Lukas 7 - Etestamende Epe Moludhimba

Jesus ma velula omupika womunene wovakwavita

¹ Iya Jesus hiaa mana okuheela ovantu odhondaka hendhi adhihe, wa ya koKapernaum.

² Kwa li omunene wovakwavita ngwaa li nomupika we ngwaa li ama vele, ye ngwaa li popavi. Omunene wovakwavita wa li ae hole unene omupika we.

³ Hiaa tee Jesus, wa tuma ko ovanene wOvajuda kuye oku mu kumba, e ye okuvelula omupika we.

⁴ Hemba hive ya kuJesus, ve mu kumba nodhonkono hava tyaa: “Omunene wovakwavita wa thele okupopilwa kwoove,

⁵ mena lyokutya u hole otjiwan̯a tjetu, ye we tu tungila osinagoga.”

⁶ Iya Jesus wa ya pamo nawo. Tainkolo héye thika popedhi nonganda, omunene wovakwavita wa tuma ko omapanga e, e ke mu heele a tyee: “Muhona, hó liulithwa uke, mena lyokutya ame hí thevelwe, u ye mondjuwo yandje.

⁷ Ame mbe litala okutya hí thevelwe okuya kwoove. Popya vala nondaka, omuntu wandje ma veluka.

⁸ Iya ame naame wo ndjimuntu omutuminwa, ndji na ovakwavita mbave li kohi yandje. Ndji heela omuntu he tyaa: ‘Enda,’ ye ha i, nomukwawo he tyaa: ‘Indjo,’ ye he ya, nomupika wandje ndji tyaa: ‘Undapa otjontumba,’ he tji undapa.”

⁹ Jesus hiee tji tee, we mu kuminwa, ha pilukile kowingi wovantu mbwee mu landula, ha tyaa: “Me mu heele okutya moIsrael híya mona mo nguu na eitavelo enene ndii lithike hempa.”

¹⁰ Odhontumwa hidha tjuna konganda, dha vadha omupika aa veluka.

Jesus ma imuna kout̯e ondele omudhantu womuhepe

¹¹ Kon̯ima yanyahoka Jesus wa ya kondolopa ndjii tiwa oNain, ovalongwa ve nowingi wovantu va enda pamo naye.

¹² Hiaa thiki popedhi nomuvelo wondolopa, otjivimbi tja tjindwa mo, omuna omudhantu, ongunga yaina ngwaa li omuhepe. Owingi wovantu owomondolopa we mu thindikila.

¹³ Muhona hiee mu mono, we mu etethela mo onkenda ha tyaa: “Hó lili.”

¹⁴ Wa hweena ko, ha t̯in̯i kotjintali, ovatjindi hava kulama. Jesus ha tyaa: “Mukwe, me ku heele okutya imuka po.”

¹⁵ Omut̯e wa imuka po, ha utu okupopya. Jesus we mu pa ina.

¹⁶ Avehe va kambulwa kontilo, hava tumbaleke Kalunga hava tyaa: “Omuprofeti omunene wa hololoka mokati ketu, Kalunga we ya okutala ovantu ve.”

¹⁷ Omipopyo hembi ouhunga naJesus vya handjana moJudea atjihe nopoulaanganda apehe.

Odhontumwa dhaJohannes Omutjatji

¹⁸ Johannes ovalongwa ve ve mu hipululila ouhunga novipuka hembi avihe.

¹⁹ Ye wa ithana ovalongwa ve vavali, he ve tumu kuMuhona, ve ke mu pule okutyaa: “Ngukwa tiwa me ya, oove ne ngatu kevelele umo?”

²⁰ Ovalumentu hembenya hive thiki kuJesus, va popya hava tyaa: “Johannes Omutjatji we tu tumu kwoove, tu pule okutyaa: ‘Ngukwa tiwa me ya, oove ne ngatu kevelele umo?’ ”

²¹ Powola yatjo tuu ndjoka Jesus wa velula ovantu ovengi komauvela, koviihamo nokodhombepo odhombi, ovapot̯i ovengi we ve twikulula.

²² Iya Jesus we ve yaka ha tyaa: “Enden̯i, mu ka hipululile Johannes mbimwa mono nambimwa tee okutya ovapot̯i va twikuluka, ovilema mavi ende, owovilundu va veluka, odhompolo dha thituluka, ovat̯e mava imunwa kout̯e, ovathona mava teethelwa ondaka ombwa.

²³ Iya omunalao onguhama ndimbililwa.”

²⁴ Odhontumwa dhaJohannes hidha dhi po, Jesus wa uta okuhipululila owingi wovantu ouhunga naJohannes ha tyaa: “Mokuti mwa ile oku ka tala tji? Onenge ndjimai pukwapukwa kombepo?

²⁵ Iya mwa ka talele tji? Mwa ka talele omulumentu ngwaa dhala omidhalo omiwa vyomalesu? Taa tuutuu, mbava dhala omidhalo omiwa, mbave li mouwa, va kala modhombala.

²⁶ Iya mwa ka talele tji? Mwa ka talele omuprofeti? Iinga, me mu heele okutya ye wa pon̯a omuprofeti.

²⁷ Oye e li ye hengu ngwaa tiwaa: ‘Taa tuutuu, ame me ka tuma ontumwa yandje, nguma tenge, ye ngoka ngume ke ku longekedhela ondjila, tainkolo ove hóye ya.’

²⁸ Me mu heele okutya movantu mbava yumukwa kovakadhintu kamu na tja omunene ngwaa pon̯a Johannes, iya omununu kovakwawo avehe motjilongo tjaKalunga oye e mu pon̯a.”

²⁹ Ovantu avehe novathendelethi wo hive mu teelele, va itavela okutya Kalunga omuvyuuki, ve litjatjetha etjatjo lyaJohannes.

³⁰ Ovafarisai novalongiveta va tomba ontanto yaKalunga ndjee ve ningila, atjaa kava itavelele okutjatjwa kuJohannes.

³¹ Jesus wa twikila ko ha tyaa: “Iya ovantu vekula hendi me ve yeleke natji? Va ngala tji?

³² Va ngala odhondele mbava kala pohi pomalandethelo, amave liwololoka hava tyaa: ‘Twe mu hakelele, n̯e kamu dhanene, hatu imbi oviimbo vyomikoti, n̯e kamu lilile.’

³³ Iya Johannes Omutjatji hiee ya, ka lile omungome, ye ka nwine ovinyu, n̯e hamu tyaa: ‘U na ondemoni.’

³⁴ Omuna wOmuntu hiee ya, wa lya, ye ha nu, n̯e hamu tyaa: ‘Taa tuutuu ngwaa tunda, onkolwe, epanga lyovathendelethi novalundhi.’

³⁵ Iya ounongo waKalunga wa holololwa kovantu avehe mboka mbave u itavela.”

Jesus monganda yaSimon Omufarisai

³⁶ Umo owomOvafarisai wa ithana Jesus, va lye pamo naye. Jesus wa ya konganda yOmufarisai, ha kala pohi, hava li.

³⁷ Iya mondolopa moka mwa li omukadhintu umo ngoka ngwaa kala moulundhi. Hiaa tee okutya Jesus u li monganda yOmufarisai ma li, wa eta otjivavelo tjomadhi,

³⁸ ha hweene kon̯ima yaJesus podhompadhi dhe, ama lili. Wa uta okututika odhompadhi dhaJesus nomihodhi vye, he dhi theta nodhondjutji dhe dhokomutwe. Wa hupita odhompadhi dhaJesus, he dhi vaveke omadhi ngaa pepa.

³⁹ Omufarisai ngoka ngwee mu ithana, hiee tji mono, we lipopila momutima we ha tyaa: “Nguka ngaile omuprofeti, ngai wa iwa okutya omukadhintu hengu ngwee mu t̯in̯i omutji, ye u li vi, okutya omulundhi.”

⁴⁰ Jesus we mu yaka ha tyaa: “Simon, ndji na hime hala oku ku heela.” Simon ha tyaa: “Mulongethi, popya.”

⁴¹ Jesus we mu heela ha tyaa: “Kwa li omulevalethi umo wodhombongo ngwaa levaletha ovantu vavali odhongele. Umo wa levalele odhondenari omathele atano, nomukwawo omilongo vitano.

⁴² Iya hiva li ahave na tja himava thutu, we ve ithila po aveevali. Oun̯i atjaa puhemba vavali nguma ka kala ae mu hole okupon̯a omukwawo?”

⁴³ Simon wa yaka ha tyaa: “Ngundhe ongwaa ithilwa po odhingi.” Jesus ha tyaa: “Wa koyo nawa.”

⁴⁴ Iya wa pilulukila komukadhintu, ha heele Simon ha tyaa: “Omukadhintu hengu u mu lwete? Ame mbe ya monganda yoye, ove ku mpele omeva okulikoha kodhompadhi. Iya omukadhintu hengu wa tutike odhompadhi dhandje nomihodhi, he dhi theta nodhondjutji dhe.

⁴⁵ Ove ku ntjupitile, iya omukadhintu hengu ka petukile okuhupita odhompadhi dhandje nkee e dhile mo.

⁴⁶ Ove ku vavekele omutwe wandje omadhi, iya omukadhintu hengu wa vaveke odhompadhi dhandje omadhi ngaa pepa.

⁴⁷ Iya me ku heele okutya wa ithilwa po odhonkali dhe odhingi, iya wa hololola ohole on̯ingi. Ngoka ngwaa ithilwa po odhonunu, u na ohole onunu.”

⁴⁸ Jesus wa heela omukadhintu ha tyaa: “Odhonkali dhoye dha ithwa po.”

⁴⁹ Ovantu mboka mbava li amava li naJesus va uta okulipula hava tyaa: “Nguka aan̯i nguma itha po odhonkali?”

⁵⁰ Jesus wa heela omukadhintu ha tyaa: “Eitavelo lyoye lye ku hupitha. Enda nouwa.”