Lukas 5 - Etestamende Epe Moludhimba

Ovalongwa wolutenga

¹ Etango limo Jesus wa kulama pelunga lyaGenesaret, owingi wovantu we lin̯in̯ikidha puye, u teelele odhondaka dhaKalunga.

² Jesus wa mona omawato avali ngaa li kontyo yelunga, ovahwee va vadhwa ava dhi mo, amava koho omawaanda awo.

³ Ye wa londa mowato umo, mbwaa li owaSimon, he mu heele, e u hweenethe ko kanunu, u dhe ko kontyo. Jesus wa kala pohi mowato, ha longo ovantu.

⁴ Iya hiaa mana okupopya, wa heela Simon ha tyaa: “Liyila peiva hempee, n̯e mu ka lunde omawaanda en̯i.”

⁵ Simon we mu yaka ha tyaa: “Muhona, twa undapa out̯iku auhe, nt̯e katu na hitwa kambula mo, iya owaanda me u yumbu mo vala mena lyahiwa ntjeele.”

⁶ Iya hive tji ningi, va kambula odhohi odhingi unene, nomawaanda awo a uthauka.

⁷ Wo va kon̯ona ovakwawo mbava li mowato omukwawo, ve ye, ve ve popile. Wo ve ya, have yulitha omawato aeevali katee omawato maa hala okuhita.

⁸ Simon Petrus hiee tji mono, wa twika odhongolo podhompadhi dhaJesus ha tyaa: “Muhona, dha po pwaame, mena lyokutya ame ndjimulundhi.”

⁹ Iya ye novakwawo mboka mbava li pamo naye, ve kuminwa otjihikutulwa tjodhohi ndhiva hwaa,

¹⁰ Jakob naJohannes, oomunkwaSebedeus mbava li naSimon, nawo ve kuminwe. Jesus wa heela Simon ha tyaa: “Hó tila. Okudha hempa mo ningi omuhwee wovantu.”

¹¹ Wo va eta omawato kontyo, ovipuka avihe have vi thii po, have mu landula.

Jesus ma velula omuvedhi wotjilundu

¹² Jesus tainkolo a li mondolopa yontumba, mumwa li omulumentu umo ngwaa kambulwa unene kotjilundu, hiaa mono Jesus, we lit̯imika po kotjipala tje, he mu kumbu ha tyaa: “Muhona, andaa mo hala okumbelula, mo tji ulu.”

¹³ Jesus wa yela okuwoko kwe, he mu t̯in̯i ha tyaa: “Ame me hala, veluka.” Iya dhivadhiva ouvela wotjilundu wa dha mo muye.

¹⁴ Iya Jesus we mu ilikin̯a ha tyaa: “Hó tji heele omuntu noumo. Iya enda, u ke liyulikithe komuyambethi, ove u ka yandje otjali kotempeli ngaMoses hiaa heele, tji ve ningile oumbangi okutya ove wa veluka.”

¹⁵ Iya omipopyo ouhunga naJesus vya ya kokule, novantu ovengi ve ya oku mu teelela nokuvelulwa komauvela awo.

¹⁶ Jesus we ke likalela aika mokuti, oko a ka kumbila.

Jesus ma velula omulumentu wotjinteya

¹⁷ Etango limo Jesus hiaa li ama longo ovantu, pa li apa kala pohi Ovafarisai novalongiveta mbava dhile koulongo auhe womoGalilea nowomoJudea nomoJerusalem. Kodhonkono dhaMuhona, Jesus wa velula ovavedhi.

¹⁸ Iya taa tuutuu, pe ya ovalumentu mbava tjindi omulumentu kotjintali, nguu na otjinteya. Wo va li amava hala oku mu hititha mo, ve mu laleke po kotjipala tjaJesus.

¹⁹ Iya mena lyowingi wovantu va anyenenwe oku mu thikitha puJesus, hava londo kombanda yondjuwo, hava uthula ontovi, hapo ve mu thothononena notjintali tje mokati kawo kotjipala tjaJesus.

²⁰ Jesus hiaa mono eitavelo lyawo, we mu heela ha tyaa: “Ove, odhonkali dhoye dha ithwa po.”

²¹ Ovalongiveta nOvafarisai va uta okulipula hava tyaa: “Aan̯i ngu, nguma penye Kalunga hinyahi? Aan̯i nguma ulu okwiitha po odhonkali, haKalunga vala aika?”

²² Jesus wa iwa soka hiva li amave lipula, we ve pula ha tyaa: “Omena lyatji mamu lipula ovipuka hembi momitima vyen̯i?

²³ Hitja puvala otjin̯i, okutya: ‘Odhonkali dhoye dha ithwa po,’ ne okutya: ‘Kulama, enda’?

²⁴ Iya opo mu kale amu tji i okutya Omuna wOmuntu u na odhonkono kombanda yohi okwiitha po odhonkali,” Jesus wa heela omulumentu wotjinteya ha tyaa: “Ame me ku heele okutya kulama, itha po otjintali tjoye, enda konganda.”

²⁵ Ye wa kulama po dhivadhiva movipathi vyawo, ha itha po otjintali hoka hwaa li aa lala po, ha i konganda ama hivilike Kalunga.

²⁶ Avehe ve kumwa, hava hivilike Kalunga, wo va li ava tila hava tyaa: “Ndino twa mono ovipuka mbyee tu kumitha!”

Levi ma ithanwa

²⁷ Iya kon̯ima yovipuka hembi Jesus wa ya pondje, ha mono po omuthendelethi nguu tiwa oLevi, aa kala pohi pombonge yokuthendelela elilimo. Jesus we mu heela ha tyaa: “Ndandula ndje.”

²⁸ Levi wa thiaa po ovipuka avihe, ha landula Jesus.

²⁹ Levi wa ningila Jesus otjipito otjinene monganda ye. Iya monganda ye mwa li engundwa enene lyovathendelethi novakwawo mbava li amava li pamo nawo.

³⁰ Ovafarisai novalongiveta vawo va tangunitha ovalongwa vaJesus hava tyaa: “Omena lyatji himamu li, n̯e hamu nu pamo novathendelethi novalundhi?”

³¹ Jesus we ve yaka ha tyaa: “Mbave li nawa kava hepa otjimbanda, iya ovavedhi owo vala aveika mava hepa otjimbanda.

³² Ame hí dhile okwiithana ovavyuuki, iya mbe ya okwiithana ovalundhi, ve liteyulule.”

Otjikulu notjipe

³³ Ovantu vamo va heela Jesus hava tyaa: “Ovalongwa vaJohannes va kala amave litjaele ovikulya otwingi, hava kumbu, novalongwa wOvafarisai otjo va ninga, iya ovalongwa woye va kala vala amava li otjo mava nu.”

³⁴ Jesus we ve yaka ha tyaa: “Mamu ulu tuu okutumin̯in̯a omapanga omukupi e litjaele ovikulya, tainkolo omukupi ave li naye?

³⁵ Iya katango omukupi mave ke mu nyekwa, opo mave ke litjaela ovikulya.”

³⁶ Jesus we ve heela eeli hendi ha tyaa: “Kape na tja omuntu nguma tete momudhalo omupe elimendu, he li pampele komudhalo omukulu. Iya andaa me tji ningi, ma yono omudhalo omupe. Elimendu lyomudhalo omupe kaali thevelwa omudhalo omukulu.

³⁷ Iya kape na tja omuntu nguma dhili ovinyu ovipe modhosaku dhotjipa odhonkulu. Iya andaa me tji ningi, ovinyu ovipe mavi uthula odhosaku, vyo havi tika mo, nodhosaku madhi nyanyauka.

³⁸ Ovinyu ovipe vi dhilwa modhosaku odhompe.

³⁹ Kaku na tja omuntu ngwee ilila ovinyu ovikulu, ha hala ovipe, mena lyokutya ma tyaa: ‘Ovikulu oviwa.’ ”