Markus 16 - Etestamende Epe Moludhimba

Eimuko lyaJesus

¹ Iya hipa piti Esabati, Maria Magdalena naSalome naMaria ina yaJakob va landa ovidhimba, va ka vaveke olutu lwaJesus.

² Iya omuhuka omunene wetango lyolutenga lyotjivike etango himali tumbu, va ya kombila.

³ Iya ve lipula hava tyaa: “Iya atjaa aan̯i ngume ke tu alangatethela po ewe li dhe po pombila?”

⁴ Iya hiva tala ko, va mona okutya ewe ndyoka ndyaa li enene unene lya alangatethwa po, kali po.

⁵ Iya hiva hiti mombila, va mona mo etele ndyaa li alya kala pohi kokulyo, aa lya dhala omudhalo omule omupembadhi, iya va li ava tila unene.

⁶ Ye he ve heele ha tyaa: “Hámu tila, mamu taendha Jesus Omunasareta, ngwaa papelwa komutjaakano. Ye wa imunwa kout̯e, ke mo hemu. Talen̯i tuu pompuka mpave mu twiile.

⁷ Iya enden̯i ka heele ovalongwa ve naPetrus mu tyee: Jesus ma ka tenga okuya koGalilea. Oko mamu ke mu mona ngahi e mu heela.”

⁸ Ovakadhintu va inkola pombila, amava teketa, ava ngwangwana. Wo kave na omuntu noumo nguva heela, mena lyokutya va li ava tila. [

Jesus me liholololele Maria Magdalena

⁹ Omuhuka omunene wetango lyolutenga lyotjivike, Jesus hiaa imuka kout̯e, olutenga we liholololela Maria Magdalena, ngoka Jesus mwaa ithile odhondemoni epanduvali.

¹⁰ Iya ye wa ya, he tji hipululile mboka mbava kala naJesus, mbava li ave otjo mava lili.

¹¹ Iya hiva tee okutya u na omwenyo, Maria we mu mono, kave tji itavelele.

Jesus me liholololele ovalongwa vavali

¹² Jesus kon̯ima we liholololela ovalongwa ve vavali molupe nduu lili, tainkolo va li amava dhi motjitungwalongo.

¹³ Hemba va ya, have tji hipululile ovakwawo, iya novakwawo kave tji itavelele.

Jesus me liholololele ovalongwa omulongo naumo

¹⁴ Kon̯ima we lihololela mboka omulongo naumo, tainkolo va li amava li. Jesus we ve tangunithila okuhaitavela noukukutu womitima vyawo, mena lyokutya kava itavelele mboka mbave mu mona hiaa imunwa kout̯e.

¹⁵ Jesus we ve heela ha tyaa: “Enden̯i nouye auhe, n̯e mu ka teethele ovantu avehe ondaka ombwa.

¹⁶ Nguma itavele, ha tjatjwa, ma hupithwa, iya nguhama itavele, ma ka koyelwa mekeko.

¹⁷ Mboka mbava itavela, mava ka undapa ovilingatangan̯eko. Mena lyandje mava ka itha mo odhondemoni, mava ka popya omalaka omape.

¹⁸ Mava ka kambula odhonyoka, andaa va nu oudhioo, kau na himau ve ningi, mava ka tendeka omawoko awo kovavedhi, hava veluka.”

Jesus ma i meulu

¹⁹ Iya kon̯ima Muhona Jesus hiee ve heele nyahoka, wa twalwa meulu. Iya ha kala pohi kokulyo kwaKalunga.

²⁰ Iya ovalongwa va ya, hava teethele akuhe, iya Ohamba wa li pamo nawo, ovilingatangan̯eko mbiva undapa vya yulika okutya eteetho lyawo olyatjatjili.]