Lukas 9 - Etestamende Epe Moludhimba

Jesus ma tumu ovalongwa omulongo navavali

¹ Jesus wa ithanena ovalongwa omulongo navavali pamo, we ve pa odhonkono netumino okutumina odhondemoni adhihe nokuvelula omitjithi.

² We ve tuma oku ka teetha otjilongo tjaKalunga nokuvelula ovavedhi.

³ We ve heela ha tyaa: “Hámu i natja mondjila, hatjisawa, handjato, hamungome, hadhombongo, n̯e hámu kala novikutu vivali.

⁴ Amwe ya monganda mumwe thikile, ngamo mu kala moka katee mamu dhi mo.

⁵ Iya mondolopa moka muhamave mu tambula, dhen̯i mo, n̯e mu lipupule ombuma kodhompadhi dhen̯i, tji ve ningile oumbangi okutya mwe ve yetha.”

⁶ Ovalongwa va ya, hava ende moulongo noulongo hava teetha ondaka ombwa, wo hava velula ovavedhi akuhe.

Okungwangwana kwaHerodes

⁷ Iya Herodes, omutumini wotjityane tjotjilongo, hiaa tee ovipuka mbyoka avihe mbyaa ningwa, wa ngwangwana, mena lyokutya vamo va popya okutya Johannes wa imunwa kout̯e.

⁸ Ovakwawo hava tya Elia oye e ya, tainkolo uke vamo mava tya yuumo owomovaprofeti valukulu, oye a imuka kout̯e.

⁹ Herodes ha tyaa: “Johannes ame mbe mu tetetha omutwe, iya nkee ngoka aan̯i ngundji yuvite nguma hewa nyahoka?” Ye wa taendha oluvedhe e mu mone.

Jesus ma kutitha ovalumentu omayovi atano

¹⁰ Ovayapostoli hiva tjuna, va hipululila Jesus ovipuka mbyoka avihe mbiva ninga. Wa ya nawo, have ke likalela kondolopa ndjii tiwa oBetsaida.

¹¹ Iya owingi wovantu hiwe tji tee, we mu landula. Jesus we ve tambula, he ve hipululile otjilongo tjaKalunga, ha velula mboka mbava li amava hepa okuvelulwa.

¹² Iya etango hilya hiti, okawiiwii hika wile pohi, ovalongwa mbenya omulongo navavali ve ya kuJesus, hava tyaa: “Lekela owingi wovantu, u ende moulongo wopopedhi nomodhohambo, va ka taendhe ovikulya nomulalo, mena lyokutya hempa mpatu li opokuti kwanyahinya.”

¹³ Jesus we ve yaka ha tyaa: “Ve pen̯i va lye.” Ovayapostoli hava tyaa: “Nt̯e katu na tja ovingi, tu na vala omingome vitano nodhohi mbali, ngweendele owingi wovantu hembu auhe matu i, tu ke ve landele ovikulya.”

¹⁴ Ovalumentu mboka va li omayovi atano. Iya Jesus wa heela ovalongwa ve ha tyaa: “Ve kalethen̯i pohi movinkopo, otjinkopo atjihe ngatji kale novantu omilongo vitano.”

¹⁵ Otjo va ninga, hava kaletha pohi ovantu avehe.

¹⁶ Jesus wa itha po omingome mbyoka vitano nodhohi ndhoka mbali, ha tala peulu, ha pandula. Ye we vi nyembula, he vi pa ovalongwa ve, ve vi yandjele ovantu.

¹⁷ Wo avehe va lya, have kuta. Ovalongwa va ongedha ovinyembu mbyaa hupu po, have yulitha odhombwe omulongo nambali.

Petrus ma hipulula Jesus

¹⁸ Etango limo Jesus hiaa li aika ama kumbu, ovalongwa ve va li pamo naye, ye we ve pula ha tyaa: “Ovantu va ntya, aame an̯i?”

¹⁹ Wo ve mu yaka hava tyaa: “Ovantu vamo va tya oJohannes Omutjatji, iya vamo va tya oElia, navamo uke va tya yuumo owomovaprofeti valukulu a imuka kout̯e.”

²⁰ Jesus we ve pula ha tyaa: “Iya n̯e mu ntya, aame an̯i?” Petrus we mu yaka ha tyaa: “Oove Messias yaKalunga.”

Jesus ma popi omatatetho net̯o lye

²¹ Jesus we ve ilikin̯a unene okutya hehi háve tji heele omuntu noumo.

²² We ve heela ha tyaa: “Omuna wOmuntu wa thele oku ka tatethwa unene, ha ka yekelwahi kovanene nokovayambethi ovanene nokovalongiveta. Ye ma ka dhipawa, iya etango etyatatu ma ka imunwa kout̯e.”

²³ Iya Jesus we ve heela avehe ha tyaa: “Andaa pe na nguma hala okundandula, nge lidhimbe ye omwene, ye a tjinde omutjaakano we etango alihe, a ndandule.

²⁴ Iya nguma hala okuhupitha omwenyo we, me u keketha, iya nguma keketha omwenyo we mena lyandje, me u hupitha.

²⁵ Matji popile tji omuntu okutumba ouye auhe, andaa me likekethele ne he liteya po?

²⁶ Iya nguma nt̯a ohon̯i, ye ha t̯a ohon̯i odhondaka dhandje, Omuna wOmuntu me ke mu t̯a ohon̯i, hime ya metumbalo lye nolyaIhe nolyovaengeli ovadhilikwa.

²⁷ Ame me mu heele otjatjili okutya pe na vamo muhemba mbava kulama hempa, mbahamava lolo et̯o, tainkolo háveya mona otjilongo tjaKalunga.”

Jesus ma laimithwa

²⁸ Jesus wa popya ovipuka hembi, iya ambala kon̯ima yomatango epandutatu wa itha po Petrus naJohannes naJakob, ha i nawo kondundu oku ka kumba.

²⁹ Tainkolo a li ama kumbu, olupe lwotjipala tje lwa lunduluka, nomidhalo vye vya pembana, havi laima.

³⁰ Iya taa tuutuu, puwo pa li ovalumentu vavali, Moses naElia, hava popi naJesus.

³¹ Wo ve ya melaimo, hava tompola okudha po kwaJesus humaku ka hulithilwa moJerusalem.

³² Petrus novakwawo mboka mbava li ava kambulwa kolupot̯i, hiva pathumuka, va mona elaimo lyaJesus novalumentu mboka vavali mbava kulama naye.

³³ Ovalumentu hemba vavali hive liyapuka naJesus, Petrus wa heela Jesus ha tyaa: “Muhona, hempa pe tu thevelwa okukala. Ngatu tunge po omasase atatu, limo olyoye, limo olyaMoses nalimo olyaElia.” Iya Petrus kaa li ae tji i soka hima popi.

³⁴ Petrus tainkolo a li ama popi ovipuka hembi, pe ya ekaka hali ve tjikile. Va li ava tila, hiva tjikilwa kekaka.

³⁵ Iya mekaka mwa dha ondaka hai tyaa: “Nguka Omunwandje omuholowolwa, mu tyeen̯i.”

³⁶ Ondaka hiya nyimi, pa moneka vala Jesus aika. Ovalongwa ovipuka mbiva mona, kave vi heelele omuntu noumo pomatango ngoka.

Jesus ma velula ondele omudhantu ngwaa li novintonya

³⁷ Iya ngamuhuka hiva heluka kondundu, owingi wovantu wa wanena naJesus.

³⁸ Mowingi wovantu mwa li omulumentu umo ngwaa wololoka peulu ha tyaa: “Mulongethi, me ku kumbu, u tale omunwandje, mena lyokutya ye ongunga.

³⁹ Ombepo aye mu kambula, u yadhauluka, hai mu sata pohi, ha tumbu ondutu kotjinyo. Yo kai hala okudha mo muye, iya ye mu teyaula.

⁴⁰ Ame mba kumbu ovalongwa woye, ve i te mo, atjaa va anyenwa.”

⁴¹ Jesus we mu yaka ha tyaa: “O, kula n̯e mbahamu na tja eitavelo, n̯e mbahamu tee! Me kala ame likambulithile n̯e katee nalun̯i? Omunoye mu eta huno.”

⁴² Ondele tainkolo mave mu eta, ondemoni ye mu pukutidha unene, hai mu sata pohi. Jesus wa anda ombepo ombi, ha velula ondele ngoka, he mu tjun̯a kwiihe.

⁴³ Ovantu avehe ve kuminwa odhonkono odhonene dhaKalunga. Tainkolo avehe va li ave kuminwa ovipuka hembi avihe mbyaa ninga, Jesus wa heela ovalongwa ve ha tyaa:

Jesus ma popi uke et̯o lye

⁴⁴ “Hámu dhimbi odhondaka hendhi: Omuna wOmuntu ma ka yandjwa momawoko ovantu.”

⁴⁵ Iya odhondaka hendhi ndhiva li amava heelwa, kava li ave dhi yuvite. Odhondaka ndhoka ve dhi holekwa, opo háve dhi tee, atjaa wo va li amava tila oku mu pula.

Omunene aan̯i?

⁴⁶ Movalongwa mwa imuka ombata onene okutya omunene ngwaa pon̯a ovakwawo aan̯i.

⁴⁷ Iya Jesus hiaa iwa omalipulo awo, wa itha po okalele, he ke kulametha pontyo ye,

⁴⁸ ha tyaa: “Nguma tambula okalele heha mena lyandje, oye ma ntambula, iya nguma ntambula, oye ma tambula ngoka ngwaa ntuma, mena lyokutya omununu mun̯e amuhe oye e li omunene.”

Nguhame ku kondjetha wa ama kwoove

⁴⁹ Johannes wa yaka ha tyaa: “Muhona, twa mono omuntu nguma ta mo odhondemoni mena lyoye. Nt̯e twe mu tjaele, mena lyokutya hawoyetu.”

⁵⁰ Iya Jesus we ve heela ha tyaa: “Hámu mu tjaele, mena lyokutya nguhe na tja onki nan̯e, wa ama kun̯e.”

Ovasamaria kava tambulile Jesus

⁵¹ Iya omatango hiee thiki popedhi, Jesus a twalwe meulu, wa tokolele okuvyuuka koJerusalem,

⁵² ha tengetha odhontumwa. Va kulama hava i kokalongo kOvasamaria, ve ke mu longekedhele oluvedhe.

⁵³ Iya wo kave mu tambulile, mena lyokutya ye wa li ama vyuuka koJerusalem.

⁵⁴ Ovalongwa ve, Jakob naJohannes, hive tji mono, hava tyaa: “Muhona, mo hala tu ithane omulilo meulu u ve lungwinithe po, [ngaElia hiaa ningile]?”

⁵⁵ Jesus wa piluluka, he ve anda [ha tyaa: “Kamu tji i okutya n̯e muwombepo patji?

⁵⁶ Omuna wOmuntu ke dhile okukeketha omienyo vyovantu, iya oku vi hupitha.”] Iya wo hava i kokalongo kamo.

Jesus ma pukulula ovalanduli ve?

⁵⁷ Jesus novalongwa ve hiva li amava ende mondjila, omulumentu umo we mu heela ha tyaa: “Ame me hala oku ku landula apehe mpamo i.”

⁵⁸ Jesus we mu heela ha tyaa: “Odhombandje dhi na omalungi, novidhila vyokeulu vi na oviyuwo, iya Omuna wOmuntu ke na mpama thuvitha omutwe we.”

⁵⁹ Iya Jesus wa heela omuntu umo ha tyaa: “Ndandula ndje.” Iya ngunya we mu heela ha tyaa: “[Muhona,] olutenga ndekela ndje ndji ka pake tate.”

⁶⁰ Jesus we mu yaka ha tyaa: “Yetha ovat̯e va pake ovat̯e vawo, iya ove enda, u ka teethe otjilongo tjaKalunga.”

⁶¹ Umo we mu heela ha tyaa: “Muhona, me hala ndji ku landule, iya mpopila ndje olutenga ndji tji ka lekele owokonganda.”

⁶² Jesus we mu yaka ha tyaa: “Kape na nguu pulula, otjo ma tala kon̯ima, ngume tji ningi, kee thevelwa otjilongo tjaKalunga.”