Markus 8 - Etestamende Epe Moludhimba

Jesus ma kutitha ovalumentu omayovi ane

¹ Pomatango ngenya engundwa enene lyovantu lye mu onganena uke, mena lyokutya kava li ave na ovikulya, Jesus wa ithana ovalongwa ve, ha tyaa:

² “Ovantu hemba mbe ve etethele mo onkenda, mena lyokutya va ningi omatango atatu pwaame, wo háve na himava li.

³ Iya nge ve lekele, hava i kodhoyawo nondjala, mava ka thothaunukila mondjila, mena lyokutya vamo muwo va dha kokule.”

⁴ Ovalongwa ve ve mu yaka hava tyaa: “Iya opi omuntu mpama ulu okumona ovikulya vyokukutitha ovantu hemba mokuti hemu kwanyahinya?”

⁵ Jesus we ve pula ha tyaa: “Mu na po omingome vingapi?” Ve mu yaka hava tyaa: “Epanduvali.”

⁶ Jesus wa heela owingi wovantu u kale pohi. Iya wa itha po omingome mbyoka epanduvali. Iya hiaa pandula, we vi nyembula, he vi pa ovalongwa ve, opo ve vi yandjele ovantu. Iya wo va yandjela owingi wovantu.

⁷ Wo va li po wo nouhi umo oununu. Jesus hiee u pandulile Kalunga, ha heele uke ovalongwa ve, ve u pe ovantu.

⁸ Ovantu va lya, have kuta. Ovalongwa kon̯ima va ongedha ovinyembu mbyoka mbyaa hupu po, have yulitha odhombwe epanduvali.

⁹ Pa li ovantu mbava li ave lithike pomayovi ane. Jesus wa lekela ovantu,

¹⁰ okudha mpoka wa londa dhivadhiva novalongwa ve mowato, hava i kotjit̯indwalongo tjaDalmanuta.

Ovafarisai mava pula etangan̯eko

¹¹ Ovafarisai ve ya, hava utu okutetha ombata Jesus. Ve mu lola, have mu pula etangan̯eko ndimali dhi meulu.

¹² Jesus wa twala omudhima olule, ha tyaa: “Omena lyatji ekula hendi mali taendha etangan̯eko? Me mu heele otjatjili, ekula hendi kaali pewa etangan̯eko.”

¹³ Iya ye we ve thiaa po, ha londo uke mowato, ha yauka, ha i tjikoohehinya.

Ontathi yOvafarisai

¹⁴ Ovalongwa va li ava dhimbi okweetelela omingome, mowato va li vala ave na mo omungome umo.

¹⁵ Jesus we ve ilikin̯a ha tyaa: “Lungamen̯i, n̯e mu tale nawa ontathi yOvafarisai noyaHerodes.”

¹⁶ Wo ve lipula hava tyaa: “Ngweendele okuhatu na tja omingome.”

¹⁷ Iya Jesus wa iwa omalipulo awo, ha tyaa: “Omena lyatji mamu popi okutya kamu na tja omingome? Nan̯i nanapano kamu tji lwete, n̯e kamu yuvite? Omitima vyen̯i vya kukuta?

¹⁸ Omeho mu na o, atjaa kamu ku mono, omatwi mu na o, atjaa kamu tee? Iya kaamu thipaluka,

¹⁹ himba pele ovalumentu mbenya omayovi atano omingome hembinya vitano, mwa ongedhele odhombwe ngapi ndhee yulile, himwa ongedha ovinyembu?” Wo ve mu yaka hava tyaa: “Omulongo nambali.”

²⁰ “Iya himba pele ovantu mbenya omayovi ane omingome hembinya epanduvali, odhombwe ngapi ndhee yulile, himwa ongedha ovinyembu?” Wo ve mu yaka hava tyaa: “Epanduvali.”

²¹ Ye we ve heela ha tyaa: “Nan̯i nanapano kamu yuvite?”

Jesus ma twikulula omupot̯i moBetsaida

²² Wo ve ya moBetsaida. Iya ovantu ve mu etela omupot̯i, have mu kumbu e mu t̯in̯e.

²³ Jesus wa kambula omupot̯i mokuwoko, he mu twala kokule nodhonganda. Jesus we mu tjakela pomeho, he mu tendeke okuwoko kwe, he mu pula ha tyaa: “U na hi u lwete?”

²⁴ Iya ye hiaa yele omeho, ha tyaa: “Ndji lwete ovantu, atjaa mava ngala omiti amavi ende.”

²⁵ Jesus wa t̯imika uke omupot̯i pomeho. Omupot̯i ha twikuluka, he ku mono nawa. Avihe wa li ae vi lwete nawa.

²⁶ Ye we mu lekela a ende konganda, he mu heele ha tyaa: “Vyuukilila konganda, hó ka pitapita uke.”

Petrus ma hipulula Jesus

²⁷ Jesus novalongwa ve va ya koulongo wokoKesarea-Filippi. Tainkolo va li mondjila, wa pula ovalongwa ve ha tyaa: “Ovantu va ntya, aame an̯i?”

²⁸ Wo ve mu yaka hava tyaa: “Ovantu vamo va tya oJohannes Omutjatji, iya vamo va tya oElia, navamo uke va tya yuumo owomovaprofeti.”

²⁹ Ye we ve pula ha tyaa: “N̯e mu ntya, aame an̯i?” Petrus we mu yaka ha tyaa: “Oove Messias.”

³⁰ Jesus we ve ilikin̯a okutya háve mu popi komuntu noumo.

Jesus ma popi omatatetho e net̯o lye

³¹ Ye wa uta oku ve longa okutya Omuna wOmuntu ma ka tatethwa unene, ha ka yekelwahi kovanene nokovayambethi ovanene nokovalongiveta. Ye ma ka dhipawa, iya kon̯ima yomatango atatu ma ka imunwa kout̯e.

³² Jesus we tji popya movipathi vyawo. Iya Petrus we mu n̯anga, he mu twala pokampengi, ha utu oku mu anda.

³³ Iya Jesus wa piluluka, ha tala kovalongwa ve, wa anda Petrus ha tyaa: “Satana, dha po pwaame! Ove koo soko ovipuka vyaKalunga, iya nan̯i mo soko ovipuka vyountu.”

³⁴ Iya wa ithana owingi wovantu novalongwa ve, ve ye kuye, iya we ve heela ha tyaa: “Andaa pe na nguma hala okundandula, nge lidhimbe ye omwene, ye a tjinde omutjaakano we, a ndandule.

³⁵ Iya nguma hala okuhupitha omwenyo we, me u keketha, iya nguma keketha omwenyo we mena lyandje nomena lyondaka ombwa, me u hupitha.

³⁶ Matji popile tji omuntu okutumba ouye auhe, ye ha keketha omwenyo we?

³⁷ Ne omuntu ma yandja tji mpaeli, a yowole omwenyo we?

³⁸ Iya nguma nt̯a ohon̯i, ye ha t̯a ohon̯i odhondaka dhandje mekula hendi lyovayoni wolukupo nolyoulundhi, Omuna wOmuntu me ke mu t̯a ohon̯i, hime ya metumbalo lyaIhe pamo novaengeli ovadhilikwa.”