Markus 7 - Etestamende Epe Moludhimba

Jesus ma tangunitha ovalinomi

¹ Ovafarisai novalongiveta vamo mboka mbava dha koJerusalem, va ongana puJesus.

² Iya va mona ovalongwa ve vamo amava li nomawoko ngaa sili, okutya ngahaa kohelwe.

³ (Ovajuda avehe unene tuu Ovafarisai kava li háveye likoha komawoko, va kambulitha odhonteto dhowoihe nowoina.

⁴ Kava li otjipuka hiva landa komalandethelo, tainkolo haveye tji koha, nodhonteto odhonkwawo ve dhi kambulitha ngahi tji li okukoha ovinwino, odhombiya nomalonga otjivela otjindumbu.)

⁵ Ovafarisai novalongiveta ve mu pula hava tyaa: “Omena lyatji ovalongwa woye hihava kambulitha odhonteto dhowoihe nowoina, hiva lya ahave likohele komawoko?”

⁶ Ye we ve yaka ha tyaa: “Valinomi n̯e, Jesaja we mu heela nawa ngahi kwa sonekwa haku tiwaa: ‘Ovantu hemba va ntumbaleka vala novinyo, atjaa omitima vyawo vi li kokule naame.

⁷ Va ndjundapela vala nyahinya, mena lyokutya va longetha odhonteto dhovantu.’

⁸ “Mu yetha ovitumino vyaKalunga, hamu kambulitha odhonteto dhovantu.”

⁹ Ye we ve tima, ha tyaa: “Mu ninga nawa, himu yetha otjitumino tjaKalunga, n̯e hamu kambulitha odhonteto dhen̯i ovene.

¹⁰ Iya Moses wa popya ha tyaa: ‘Tumbaleka iho nanyoko. Nguma popi navi ihe ne ina, nga dhipawe.’

¹¹ Iya n̯e mu tyaa: ‘Nguma heele ihe ne ina ha tyaa: Himbe tje ku popila natjo, mbe tji pa Korban,’ matji tya, tja pewa Kalunga,

¹² okutya kamu mu itavelele uke a popile ihe ne ina.

¹³ Hehi matji pengetha odhondaka dhaKalunga okupitila modhonteto dhen̯i ndhimu na dho. Ovipuka ovikwawo ngahembi ovyo mu ninga.”

Ovipuka mbii lundha omuntu

¹⁴ Ye wa ithana uke owingi wovantu, he u heele ha tyaa: “Nteelela ndjen̯i amuhe, mu koneke.

¹⁵ Pondje kape na hitji dha po, hatji i momuntu, hatji mu lundha, iya hitji dha momuntu, otjo tji lundha omuntu.

¹⁶ [Nguu na omatwi okutyaa, nga tyee.]”

¹⁷ Iya hive liyapauka nowingi wovantu, wa ya konganda. Ovalongwa ve mu pula ouhunga weeli hendi.

¹⁸ Ye we ve pula ha tyaa: “Nan̯i nan̯e wo tuu kamu yuvite? Kamu tji i okutya atjihe hitji dha pondje okuya momuntu katji mu lundha,

¹⁹ mena lyokutya katji i momutima we, tji ya medhimo, hatji piti mo.” Jesus otjo a thitulula hinyahi okutya ovikulya avihe vya kohoka.

²⁰ We ve heela ha tyaa: “Hitji dha momuntu, otjo tji mu lundha.

²¹ Iya momutima womuntu omo mu dha omalipulo omavi: Okuhula, oumpulu, okudhipaa,

²² okulivaka, olwiho, ouputji, okulungamena, ountalu, onki, okupenya, okulinoma nowoova.

²³ Ovipuka avihe hembi ovivi vi dha momutima womuntu, havi mu lundha.”

Eitavelo lyomukadhintu Omukanana

²⁴ Iya ye wa kulama, ha i kovit̯indwalongo vyaTiro naSidon. Iya wa ya monganda imo, ye kaa li ama hala tji kale atji iwe, atjaa tjo katja li amatji tjiiwa okuholekwa.

²⁵ Iya omukadhintu umo wa li nomuna omukadhona ngwaa li nombepo ombi, hiaa tee Jesus, we ya dhivadhiva, he lit̯imike po podhompadhi dhaJesus.

²⁶ Omukadhintu ngoka wa li Omugreka, ngwaa yumukilwa moFoinikia otjilongo tjomoSiria. Ye wa kumba Jesus a te mo ondemoni momuna omukadhona.

²⁷ Iya ye we mu heela ha tyaa: “Odhondele olutenga ngavetji kuta, mena lyokutya katji li nawa okwiitha po otjithima tjodhondele, ho tji yumbile odhombwa.”

²⁸ Iya ye we mu yaka ha tyaa: “Muhona, iinga, iya nodhombwa dhi lya ounyai wodhondele kohi yotjitaafula.”

²⁹ Iya wa heela omukadhintu ha tyaa: “Mena lyodhonda ndhiwa popi ndhoka tjili nawa, napano enda konganda, ondemoni momunoye ya dhi mo.”

³⁰ Ye hiee ya konganda, wa vadha omuna aa lala po komutala, ondemoni aya dhi mo muye.

Omulumentu ompolo ma velulwa

³¹ Iya ye wa dha ko uke kovilongo vyaTiro, ha yatakana moSidon, iya ha i kelunga lyaGalilea, ama ende pokati kaDekapolis.

³² Ve mu etela ompolo, ye nguhe tji i okupopya nawa, ve mu kumba e mu tendeke okuwoko.

³³ We mu itha po powingi wovantu, have ke likalela aveika, he mu twaa ominwe momakutwi, he litutike omate kominwe vye, he mu t̯in̯i kelaka.

³⁴ Okutya wa tala keulu, ha twala omudhima, he mu heele ha tyaa: “Efata!” Matji tyaa: Thituluka!

³⁵ Omatwi e a thituluka dhivadhiva, nelaka lye lya patuluka, ye ha popi nawa.

³⁶ Ye we ve anda okutya ahamave tji heele omuntu noumo, iya nandaku tiwa we ve anda nokwiilikin̯a wo ve tji hipulula.

³⁷ Ovengi va kuminwe unene hava tyaa: “Avihe u vi ninga nawa! Odhompolo dhi tyaa, ovahapopi va popya.”