Markus 4 - Etestamende Epe Moludhimba

Eeli lyomukuni

¹ Jesus wa utile uke okulonga ovantu pontyo yelunga. Owingi wovantu mbwee mu onganena va li ovengi unene, okutya ha ka londa mowato mbwaa li momeva, hamo a kala pohi. Owingi wovantu wa li awa kala pohi kekomo.

² Ye we ve longa ovipuka ovingi momaeli. We ve longa ama tyaa:

³ “Teelelen̯i! Kwa li omuntu umo ngwaa ka kunine.

⁴ Hiaa li ama kunu, dhimo dha wila pontyo yondjila, ovidhila hivye ya, havi dhi tjokola po.

⁵ Dhimo dha wila pontantalahi mpahapa li eheke en̯ingi. Iya dha mena dhivadhiva, mena lyokutya kapa li eheke en̯ingi.

⁶ Iya omutenya hiwa pupyala, ovilya vya lemba, mena lyokutya kavya li nomidhi mbyaa dhika, vya vavala.

⁷ Dhimo dha wila modhohongo. Odhohongo hidha kulu, dha thin̯a ovilya, ahamavi kwata.

⁸ Iya dhimo dha wila pohi ombwa, dha mena, ovilya havi kulu, havi kwata: Vimo omilongo vitatu, vimo omilongo epandu, navimo ethele.”

⁹ Okutya Jesus ha tyaa: “Nguu na omatwi okutyaa, nga tyee.”

Ontanto yokuundapetha omaeli

¹⁰ Iya Jesus hiaa li po aika, ovalongwa ve omulongo navavali novakwawo ve mu onganena, have mu pula ouhunga nomaeli.

¹¹ Ye we ve yaka ha tyaa: “N̯e mwa pewa okwiiwa otjiholekwa tjotjilongo tjaKalunga, iya mboka owopondje, atjihe mave tji pewa momaeli,

¹² opo omisonekwa vi hwithilwe po mbimavi tyaa: ‘Okutala va tala, atjaa kave ku mono. Okutyaa va tyaa, atjaa kave yuvite, opo háve liteyulula, va ithilwe po odhonkali dhawo.’ ”

Jesus ma thitulula eeli lyomukuni

¹³ Jesus we ve pula ha tyaa: “Eeli hendi andaa kamu li yuvite, mamu ulu vi okutyaa omaeli omakwawo?

¹⁴ Omukuni wa ka kuna odhondaka dhaKalunga.

¹⁵ Ndhoka ndhaa wila mondjila, dhi ngala ovantu mboka mbava tyaa odhondaka dhaKalunga, iya tainkolo mave dhi teelele, dhivadhiva Satana he ya, ha itha mo odhondaka ndhoka ndhiva kunwa.

¹⁶ Ndhoka ndhaa wila pontantalahi, dhi ngala ovantu mboka mbamava tee odhondaka dhaKalunga, have dhi tambula nehuluko,

¹⁷ iya ahamadhi ve hiti, mave dhi kambulitha okaluvedhe okanunu vala, iya andaa pe ke ya oudheu ne okutatethelwa odhondaka dhaKalunga, mave dhi yetha dhiva.

¹⁸ Ndhoka ndhaa wila modhohongo, dhi ngala ovantu mboka mbamava tee odhondaka dhaKalunga,

¹⁹ iya otjiho tjouye hembu nokulikembela ouhona nolwiho ndumalu ya muwo, malu thin̯a mo odhondaka dhaKalunga, dho ahamadhi eta po tja.

²⁰ Ovantu mboka mbamava tee odhondaka dhaKalunga, wo have dhi tambula, owo va ngala ombuto ndjaa kunwa pohi ombwa, ovilya havi kwata: Vimo omilongo vitatu, vimo omilongo epandu, vimo ethele.”

Olamba kohi yotjihayo

²¹ Jesus we ve pula ha tyaa: “Pe na nguma ulu okweeta olamba, he i twaa kohi yotjihayo ne kohi yomutala? Ngundhe wa thele oku i tulika kotjituliko.

²² Iya kakele kokutya kaku na tja soka hitja holekwa hihamatji ka holololwa, ko kaku na tja soka hitja holama hihamatji ya poluhandja.

²³ Nguu na omatwi okutyaa, nga tyee!”

²⁴ Jesus we ve heela ha tyaa: “Tangan̯eken̯i soka himamu teelele. Himamu yeleke natjo, nan̯e otjo mamu ka yelekwa natjo, hamu wedhelwa ko uke.

²⁵ Iya nguu na tja, ma pewa, iya nguhe na tja, nahiee na tjo, me tji nyekwa.”

Eeli lyokukula kwombuto

²⁶ Jesus wa popya ha tyaa: “Otjilongo tjaKalunga tji ngala omuntu ngwaa kuna ombuto motjana tje.

²⁷ Iya aa ka lala po kout̯iku, komuhuka hima imuka po, ombuto ya mene, yo ya kulu, iya ye ke tji i, hitja ende.

²⁸ Mena lyokutya ohi yo oyene oyo i eta ovilya, olutenga havi tete odhongolo, havi manga, okudha mpoka havi yolova.

²⁹ Ovilya andaa vya kukuta okutya omuteyi ma itha po onkiki, ha ka teya mena lyokutya eteyo lye thiki.”

Eeli lyombuto yotjitho tjosinapi

³⁰ Jesus wa pula ha tyaa: “Otjilongo tjaKalunga matu tji yeleke natji, matu tji yeleke neeli lin̯i?

³¹ Otjilongo tjaKalunga tji ngala ombuto yotjitho tjosinapi. Aya kunwa, onunu kodhombuma adhihe dhokombanda yohi.

³² Iya aya kunwa, i mena, hai kulu, hai ningi otjitho otjinene, okupon̯a ovikwawo avihe, hatji kala nodhontai odhonene, ovidhila vyokeulu havi tungile modhontai dhatjo.”

³³ Jesus wa heela ovantu ondaka, ye ha undapetha omaeli omengi ngahenga, we ve heela otjingi ngahi va li ave yuvite.

³⁴ Ke ve heelele tja hihatji li momaeli. Iya hive ke likalela novalongwa ve aveika, he ve thitululile ovipuka avihe.

Jesus ma nyimitha ombepo yomakuthikuthi

³⁵ Iya etango ndyoka okawiiwii hika pohi Jesus wa heela ovalongwa ve ha tyaa: “Tu yaukilen̯i tjikoohehinya.”

³⁶ Ovalongwa va thiaa po owingi wovantu hava landula Jesus mowato moka mwaa li aa kala pohi. Omawato amo a enda wo pamo naye.

³⁷ Ombepo onene yomakuthikuthi ya tukuka, nomakuthikuthi hae ya mowato, katee owato mau hala okuyula omeva.

³⁸ Iya ye omwene wa vadhwa mowato kon̯ima aa lala, aa haele kotjihaelo. Ovalongwa ve mu imuna po, hava tyaa: “Mulongethi, nan̯i ku sukilwe nant̯e, himatu i nomeva?”

³⁹ Jesus hiaa imuka po, ha anda ombepo, ha heele elunga ha tyaa: “Nyima, u tya thiluu.” Ombepo ya nyima, hai tya thiluu.

⁴⁰ We ve heela ha tyaa: “Mwa tilile tji? Omena lyatji hihamu na tja eitavelo?”

⁴¹ Wo va tilile unene, have lipula amava tyaa: “Aan̯i ngu, nguu teeka kombepo nokelunga?”