Markus 5 - Etestamende Epe Moludhimba

Jesus ma velula omulumentu wombepo ombi

¹ Wo va ya tjikoohehinya tjelunga lyaGalilea, motjilongo tjOvagerasa.

² Jesus wa dha mo mowato, ha wanene dhiva nomulumentu nguu na ombepo ombi, ama dhi modhombila dhomaleva.

³ Omulumentu hengu wa li momaleva odhondundu, mena lyokutya kapa li omuntu ngwee mu ulile oku mu kuta nomalyenge.

⁴ Iya povikando ovingi andaa wa kutwa nomalyenge nomivya, omalyenge nomivya u vi kopaula. Wa li nodhonkono unene, okutya kapa li uke ape na omuntu, ngume mu ulu oku mu tutuvaletha.

⁵ Out̯iku nomutenya apehe u kala ama alauluka modhombila dhomomaleva nomodhondundu otjo ma wolauluka nokuliteta nomawe.

⁶ Hiaa mono Jesus kokule, wa dha ko ama dhamuka, ha twike odhongolo kotjipala tje.

⁷ Wa wololoka peulu ha tyaa: “Jesus, OmunwaKalunga Owokombandambanda! Mo ntjalele tji? Me ku kumbu kotjipala tjaKalunga, hó ntatetha.”

⁸ Iya Jesus wa vadhwa ae mu heele ha tyaa: “Mbepo ove ombi, pita mo momulumentu hengu!”

⁹ Iya Jesus we mu pula ha tyaa: “Ena lyoye, oove an̯i?” Ye we mu yaka ha tyaa: “Aame Wingi, mena lyokutya tu vengi.”

¹⁰ Iya omulumentu hengu wa kumba Jesus unene okutya odhombepo ndhoka ahamadhi lambwa mo motjilongo moka.

¹¹ Popedhi nondundu pa li otjuunda otjinene tjovingulu mbyaa li avya yala.

¹² Odhondemoni dha kumba Jesus hadhi tyaa: “Tu tuma movingulu, omo tu hita.”

¹³ Ye we dhi yethela mo. Odhombepo odhombi dha dha momulumentu, hadhi i movingulu. Otjuunda atjihe tjovingulu, hitja li atji lithike pomayovi avali, tja thothonoka okudha kekomo, hatji liyumbu melunga, hatji i nomeva.

¹⁴ Ovat̯ita wovingulu va ka inkola, hava ka hipulula otjipuka hehi mondolopa nomodhohambo. Ovantu ve ya okutala soka hitja ningwa ko.

¹⁵ Hive ya kuJesus va mona omulumentu ngoka, ngwaa li nodhondemoni odhingi, aa kala pohi wa dhala nawa, nodhondunge dhe ya mo, ovantu va li ava tila.

¹⁶ Mboka mbava mona omulumentu ngwaa li nodhondemoni hiaa ningilwa, novingulu hivya ningilwa, ve tji hipululila ovantu.

¹⁷ Iya va uta okukumba Jesus, a dhe mo motjilongo tjawo.

¹⁸ Jesus hiaa li ama londo mowato, omulumentu ngoka ngwaa ithwa odhondemoni, wa kumba Jesus, a ende naye.

¹⁹ Jesus ke mu yethele, iya we mu heela ha tyaa: “Enda konganda, u ke ve hipululile ovipuka mbyoka Muhona mbyee ku ningile, hiee ku t̯ile onkenda.”

²⁰ Omulumentu hengu wa ya, ha ka uta okuhipululila ovilongo vyaDekapolis atjihe soka Jesus hiee mu ningila, ovantu avehe ve kumwa.

Ondele yaJairus nomukadhintu ngwaa t̯in̯a komudhalo waJesus

²¹ Jesus hiaa tjuna uke tjikoohehinya tjelunga nowato, owingi wovantu we mu onganena pontyo yelunga.

²² Iya omunenene umo wosinagoga yOvajuda nguu tiwa oJairus we ya mpoka, hiaa mono Jesus, he lit̯imike po podhompadhi dhaJesus,

²³ we mu yayela ha tyaa: “Okanwandje okakadhona ke li popavi. Alikana, indjo u ke ke tendeke omawoko, ka kale nawa, ka hupe.”

²⁴ Jesus wa ya naJairus. Owingi wovantu mbwee mu landula, wa enda amau mu thin̯a.

²⁵ Iya kwa li omukadhintu ngwaa velele olulala odhombula omulongo nambali.

²⁶ Avihe mbyaa li navyo wa manena movimbanda, iya ye ahama veluka, kakele vala okutya vye mu ihametha, wo ouvela hau vyuuka komeho.

²⁷ Omukadhintu ngoka wa tyaa ouhunga naJesus, otjo a enda ama tuku owingi wovantu katee e ya kon̯ima yaJesus, ha t̯in̯i komudhalo we,

²⁸ mena lyokutya we lipopila ha tyaa: “Andaa mba t̯in̯i komudhalo we, me veluka.”

²⁹ Omukadhintu wa t̯in̯a komudhalo waJesus, olulala lwe halu ka, he limono molutu lwe okutya ouvela we wa veluka.

³⁰ Dhivadhiva Jesus we limona okutya muye mwa dhi odhonkono, ha pilulukile kowingi wovantu he ve pula ama tyaa: “Aan̯i ngwaa nt̯in̯i komudhalo?”

³¹ Ovalongwa ve ve mu yaka hava tyaa: “Ove u lwete okutya ovantu ve ku thin̯a, ove napano mo tyaa: ‘Aan̯i ngwaa nt̯in̯i?’ ”

³² Jesus wa twikila okutala okutya ngoka ngwee mu t̯in̯i an̯i.

³³ Omukadhintu wa tilile ha teketa, mena lyokutya wa li ae tji i soka hiaa ningilwa, we ya he lit̯imike po kotjipala tje, he mu heele otjatjili atjihe.

³⁴ Jesus we mu yaka ha tyaa: “Mukadhona wandje, eitavelo lyoye lye ku velula. Enda nouwa, ouvela woye wa veluka.”

³⁵ Tainkolo Jesus a li ama popi, koyaJairus, omunene wosinagoga, kwa dha odhontumwa hadhi tyaa: “Hó ulithwa uke omulongethi, omunoye ke ko.”

³⁶ Jesus kaa li ae sukwa nodhondaka odhodhontumwa, wa heela Jairus ha tyaa: “Hó tila, itavela vala.”

³⁷ Jesus ovantu avehe ke ve yethele a ende nawo kakele vala kaPetrus naJakob nomunitje Johannes.

³⁸ Jesus hiee ya monganda yaJairus, omunene wosinagoga, wa vadha mo ovantu mbava tono otjuuyila amava lili.

³⁹ Iya hiee ya mo, ha tyaa: “Mamu yayanene tji, otjitji himamu lilile hinyahi? Ondele ka t̯ile, wa lala.”

⁴⁰ Iya ovantu ve mu yola. Iya hiaa dhi pokulamba mo ovantu avehe monganda, wa itha po vala ina naihe novalongwa ve mboka mbava li naye, ha i moka mumwa li amwa lala po ondele.

⁴¹ Wa kambula ondele mokuwoko, ha tyaa: “Talita kuum,” matji tyaa: Kakadhona, me ku heele, imuka po!

⁴² Wa imuka po dhiva, ha utu okweendaenda, mena lyokutya wa li nodhombula omulongo nambali. Wo va li ave kumwa unene.

⁴³ We ve ilikin̯a unene okutya háve tji heele omuntu noumo, ye he ve heele okutya ondele nga pewe ovikulya.