Lukas 17 - Etestamende Epe Moludhimba

Omatyoletho

¹ Jesus wa heela ovalongwa ve ha tyaa: “Iya kaatji tjiiwa, omatyoletho a kale ahamae ya, atjaa utatyei ngume e eta!

² Nguma tyoletha kamo komuhembu oununu, we thewa okukutilwa ekunkwa mothingo, ye ha yumbwa melunga.

³ Iya liyungen̯i n̯e ovene! “Omukwen̯i andaa wa lundha, mu pukulula. Andaa we liteyulula, mu ithila po.

⁴ Andaa wa lundha kwoove ovikando epanduvali metango, ye he ya kwoove oku ku heela ha tyaa: ‘Mbe liteyulula,’ mu ithila po.”

Eitavelo

⁵ Ovayapostoli va heela Muhona hava tyaa: “Tu wedhela eitavelo.”

⁶ Muhona we ve heela ha tyaa: “Ngaile mu na eitavelo ndii lithike pombuto yotjitho tjosinapi, ngai mamu heele omukuyu hembu hamu tyaa: ‘Dhikuka po, u litwike melunga,’ ngai mau mu tee.

Otjilinga tjomupika

⁷ “Omupika woye andaa wa dhi kokupulula ne kokulitha, mo tya nge ye monganda dhivadhiva a lye?

⁸ Aai, iya mo mu heele ho tyaa: ‘Ngotji ntwiile po ovikulya, ove u dhale nawa, u nkalele, tainkolo ame li otjo me nu, tjau atjaa ove kon̯ima u lye, ove u nwe.’

⁹ Omupika ngoka ma pandulwa mena lyokutya wa undapa ovipuka mbyoka mbyaa heelwa? Kaa pandulwa.

¹⁰ Iya nan̯e wo amwa undapa ovipuka avihe mbimwa heelwa, tyen̯ii: ‘Nt̯e tuvapika vala vanyahinya, mena lyokutya twa undapa vala soka hitwa thele okuundapa.’ ”

Ovavedhi wotjilundu omulongo mava velulwa

¹¹ Iya tainkolo va li amava i koJerusalem, Jesus wa yatakana pokati kaSamaria naGalilea.

¹² Hiaa i kokalongo kamo, ovalumentu wotjilundu omulongo ve mu wan̯en̯eka, hava kulama kokule,

¹³ hava wololoka hava tyaa: “Jesus, Muhona, tu t̯ila onkenda.”

¹⁴ Jesus hiee ve mono, we ve heela ha tyaa: “Enden̯i, mu ke liyulikithe kovayambethi.” Tainkolo va li amava i, va veluka.

¹⁵ Iya umo owomuwo hiaa mono okutya wa veluka, wa tjuna kuJesus, ha tumbaleke Kalunga nondaka onene.

¹⁶ We lisata pohi podhompadhi dhaJesus, he mu pandula. Iya omulumentu ngoka wa li Omusamaria.

¹⁷ Jesus wa popya ha tyaa: “Mbava velulwa kava ombele omulongo? Iya omoovi ve li pi?

¹⁸ Kaku monekele uke noumo ngwaa tjuna, ongendi ndjika aiika oyo ya tjuna vala okutumbaleka Kalunga?”

¹⁹ Jesus we mu heela ha tyaa: “Kulama, enda, eitavelo lyoye lye ku velula.”

Okuya kwotjilongo tjaKalunga

²⁰ Ovafarisai va pula Jesus okutya otjilongo tjaKalunga matji ya nalun̯i. Ye we ve yaka ha tyaa: “Otjilongo tjaKalunga hatjipuka soka himatji ya amamu tji mono.

²¹ Kaaku tiwaa: ‘Taa tuutuu, tji li hempa’ ne ‘Tji li hempenya,’ mena lyokutya otjilongo tjaKalunga tji li mun̯e.”

²² Jesus wa heela ovalongwa ve ha tyaa: “Omatango mae ke ya, katango mamu ka hala okumona etango limo lyOmuna wOmuntu, atjaa kaamu ke li mona.

²³ Mamu ka heelwa okutyaa: ‘Taa tuutuu, u li hempa’ ne: ‘U li hempenya.’ Hámu i ko, n̯e hámu ve landula.

²⁴ Iya matji ka ngala olukeno amalu kene, lu vyadhuka kodhontyo dheulu katee kodhontyo odhonkwawo, Omuna wOmuntu otjo ma ka kala metango lye.

²⁵ Iya olutenga Omuna wOmuntu u tha okwiihamethwa unene, ha yekelwahi kekula hendi.

²⁶ “Ngahi tja li pomatango aNoa, otjo matji ka kala wo pomatango Omuna wOmuntu.

²⁷ Ovantu va li ava lya, va nwa, va kupa, wo va kupitha, katee etango ndyoka Noa a hita mondjuwowato. Iya ethundja lye ya, hali ve han̯auna po avehe.

²⁸ Otjo tja li wo pomatango aLot. Ovantu va li ava lya, ava nwa, va landa, wo hava landetha, va lima, wo hava tungu.

²⁹ Iya etango ndyoka Lot hiaa dhiluka moSodom, pa loka omulilo nodhompawe dhomulilo mbwaa dha meulu, hau ve han̯auna po avehe.

³⁰ Omuna wOmuntu katango ma ka hololoka, otjo matji ka kala hinyahi.

³¹ “Etango ndyoka ngoka nguma vadhwa kombanda yondjuwo, kaa ka heluka okupitila ovipuka vye mondjuwo. Nanguma vadhwa motjana, há tjuna monganda, a ka pitile mo tja.

³² Thipaluken̯i omukadhintu waLot.

³³ Ngoka nguma taendha okuhupitha omwenyo we, me u keketha, iya ngume u keketha, me ke u hupitha.

³⁴ Me mu heele okutya otjit̯iku soka ovantu vavali mava ka vadhwa moluntu lumo, umo ma ithwa po, omukwawo he thiwa po.

³⁵ Ovakadhintu vavali mava ka vadhwa amava tu, umo ma ithwa po, omukwawo he thiwa po.

³⁶ [Ovalumentu vavali ava vadhwa motjana, umo ma tambulwa nomukwawo me thiwa po.]”

³⁷ Ovalongwa ve mu pula hava tyaa: “Muhona, opi humaku ka ningilwa ovipuka hembi?” Ye we ve yaka ha tyaa: “Hoka huku na omutuntu, oko ku onganena odhonkuvi.”