Markus 11 - Etestamende Epe Moludhimba

Jesus ma kavile ma i koJerusalem

¹ Iya hive ya popedhi naJerusalem, ve ya poBetfage naBetania, hive thiki pOndundu yomiholivi, wa tuma ovalongwa ve vavali,

² he ve heele ha tyaa: “Enden̯i kokalongo hake li komeho, amwe ya mo vala, mamu ka mona ombulona ndjaa kutwa, ndjihaiya kavilwa komuntu nokanunu, i kutululen̯i, n̯e mu i ete huno.

³ Iya andaa pe na ngume mu pula ha tyaa: ‘Mamu ningi vi nyahoka,’ tyen̯ii: ‘Muhona me i hepa, iya ye me ke i tjun̯a dhiva.’ ”

⁴ Iya wo va ya, hava mono ombulona ndjaa kutilwa potjivelo tjonganda pomuvanda, have i kutulula.

⁵ Iya vamo mbava li ava kulama mpoka, ve ve pula hava tyaa: “Ombulona mamu i kutululile tji?”

⁶ Iya ovalongwa ve, ve ve heela ngahi va heelwa kuJesus, tjau ovantu have ve yetha.

⁷ Iya va eta ombulona kuJesus, iya wo hava twaa ko omidhalo vyawo komongo wayo, tjau ha kavile.

⁸ Iya ovantu ovengi va yala omidhalo vyawo mondjila, vamo hava tete ovitho pontyo yondjila, have vi yala mondjila.

⁹ Iya mboka mbava li komeho nambava li amave ve landula, va wololoka hava tyaa: “Hosianna! Nga tumbalekwe hengu ngume ya mena lyaMuhona!

¹⁰ Ouhamba watate David, mbumau ya ngau tumbalekwe! Hosianna Owokombandambanda!”

¹¹ Iya Jesus we ya moJerusalem, ha hiti motempeli, iya hiaa tala ovipuka avihe hivi li, wa ya novalongwa ve omulongo navavali koBetania, mena lyokutya kwa li akwa toko.

Omukuyu mau thingwa

¹² Iya ngamuhuka hiva li amava dhi koBetania, Jesus wa li aa t̯i ondjala.

¹³ Jesus wa mona omukuyu kokule mbuu na omatho, wa ya, a ka tale, andaa u na hima mono ko, hiaa i ko, ke na hiaa mona ko, omatho vala aeika, mena lyokutya otembu yokuma ya li ahaiye thika.

¹⁴ Jesus we u heela ha tyaa: “Mukuyu ove, kape na tja uke nguma ka lya omakuyu oye katee apehe!” Ovalongwa nawo ve tji tyaa.

Jesus motempeli

¹⁵ Iya hive ya moJerusalem, Jesus wa hita motempeli, ha utu okuta mo mbava li amava landetha nambava li amava landele motempeli. Wa yundulila pohi ovitaafula vyovapimpi novipundi vyovalandethi wodhonguti.

¹⁶ Ye ka yethele omuntu a pitile motempeli aa tjindi ovimbundu.

¹⁷ Iya we ve longa, heve heele ha tyaa: “Nan̯i kaku sonekelwe okutya ondjuwo yandje ya thele okwiithanwa ondjuwo yokukumbila oviwan̯a avihe? Iya n̯e mwe i ninga eleva lyovapundi.”

¹⁸ Ovayambethi ovanene novalongiveta ve tji tyaa, hava soko okutya va thele okuninga vi, opo ve tjiiwe oku mu dhipaa, va li amave mu tila, mena lyokutya elongo lye lya kumitha ovantu avehe.

¹⁹ Iya hikwa toko, Jesus novalongwa ve va dha mo motjitungwalongo.

Odhonkono dheitavelo

²⁰ Iya omuhuka omunene hiva ka enda po, va vadha omukuyu awa kukuta katee komidhi.

²¹ Petrus wa thipaluka, he mu heele ha tyaa: “Rabbi, taa tuutuu, omukuyu mbuwa thingile, wa kukuta.”

²² Iya Jesus wa yaka ha tyaa: “Kalen̯i amwa itavele muKalunga.

²³ Otjatjili, me mu heele okutya ngaile pe na nguma heele ondundu hendji ha tyaa: ‘Dha po, liyumba melunga,’ ye ahama limbililwa momutima we, iya ye he tji itavele okutya soka hiaa popi matji ningwa, ngai me tji ningilwa.

²⁴ Iya me mu heele okutya ovipuka avihe mbimamu pula amamu kumbu neitavelo, itavelen̯i okutya mwe vi pewa, iya mamu ke vi pewa.

²⁵ Iya andaa mwa kulama amamu kumbu, amu na himwe liningi nomukwen̯i, liithilen̯i po, opo Iho owomeulu e mu ithile po wo odhonkali dhen̯i.”

²⁶ [“Iya andaa kaamu ithile po ovantu, naIho kaa itha po odhonkali dhen̯i.”]

Etumino lyaJesus mali pulwa

²⁷ Iya wo ve ya uke koJerusalem. Ye hiaa li ama ende motempeli ovayambethi ovanene novalongiveta novanene wotjiwan̯a ve ya kuye

²⁸ have mu heele hava tyaa: “Ovipuka hembi u vi ninga ketumino patji? Ne aan̯i ngwee ku pa etumino okutya u ninge ovipuka hembi?”

²⁹ Jesus we ve yaka ha tyaa: “Naame me mu pula epulo limo, ntjeela ndjen̯i, opo naame ndji mu heele okutya ovipuka hembi ndji vi ninga ketumino patji.

³⁰ Etjatjo lyaJohannes lya dha meulu ne omovantu? Ntjeela ndjen̯i.”

³¹ Wo va tompola puwo ovene hava tyaa: “Nditwa tyaa: ‘Omeulu,’ mpe me tu pula okutyaa: ‘Omena lyatji hihamu mu itavelele?’

³² Iya nditwa tyaa: ‘Omovantu?’ ” (Wo va li amava tila ovantu, mena lyokutya ovantu avehe va itavela okutya Johannes wa li omuprofeti watjatjili.)

³³ Iya wo va yaka Jesus hava tyaa: “Katu tji i.” Jesus we ve yaka ha tyaa: “Naame híme mu heele okutya ovipuka hembi ndji vi ninga ketumino patji.”