yandjen̯i otjali.

⁹ Hámu i novipapo vyodhombongo dhotjingoldo nodhotjisilveri ne dhotjivela otjindumbu,

¹⁰ handjato yomondjila, havikutu vivali ne odhongaku, hatjisawa. Iya omuundapi wa thele okupewa hima li.

¹¹ “Amwe ya mondolopa ne mokalongo kongandi, pulen̯i okutya aan̯i ngwee liun̯ikwa moka. Iya ngamo mu kala moka katee mamu dhi mo.

¹² Iya amwe ya monganda, tyen̯i ouwa ngau kale nawo.

¹³ Onganda ndjoka andaa i tji i okuliun̯ikwa, ouwa wen̯i ngau kale mo. Iya andaa kai tji i okuliun̯ikwa, ouwa wen̯i ngau tjune nan̯e.

¹⁴ Andaa pe na ngoka nguhame mu tambula ne nguhama teelele odhondaka dhen̯i, monganda moka ne mondolopa moka dhen̯i mo, n̯e mu lipupule ombuma kodhompadhi dhen̯i.

¹⁵ Ame me mu heele otjatjili okutya otjilongo tjaSodom notjaGomorra mavi ka kala hahe okupon̯a ondolopa ndjoka metango lyekoyo.

Ovalongwa mava ka tewatewa

¹⁶ “Taa tuutuu, ame me mu tumu ngodhondhu mokati komaungu. Iya kalen̯i amwa lungama ngodhonyoka, kalen̯i ovawa ngodhonguti.

¹⁷ Lungamenen̯i ovantu, mave ke mu yandja kovyoongi vyovanene, have ke mu tonena modhosinagoga dhawo nodhosokoti.

¹⁸ Iya mena lyokutya muvalongwa vandje mave ke mu twala kovatumini nokodhohamba, mu ninge odhombangi dhokuntjipulula kuwo nokoviwan̯a.

¹⁹ Iya himave ke mu yandja kovatumini, hámu kala notjiho okutya mamu tya vi ne mamu popi vi, mena lyokutya mamu ka pewa powola yatjo ndjoka soka himwa thele okupopya.

²⁰ Han̯e mamu popi, iya Ombepo yaIho oyo mai popi mun̯e.

²¹ “Ovalilanduli mava ka yandja ovakwawo, va dhipawe, naihe ma ka yandja ondele ye. Odhondele mava ka kondjetha ovanene vawo, have ve dhipaetha.

²² Mamu ka kala amu yelwe kovantu avehe mena lyandje. Iya ngume likambulithile katee pehulilo, ma ka hupithwa.

²³ Iya andaa mave ke mu taata mondolopa imo, dhilukilen̯i kwiimo. Me mu heele otjatjili, odhondolopa dhomuIsrael kaamu ke dhi mana ko katee Omuna wOmuntu me ya.

²⁴ “Omulongwa ka pon̯ene omulongethi we, ye omupika ka pon̯ene omuhona we.

²⁵ Tji li nawa omulongwa okukala ngomulongethi we, nomupika okukala ngomuhona we. Andaa omwene wonganda mave mu ithana Belsebul, iya unene tuu ovantu wonganda ye otjo mava ithanwa.

Aan̯i ngwaa thele okutilwa

²⁶ “Iya hámu tila ovantu, mena lyokutya kaku na tja hitja t̯imikwa, hihamatji ka holololwa, ko kaku na tja soka hitja holekwa, hihamatji ka kala atji iwe.

²⁷ Himbe mu heela met̯iku, tji popyen̯i poluhandja. Himwa nyongotolelwa pokutwi, tji popilen̯i pokati kovantu.

²⁸ Hámu tila mboka mbamava dhipaa olutu, wo hámava ulu okudhipaa omwenyo. Iya tilen̯i nguma ulu okuhan̯aunina moheli avyeevali, omwenyo nolutu.

²⁹ Odhontjo mbali kadhi landethwa epeni limo? Iya kape na tja noimo ndjimai wile pohi, Iho andaa kaa hala.

³⁰ Iya nodhondjutji dhokomitwe vyen̯i adhihe dha hawa.

³¹ Iya hámu tila, n̯e mwa valela okupon̯a odhontjo odhingi.

Okuhipulula nokulitendela Kristus

³² “Iya auhe ngoka nguma ntjipulula movipathi vyovantu, naame wo me ke mu hipulula puTate nguu li meulu.

³³ Iya ngoka ngume lintendele movipathi vyovantu, naame me wo me ke litendela ye puTate nguu li meulu.

Hauwa, iya omukonda

³⁴ “Hámu lipula okutya ame mba eta ouwa kombanda yohi, hí etele ouwa, iya mba eta omukonda.

³⁵ Iya mbe ya okuhongaetha omuna omudhantu a kondjethe ihe, omuna omukadhona a kondjethe ina, omunaivi a kondjethe inaivi.

³⁶ Ovantu womonganda yomuntu ngoka mava kala odhondjedhi dhe.

³⁷ “Ngoka nguu hole ihe ne ina okupon̯a pwaame, kee nt̯evelwa. Nangoka nguu hole omuna omudhantu ne omuna omukadhona okupon̯a pwaame, kee nt̯evelwa.

³⁸ Iya nguhama tjindi omutjaakano we, ye ahama ndandula, kee nt̯evelwa.

³⁹ Ngoka nguma kondjele omwenyo we, me u keketha, nguma keketha omwenyo we mena lyandje, me ke u mona.

Ondjambi

⁴⁰ “Ngoka ngume mu tambula, naye ma ntambula, nguma ntambula, naye ma tambula ngoka ngwaa ntuma.

⁴¹ Ngoka nguma tambula omuprofeti mena lyokutya omuprofeti, ma mono ondjambi yomuprofeti. Nguma tambula omuvyuuki mena lyokutya omuvyuuki, ma mono ondjambi yomuvyuuki.

⁴² Auhe ngoka nguma pa umo owomovantu hemba ovanunu okunwa oneka yomeva ngaa tende, mena lyokutya omulongwa wandje, me mu heele otjatjili okutya kaa kala háma mono ondjambi ye.”