Markus 9 - Etestamende Epe Moludhimba

¹ Jesus we ve heela ha tyaa: “Ame me mu heele otjatjili okutya pe na vamo muhemba mbava kulama hempa, mbahamava lolo et̯o, tainkolo háveya mona otjilongo tjaKalunga amatji ya nodhonkono dhatjo.”

Jesus ma laimithwa

² Iya kon̯ima yomatango epandu Jesus wa itha po Petrus naJakob naJohannes, he ve twala kondundu onde, ve ke likalele. Olupe lwe lwa lunduluka movipathi vyawo,

³ omidhalo vye vya pembana, havi laima. Kombanda yohi kaku natja nguma ulu oku vi ninga ovipembadhi nyahoka.

⁴ Iya ve liholololelwa kuElia naMoses, hava popi naJesus.

⁵ Petrus wa heela Jesus ha tyaa: “Rabbi, hempa pe tu thevelwa okukala. Ngatu tunge po omasase atatu, limo olyoye, limo olyaMoses nalimo olyaElia.”

⁶ Iya Petrus kaa li ae tji i soka hima popi, mena lyokutya va li ava tila.

⁷ Iya pe ya ekaka, hali ve tjikile. Mekaka mwa dha ondaka hai tyaa: “Nguka Omunwandje omuhivilikwa, mu tyeen̯i.”

⁸ Dhivadhiva va kevauka, atjaa kava mwene po omuntu noumo, kakele vala kaJesus nguva li naye.

⁹ Iya hiva li amava heluka kondundu, Jesus we ve ilikin̯a atjihe soka hiva mono, opo háve tji hipululile omuntu noumo, tainkolo Omuna wOmuntu héya imunwa kout̯e.

¹⁰ Odhondaka ndhika ve dhi takametha, wo va kala amave lipula hava tyaa: “Okwiimuka kout̯e matji tya vi?”

¹¹ Wo ve mu pula hava tyaa: “Omena lyatji ovalongiveta hiva tya, Elia oye a thele okuya olutenga?”

¹² Jesus we ve yaka ha tyaa: “Iinga, Elia oye ma tenge okuya, ha twaa ovipuka avihe pomalukalo; iya nan̯i ovi, Omuna wOmuntu nguma popiwa momisonekwa okutya u tha okutatethwa nokutombwa?

¹³ Iya me mu heele okutya Elia we ya, have mu ningi ngahi mava hala, ngahi a popiwa momisonekwa.”

Jesus ma velula omudhantu ngwaa li novintonya

¹⁴ Iya hiva tjuna kovalongwa, va mona owingi wovantu awe ve twaa molunkombo, novalongiveta amave ve tetha ombata.

¹⁵ Ovantu avehe hiva mono Jesus, ve kumwa, iya ve mu dhamukila, have mu popitha.

¹⁶ Ye we ve pula ha tyaa: “Mamu litetha tji ombata?”

¹⁷ Iya umo owomowingi wovantu we mu yaka ha tyaa: “Mulongethi, mba eta kwoove omunwandje omudhantu nguu na ombepo ndjee mu pata ondaka.

¹⁸ Aye mu kambula, i mu sata pohi, ha tumbu ondutu, he likweya omayoo, ha pumbuka. Iya mba heele ovalongwa woye, ve i te mo, atjaa va anyenwa.”

¹⁹ Iya we ve yaka ha tyaa: “O, kula n̯e mbahamu na tja eitavelo, me kala nan̯e katee nalun̯i? Me kala ame likambulithile n̯e katee nalun̯i? Mu eten̯i kwaame.”

²⁰ Wo ve mu eta kuye. Hiaa mono Jesus, ombepo ye mu pukutidha, he lisata pohi, ha alangata, ha dhi etutu motjinyo.

²¹ Ye wa pula ihe ha tyaa: “Otjipuka hehi tje mu uta nalun̯i?” Ye we mu heela ha tyaa: “Okudha koulele we.

²² Otwingi i mu yundulila momulilo nomomeva, i mu dhipae. Iya ove andaa mo tji ulu, tu t̯ila onkenda, u tu popile.”

²³ Jesus we ve heela ha tyaa: “Wa tya, andaa me tji ulu? Atjihe tji tjiiwa okuningilwa ngoka ngwaa itavela.”

²⁴ Dhivadhiva ihe yondele wa yaya ha tyaa: “Mba itavele, mpopila ndje nguhe na tja eitavelo.”

²⁵ Iya Jesus hiaa mono owingi wovantu mbwee ya amau dhamuka, wa anda ombepo ombi, he i heele ha tyaa: “Mbepo ove ombi nguu ya momuntu ahama popi, ye ahama tee, me ku heele okutya pita mo, ove hó i mo uke muye.”

²⁶ Iya ya yaya, hai mu pukutidha, hai dhi mo. Iya ye wa li a ambuka, ovengi hava tya, wa t̯i.

²⁷ Jesus we mu yaka mokuwoko, he mu yele, ye ha kulama.

²⁸ Iya hiee ya monganda, tainkolo va li po aveika ovalongwa ve ve mu pula hava tyaa: “Omena lyatji twa anyenwa oku i ta mo?”

²⁹ Iya ye we ve heela ha tyaa: “Ombepo hendji kai tewa mo kotjipuka tjimo, i tewa mo vala kealikano.”

Jesus ma popi uke et̯o lye

³⁰ Iya wo va dha ko hoka, hava yatakana moGalilea, iya ye kaa li ama hala tji teeke komuntu nokanunu.

³¹ Iya ye wa longa ovalongwa ve ha tyaa: “Omuna wOmuntu ma ka yandjwa momawoko ovantu, mave ke mu dhipaa, aa dhipawa, kon̯ima yomatango atatu ma ka imunwa kout̯e.”

³² Iya odhondaka ndhiva li amava heelwa, kava li ave dhi yuvite, atjaa wo va li amava tila oku mu pula.

Omunene aan̯i?

³³ Jesus novalongwa ve ve ya koKapernaum. Iya hive ya monganda, we ve pula ha tyaa: “Mondjila nahi mamu litetha tji ombata?”

³⁴ Iya wo va nyima vala, mena lyokutya mondjila va li amave litetha ombata okutya omunene ngwaa pon̯a ovakwawo aan̯i.

³⁵ Ye wa kala pohi, ha ithana omulongo navavali ha tyaa: “Andaa pe na nguma hala okukala omunakomeho nga kale omunakon̯ima nomuundapeli wovakwawo avehe.”

³⁶ Jesus wa itha po okalele, he ke kulametha mokati kawo, iya hiee ke twaa mekolo, he ve heele ha tyaa:

³⁷ “Nguma tambula okalele kamo ngaheha mena lyandje, oye ma ntambula, nguma ntambula, haame ma tambula, iya nan̯i hooyongu ngwaa ntuma.”

Nguhe na onki nant̯e, wa ama kunt̯e

³⁸ Johannes we mu heela ha tyaa: “Mulongethi, twa mono omuntu nguma ta mo odhondemoni mena lyoye, nt̯e twe mu tjaele, mena lyokutya hawoyetu.”

³⁹ Iya Jesus we ve heela ha tyaa: “Hámu mu tjaele, mena lyokutya kape na nguma undapa otjilingankono mena lyandje, ye ha mpopile dhiva mouvi.

⁴⁰ Iya nguhe na tja onki nant̯e, wa ama kunt̯e.

⁴¹ Iya ngoka ngume mu pa okunwa oneka yomeva, mena lyokutya muvaKristus, me mu heele otjatjili okutya kaa kala háma mono ondjambi ye.

Omatyoletho

⁴² “Iya nguma tyoletha omuntu umo owomovanunu mboka mbava ndjitavela, we thewa okukutilwa ekunkwa mothingo, ye ha yumbwa melunga.

⁴³ “Iya okuwoko kwoye andaa maku ku tyoletha, ku teta ko. Okuya momwenyo au li otjingolomena hahe, hatjo ngokukala nomawoko avali, ove ho yumbwa moheli, momulilo mbuhau dhimi.

⁴⁴ [Moka omativa awo kaa t̯i nomulilo wamo kau dhimi.]

⁴⁵ Iya ompadhi yoye andaa mai ku tyoletha, i teta ko. Okuya momwenyo au li otjilema hahe, hatjo ngokukala nodhompadhi mbali, ove ho yumbwa moheli.

⁴⁶ [Moka omativa awo kaa t̯i nomulilo wamo kau dhimi.]

⁴⁷ Iya eho lyoye andaa mali ku tyoletha, li dhoola mo. Okuya motjilongo tjaKalunga au na eho limo hahe, hatjo ngokukala nomeho avali, ove ho yumbwa moheli.

⁴⁸ ‘Moka omativa awo kaa t̯i nomulilo wamo kau dhimi.’

⁴⁹ “Omuntu auhe ma ka tovalethwa nomulilo.

⁵⁰ “Omungwa otjipuka otjiwa, iya andaa wa hahuka, mau tovalethwa natji? “Kalen̯i amu na omungwa mun̯e ovene, n̯e mu kale nouwa mokati ken̯i.”