Markus 1 - Etestamende Epe Moludhimba

Eteetho lyaJohannes Omutjatji

¹ Ondaka ombwa, ndjimai popi ouhunga naJesus Kristus, OmunwaKalunga.

² Iya ngahi tja sonekwa membo lyomuprofeti Jesaja, haku tiwaa: “Taa tuutuu, ame me tumu ontumwa yandje, nguma tenge, ye ngoka ngume ke ku longekedhela ondjila, tainkolo ove hóye ya.

³ Ondaka yomuwololoki mokuti mai tyaa: ‘Undapelen̯i Muhona ondjila, mu vyuukililithilen̯i ovilila!’ ”

⁴ Johannes we ya mokuti, ha teetha okutya ovantu ngave liteyulule, wo va tjatjwe, opo odhonkali dhawo dhi ithwe po.

⁵ Ovajudea avehe novantu avehe womoJerusalem va ya kuJohannes, wo hava tjatjwa kuye momulonga waJordan, hiva hipulula odhonkali dhawo.

⁶ Johannes wa dhalele omudhalo mbwaa undapwa nomaenya odhongamelu nomuvya wotjipa motjivya tje. Wa lile otjimbonde noutji.

⁷ Naye wa teethela ovantu ha tyaa: “Ngoka ngume ya kon̯ima yandje omunene kwaame. Ame híme tji ulu nangahi tji li okukutulula omivya vyodhongaku dhe.

⁸ Ame me mu tjatja nomeva, iya ye me mu tjatja nOmbepo Ondhilikwa.”

Etjatjo lyaJesus nokulolwa kwe

⁹ Pomatango ngenya Jesus wa dha koNasaret motjilongo tjaGalilea, ha tjatjwa kuJohannes momulonga waJordan.

¹⁰ Dhivadhiva Jesus hiaa dhi momeva, wa mona eulu ndyee liyapuka, nOmbepo yaKalunga amai lauka ngonguti, hai mu wilile.

¹¹ Meulu mwa dha ondaka hai tyaa: “Oove Omunwandje omuhivilikwa, ngumba hopa.”

¹² Okudha mpoka Ombepo yaKalunga ye mu twala mokuti.

¹³ Wa kala mokuti omatango omilongo vine, wa lolwa kuSatana, ye wa kala mokati kovithitu, iya ovaengeli ve mu popila.

Jesus ma ithana ovahwee wodhohi vane

¹⁴ Kon̯ima Johannes hiaa yedhililwa mokaliwoso, Jesus wa ya koGalilea, ha ka teetha ondaka ombwa yaKalunga

¹⁵ ha tyaa: “Otembu ye thiki, otjilongo tjaKalunga tje ya popedhi. Liteyululen̯i, mu itavele ondaka ombwa.”

¹⁶ Jesus hiaa li ama lamba kontyo yelunga lyaGalilea, wa mona Simon nomunitje Andreas, amava yumbu omawaanda awo melunga, mena lyokutya va li ovahwee wodhohi.

¹⁷ Jesus we ve heela ha tyaa: “Ndandula ndjen̯i, ame me mu ningi ovahwee wovantu.”

¹⁸ Dhivadhiva va thiaa po omawaanda, have mu landula.

¹⁹ Hiaa hweene uke kanunu komeho, wa mona Jakob nomunitje Johannes, oomunkwaSebedeus. Wo va li mowato amava pampa omawaanda awo.

²⁰ Dhivadhiva Jesus we ve ithana, hava thii po ihe Sebedeus mowato pamo novaundapeleli, hava i pamo naye.

Omulumentu ngwaa li nombepo ombi

²¹ Jesus novalongwa ve va ya koKapernaum. MEsabati Jesus wa ya mosinagoga, ha utu okulonga ovantu.

²² Ovantu ve kuminwa elongo lye, mena lyokutya we ve longa nganguu na odhonkono, hatjo ngovalongiveta.

²³ Mosinagoga moka mwa li omulumentu ngwaa li nombepo ombi, wa wololoka

²⁴ ha tyaa: “Jesus Omunasareta, mo tu halele tji? We ya oku tu han̯auna? Ndji ku i, oove Omudhilikwa waKalunga.”

²⁵ Jesus wa anda ombepo ha tyaa: “Tutuvala, pita mo muye.”

²⁶ Ombepo ombi ye mu pukutidha nodhonkono, hai ulu, yo hai dhi mo muye.

²⁷ Ovantu avehe ve kumwa unene, hava i mokulipula hava tyaa: “Otjitji hi? Elongo epe ndii na odhonkono? U heela odhombepo odhombi, dho hadhi mu itavele.”

²⁸ Etumbuko lyaJesus lya handjana dhivadhiva notjit̯indwalongo atjihe tjaGalilea.

Jesus ma velula inaivi yaPetrus novavedhi ovengi

²⁹ Dhivadhiva Jesus novalongwa ve hiva dhi mosinagoga, va ya koyooSimon naAndreas, va ya pamo naJakob naJohannes.

³⁰ Inaivi yaSimon wa li momala, ama vele elema. Wo have mu dhimbula kuJesus.

³¹ Jesus we ya kuye, he mu yaka mokuwoko, he mu kaleke pohi. Elema hali dhi mo, he ve twiile po ovikulya.

³² Iya etango hilya hiti, okawiiwii hika wile pohi, ovantu va eta ovavedhi avehe nambava li nodhondemoni.

³³ Ovantu avehe wopotjitungwalongo soka va onganene pomuvelo wondjuwo.

³⁴ Jesus wa velulile ovavedhi ovengi mbava li nomitjithi mbii lili nambii lili, ha ta mo odhondemoni odhingi. Iya odhondemoni ke dhi yethele dhi popye, mena lyokutya dha li adhi mu i okutya ye aan̯i.

Jesus ma teetha moGalilea

³⁵ Omuhuka omunene, tainkolo ombimba háiya veta, Jesus wa imuka po, ha piti mo, ha i kompuka hoka huhaku na tja ovantu, ha ka kumba.

³⁶ Simon novantu mboka mbava li pamo naye va taendha Jesus.

³⁷ Hive mu mono, hava tyaa: “Ovantu avehe mave ku taendha.”

³⁸ Jesus we ve yaka ha tyaa: “Tu enden̯i moulongo wopoulaanganda, opo ndji ka teethele mo wo, mena lyokutya hehi otjo mba endela.”

³⁹ Iya Jesus wa endaenda moGalilea atjihe, ha teethele modhosinagoga dhawo, odhondemoni ndhaa li movantu, he dhi ta mo.

Jesus ma velula omulumentu wotjilundu

⁴⁰ Omulumentu wotjilundu we ya kuJesus, wa twika odhongolo, he mu heele ama tyaa: “Andaa mo hala okumbelula, mo tji ulu.”

⁴¹ Jesus we mu t̯ila onkenda, ha yele okuwoko kwe, he mu t̯in̯i, ha tyaa: “Ame me hala, veluka.”

⁴² Dhivadhiva ouvela wotjilundu we mu yetha, ha veluka.

⁴³ Jesus we mu ilikin̯a nodhonkono, he mu lekele dhiva,

⁴⁴ ye ha tyaa: “Taa tuutuu, otjipuka hehi hó tji heele omuntu noumo. Iya enda, u ke liyulikithe komuyambethi, ove u ka yandje otjali kotempeli ngaMoses hiaa heele, tji ve ningile oumbangi okutya ove wa veluka.”

⁴⁵ Omulumentu wotjilundu hiaa i pondje, ha utu okuhipulula otjipuka hehi apehe. Okutya Jesus ka ulile uke okweenda poluhandja motjilongo, wa ya kodhontyo huhaku na tja ovantu. Nandaku tiwa otjo nyahoka ovantu kodhombinga nodhombinga ve ya kuye.