Lukas 22 - Etestamende Epe Moludhimba

Ontanto yokukambula Jesus

¹ Iya otjipito tjomingome mbihavi tuwa ontathi, hitji tiwa Opaasa, tja li popedhi.

² Ovayambethi ovanene novalongiveta ve lipula okutya Jesus mave mu dhipaa vi, mena lyokutya va li amava tila ovantu.

Judas ma landetha Jesus

³ Iya Satana wa hita muJudas nguu tiwa oIskariot, umo owomomulongo navavali.

⁴ Judas wa ya oku ka tompola novayambethi ovanene novanene wovayungi wotempeli okutya ma ulu oku ve welelekela vi Jesus.

⁵ Wo va li ave hulukwa, have mu udhikile oku mu pa odhombongo.

⁶ Judas wa itavela okuyandja Jesus, ahape na tja owingi wovantu.

Otjipito tjOpaasa matji longekedhwa

⁷ Iya etango ndyoka lyomingome mbihavi tuwa ontathi lye thika, moka mumu dhipawa ondjona yOpaasa.

⁸ Jesus wa tuma ko Petrus naJohannes ha tyaa: “Enden̯i, mu ke tu longekedhele ondjona yOpaasa ndjimatu ya okulya.”

⁹ Iya wo ve mu pula hava tyaa: “Opi mpamo hala, tu ke ku longekedhele?”

¹⁰ Iya ye we ve yaka ha tyaa: “Taa tuutuu, himamu ya motjitungwalongo, mamu ka wanena nomulumentu ngwaa tjindi olundingo lwomeva. Mu landulen̯i katee monganda moka muma i.

¹¹ Heelen̯i omwene wonganda mu tyee: ‘Omulongethi me ku pula okutya ondjuwo yovayenda i li pi, ndji ka lile mo Opaasa pamo novalongwa vandje?’

¹² Iya ye me mu yulikile ondjuwo onene yopeulu ndjaa kombwa nawa. Ngamo mu longekedhela moka.”

¹³ Iya va ya, ovipuka avihe vya li ngahi ve vi heelwa. Iya hava longekedha Opaasa.

Okulya Okudhilikwa maku utwa

¹⁴ Owola yokulya hiye thiki, Jesus we ya okulya novayapostoli.

¹⁵ We ve heela ha tyaa: “Me hala nehalo enene okulya Opaasa hendji pamo nan̯e, tainkolo aheya tatethwa.

¹⁶ Iya me mu heele okutya híme ke i lya uke katee mai ka hwithilwa po motjilongo tjaKalunga.”

¹⁷ Iya wa itha po otjinwino, ha pandula ha tyaa: “Tji tambulen̯i, mu liyandjele.

¹⁸ Iya me mu heele okutya híme ka nwa uke ovinyu katee otjilongo tjaKalunga matji ya.”

¹⁹ Wa itha po omungome, ha kumbu, he u nyembula, he ve pa wo, ha tyaa: “Hehi olutu lwandje ndumalu yandjwa mena lyen̯i. Hehi tji ningen̯i amamu nt̯ipaluka.”

²⁰ Iya kon̯ima yokulya wa itha po otjinwino, ha tyaa: “Otjinwino hehi ewaneneno epe mombindhi yandje ndjimai tilwahi mena lyen̯i.

²¹ “Iya taa tuutuu, omumbweleleki matu li naye.

²² Iya Omuna wOmuntu ma i, ngahi tja hewa, atjaa utatyei omuntu ngoka ngume mu weleleke.”

²³ Wo va uta okulipula okutya oun̯i ngoka mpaeli mokati kawo ngume tji ningi.

Omunene aan̯i?

²⁴ Iya mokati kovalongwa mwa tukuka odhombata okutya aan̯i ngwaa thele okutalwa omunene okupon̯a ovakwawo.

²⁵ Iya Jesus we ve heela ha tyaa: “Odhohamba dhoviwan̯a dhi tumina ovantu vadho, namboka mbave ve tumina, va hala okutiwa ovantu ovawa.

²⁶ Iya n̯e mokati ken̯i hámu kala nyahoka. Nguma hala a kale omunene mokati ken̯i, nga ngale omununu, nomunakomeho nga kale ngomuundapi.

²⁷ Aan̯i ngwaa pon̯a omukwawo, ongwaa kala pohi ne onguma undapa? Haye ngoka ngwaa kala pohi? Iya ame ndji li mokati ken̯i ngomuundapi.

²⁸ “N̯e, on̯e mwa kala pwaame momaudheu andje.

²⁹ Tate ngahi a mpa odhonkono dhokutumina, otjo naame wo me mu pa etumino lyouhamba,

³⁰ opo mu ka lye nokunwa pamo naame motjilongo tjandje, iya mamu ka kala pohi kovipunditumino nokukoya omaanda omulongo naavali aIsrael.

Simon ma ilikin̯wa

³¹ “Simon, Simon teelela, Satana wa kumba a pewe oku mu thitha ngovilya.

³² Iya ame mbe ku kumbile, eitavelo lyoye ahamali dhimi mwoove. Naove himo tjuna, koleka ovakwen̯i.”

³³ Petrus wa yaka ha tyaa: “Muhona, ame mbe lilongekedha okuya pamo naove mokaliwoso nomet̯o.”

³⁴ Iya Jesus we mu heela ha tyaa: “Petrus, me ku heele okutya ndino hendi, tainkolo onkondombolo háiya popya, ove mo lintendele tutatu okutya ku ndji i.”

Okapapo kodhombongo, ondjato nomukonda

³⁵ Jesus we ve heela ha tyaa: “Himbe mu tumine ahamu na tja okapapo kodhombongo, ondjato nodhongaku, mwa hepele?” Ve mu yaka hava tyaa: “Aai, notjimo.”

³⁶ Jesus we ve heela ha tyaa: “Iya napano nguu na okapapo kodhombongo, nga kale nako, nondjato nga kale nayo. Ngoka nguhe na omukonda, nga landethe po ombaikitha ye, nge lilandele omukonda.

³⁷ Iya me mu heele okutya mwaame omusonekwa hembu mau tha okuhwithilwa po mbumau tyaa: ‘Wa havelwa mokati kodhomputji.’ Iya avihe mbyoka mbyaa ntjonekelwa, mavi hwithilwa po.”

³⁸ Ovalongwa ve mu heele hava tyaa: “Muhona, taa tuutuu, hempa pe na omikonda vivali.” Jesus we ve heela ha tyaa: “Tjau, tja hulu!”

Jesus ma kumbu

³⁹ Jesus wa pita pondje, ha i kOndundu yomiholivi, ngahi a ilila, novalongwa ve wo ve mu landula.

⁴⁰ Hiee thiki koluvedhe hoka, we ve heela ha tyaa: “Kumben̯i, opo hámu pwile momatyoletho.”

⁴¹ Iya wa yapuka muwo otjikambo hitji lithike pokuyumbwa kwewe, ha twike odhongolo, ha kumbu

⁴² ha tyaa: “Taa, andaa mo hala, ndjeka ndje otjinwino hehi, hangahi me hala, iya ehalo lyoye ngali hwithilwe po.”

⁴³ Omweengeli womeulu we mu hololokela, he mu pameke.

⁴⁴ Wa li moviihamo ovinene, ha kumbu aa mana mo. Oupyu we wa tota ngomata ombindhi amai totele pohi.

⁴⁵ Iya hiaa mana okukumba, wa tjuna kovalongwa ve, we ve vadha ava lala, mena lyokutya va li ava pongo.

⁴⁶ Jesus we ve pula ha tyaa: “Mwa lalele tji? Imuken̯i po, n̯e mu kumbe, opo hámu pwile momatyoletho.”

Jesus ma kambulwa

⁴⁷ Jesus tainkolo a li ama popi, pe ya engundwa lyovantu ndyaa pitilwa komeho kuJudas, umo owomovalongwa omulongo navavali. Wa hweena kuJesus e mu hupite.

⁴⁸ Iya Jesus we mu pula ha tyaa: “Judas, Omuna wOmuntu mo mu weleleke, amo mu hupita?”

⁴⁹ Iya ovalongwa mboka mbava li pamo naJesus, hiva mono soka himatji hala okuningwa, ve mu heela hava tyaa: “Muhona, ngatu ve twele nomikonda?”

⁵⁰ Umo owomuwo wa tona omupika womuyambethi omunene, he mu kopola okutwi kwokokulyo.

⁵¹ Iya Jesus wa yaka ha tyaa: “Hámu ningi nyahoka!” Wa t̯in̯a okutwi kwe, he mu velula.

⁵² Iya Jesus wa heela ovayambethi ovanene novanene wovayungi wotempeli novanene mboka mbave ya oku mu kambula ha tyaa: “Mwe ya nomikonda nodhonkunye ngambamamu kambula otjimpulu?

⁵³ Omatango aehe ndji kala nan̯e motempeli, n̯e kamu nkambula, iya hendji owola yen̯i nodhonkono dhomutumini wet̯iku lyouye hembu.”

Petrus me litendele Jesus

⁵⁴ Iya va kambula Jesus, have mu twala konganda yomuyambethi omunene. Petrus wa landula mo ae li kon̯ima kokule.

⁵⁵ Iya hiva tyavele omulilo pontanga yonganda, va kala pohi, Petrus naye we ya, ha kala pohi puwo.

⁵⁶ Omukadhona umo nguu undapa monganda moka, hiee mu mono ama yoto, we mu tongolola, ha tyaa: “Hengu naye wa li pamo naJesus.”

⁵⁷ Iya Petrus we litendela, ha tyaa: “Mukadhintu ove, ame hengu hí mu i.”

⁵⁸ Kon̯ima yokaluvedhe omuntu umo we mu dhimbuka, ha tyaa: “Naove wo oove umo owomuwo.” Petrus wa yaka ha tyaa: “Mulumentu ove, ame haame.”

⁵⁹ Kon̯ima yowola imo vala, omuntu umo uke we tji koleka ha tyaa: “Otjatjili nahengu wa li pamo naye, mena lyokutya naye wo Omugalilea.”

⁶⁰ Iya Petrus wa yaka ha tyaa: “Mulumentu ove, hí yuvite soka himo popi.” Iya dhivadhiva tainkolo wa li ama popi, onkondombolo ya popya.

⁶¹ Muhona wa piluluka ha tala Petrus. Iya Petrus wa thipaluka odhondaka dhaMuhona, ngahi e mu heelele ha tyaa: “Onkondombolo tainkolo háiya popya, ove mo lintendele tutatu.”

⁶² Iya wa pita pondje ama lili unene.

Jesus ma penywa

⁶³ Iya ovalumentu mboka mbava li amava yungu Jesus, ve mu penya, have mu tono.

⁶⁴ Ve mu kuta pomeho, have mu pula hava tyaa: “Thimbila okutya aan̯i ngwee ku tono.”

⁶⁵ Iya ve mu penya, have mu popi ovipuka ovingi.

Otjoonganene tjovanene

⁶⁶ Hikwa tji, Otjoongi tjovanene wotjiwan̯a novayambethi ovanene novalongiveta tja ongana, hava eta Jesus mOtjoongi tjawo.

⁶⁷ Va heela Jesus hava tyaa: “Andaa oove Messias, tu heela.” Iya we ve heela ha tyaa: “Nande mu heele, kaamu ndjitavele,

⁶⁸ nande mu pula, kaamu ndjaka.

⁶⁹ Iya okudha ndino Omuna wOmuntu ma ka kala pohi kokulyo kwaKalunga nguu na odhonkono.”

⁷⁰ Wo avehe ve mu pula hava tyaa: “Oove atjaa MunwaKalunga?” Jesus we ve yaka ha tyaa: “Mu li mondjila himamu tya aame.”

⁷¹ Iya wo hava tyaa: “Twa hepa uke oumbangi watji? Odhondaka ndhaa dhi motjinyo tje, nt̯e twe dhi tee.”