Mateus 1 - Etestamende Epe Moludhimba

Owoiheombwale yaJesus

¹ Hembu omukanda womana owoiheombwale yaJesus Kristus, oluyumuko lwaDavid, oluyumuko lwaAbraham.

² Abraham wa yumuka Isak, Isak wa yumuka Jakob, Jakob wa yumuka Juda novanitje novakulwe ovalumentu.

³ Iya Juda wa yumuka Fares naSera, we ve yumuka naTamar, Fares wa yumuka Hesron, Hesron wa yumuka Aram.

⁴ Iya Aram wa yumuka Aminadab, Aminadab wa yumuka Naason, Naason wa yumuka Salmon.

⁵ Iya Salmon wa yumuka Boas, we mu yumuka naRahab, Boas wa yumuka Obed, we mu yumuka naRut, Obed wa yumuka Isai.

⁶ Iya Isai wa yumuka ohamba David. Iya David wa yumuka Salomo, we mu yumuka nomukadhintu waUria.

⁷ Iya Salomo wa yumuka Rehabeam, Rehabeam wa yumuka Abia, Abia wa yumuka Asa.

⁸ Iya Asa wa yumuka Josafat, Josafat wa yumuka Joram, Joram wa yumuka Usia.

⁹ Iya Usia wa yumuka Jotam, Jotam wa yumuka Ahas, Ahas wa yumuka Hiskia.

¹⁰ Iya Hiskia wa yumuka Manasse, Manasse wa yumuka Amos, Amos wa yumuka Josia.

¹¹ Iya Josia wa yumuka Jekonia novanitje potembu yokutwalwa moupika koBabilon.

¹² Iya kon̯ima yokutwalwa moupika koBabilon, Jekonia wa yumuka Salatiel, Salatiel wa yumuka Serubabel.

¹³ Iya Serubabel wa yumuka Abiud, Abiud wa yumuka Eliakim, Eliakim wa yumuka Asor.

¹⁴ Iya Asor wa yumuka Sadok, Sadok wa yumuka Akim, Akim wa yumuka Eliud.

¹⁵ Iya Eliud wa yumuka Eleasar, Eleasar wa yumuka Matan, Matan wa yumuka Jakob.

¹⁶ Iya Jakob wa yumuka Josef, omulumentu waMaria, Maria wa yumuka Jesus nguu tiwa oMessias.

¹⁷ Iya omakula aehe okudha kuAbraham katee kuDavid, omulongo naane, okudha uke kuDavid katee hiva twalwa moupika koBabilon, omulongo naane, okudha uke hiva twalwa moupika koBabilon katee kuMessias, omulongo naane.

Okuyumukwa kwOmuhupithi, nena lye

¹⁸ Okuyumukwa kwaJesus Kristus kwa li hinyahi: Maria, ina yaJesus, wa nepelwe olukupo kuJosef, iya tainkolo háveya kala pamo, Maria wa moneka okutya omut̯imba wOmbepo Ondhilikwa.

¹⁹ Iya omulumentu we Josef, ngwaa li omulumentu omuvyuuki, hiaa li ahama hala oku mu t̯itha ohon̯i, wa soka oku mu yala meholamo.

²⁰ Iya Josef tainkolo wa li ama soko nyahi, omweengeli waMuhona we liholololela ye mondjodhi, ha tyaa: “Josef, ntekulona yaDavid, hó tila okweeta Maria a ile omukadhintu woye, mena lyokutya out̯imba hembu mbwee na wo owOmbepo Ondhilikwa.

²¹ Iya Maria ma ka yumuka omudhantu, mo ke mu luka Jesus, mena lyokutya ye ma ka hupitha ovantu ve modhonkali dhawo.”

²² Iya hehi atjihe tja ningwa, opo tji hwithilwe po soka Muhona hiaa popitha omuprofeti ha tyaa:

²³ “Taa tuutuu, omuthukona wongendjo ma ka ila omut̯imba, iya ma ka yumuka omudhantu, ena lye mave ke mu luka Immanuel,” mali tyaa: “Kalunga pamo nant̯e.”

²⁴ Iya Josef hiaa imuka po molupot̯i, wa ninga ngahi a heelwa komweengeli waMuhona. Iya wa ka eta omukadhintu we.

²⁵ Iya ye ke mu t̯in̯ine katee Maria a yumuka omudhantu. Josef we mu luka Jesus.